កីឡា

មូលហេតុ២ ប្រធានក្រុមម៉ាឡេស៊ី J.Q. Sim ចង់មកលេងនៅកម្ពុជា

បានផុស

៦ ខែ មុន

នៅ

ថ្ងៃពុធ ៤ កញ្ញា ២០២៤

ដោយ

កីឡាករបាល់ទះជម្រើសជាតិម៉ាឡេស៊ី Sim Jian Qin លេចធ្លោក្នុងព្រឹត្តិការណ៍ប្រកួតបាល់ទះពានរង្វាន់សម្តេចធិបតី SEA V. League Challenge 2024 កាលពីថ្ងៃទី៣០ ខែសីហា ដល់ថ្ងៃទី២ ខែកញ្ញា នៅរាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈការបង្ហាញសមត្ថភាពដ៏ល្អ ក្លិបបាល់ទះកម្ពុជាខ្លះទំនងជាចាប់អារម្មណ៍លើរូបគេដើម្បីនាំចូលរួមក្រុមទាំងការប្រកួតក្នុងលីគបាល់ទះកំពូលកម្ពុជា និងពានរង្វាន់ធំលំដាប់ទី២សម្តេចក្រឡាហោម ស ខេង ដែលនឹងចាប់ផ្តើមនាពេលដ៏ខ្លីខាងមុខ។

ឆ្លើយតបនឹងអ្នកសារព័ត៌មានចោទសួរថា គិតយ៉ាងណា ប្រសិនបើមានក្លិបបាល់ទះនៅកម្ពុជាចាប់អារម្មណ៍ កីឡាករលេខ១២ប្រធានក្រុមជម្រើសជាតិម៉ាឡេស៊ីបានឆ្លើយថា រូបគេពេញចិត្តក្នុងការមកលេងនៅកម្ពុជាដោយមានហេតុផលពីរយ៉ាង។

កីឡាករ Sim Jian Qin បាននិយាយថា ៖«រហូតដល់ពេលនេះមិនមានក្លិបកម្ពុជាណាមួយទាក់ទងខ្ញុំទេ ប៉ុន្តែខ្ញុំលើសពីសប្បាយចិត្តសម្រាប់ការមកលេងនៅទីនេះ ពីព្រោះខ្ញុំដឹងថា ការលេងបាល់ទះនៅកម្ពុជាគឺអាចធ្វើឲ្យយើងលេងដើម្បីជីវិតរស់នៅបាន»។ ប្រការនេះទំនងជារូបគេសំដៅទៅលើអាជីពបាល់ទះនៅកម្ពុជាអាចរកចំណូលចិញ្ចឹមគ្រួសារបាន។

ម្យ៉ាងវិញ នៅប្រទេសម៉ាឡេស៊ីមិនទាន់មានកម្មវិធីប្រកួតសំខាន់ណាមួយឡើយ ដូច្នេះរូបគេទំនេរដែលចេញទៅក្លិបណាក៏បាន។ កីឡាករបាននិយាយថា ៖«ការប្រកួតបាល់ទះនៅកម្ពុជាពិតជាគួរឲ្យចាប់អារម្មណ៍ណាស់។ អ្នកគាំទ្រស្រឡាញ់បាល់ទះយ៉ាងខ្លាំង។ ជាក់ស្តែង អ្នកគាំទ្របានថតរូបជាមួយកីឡាករយ៉ាងសប្បាយរីករាយ។ ជាមួយគ្នានេះនៅម៉ាឡេស៊ី លីគមិនទាន់ចាប់ផ្តើមទេ ដូច្នេះខ្ញុំពិតជារីករាយក្នុងការចូលរួមជាមួយក្លិបណាមួយដែលចាប់អារម្មណ៍ខ្ញុំ។ ខ្ញុំរីករាយចូលរួមនៅទីនេះ»។

រដូវកាល២០២២/២៣ J.Q. Sim លេងឲ្យក្លិប Win Streak នៅតៃវ៉ាន់ ដែលជាកីឡាករកម្ពុជា វឿន វាសនា កំពុងលេងបច្ចុប្បន្ន។

ព្រឹត្តិការណ៍ប្រកួតពានរង្វាន់សម្តេចធិបតី SEA V. League Challenge ឆ្នាំ២០២៤ មិនមែនជាលើកទី១ទេសម្រាប់កីឡាករ Sim Jian Qin ដែលបានមកប្រកួតនៅប្រទេសកម្ពុជា។ កាលពីឆ្នាំ២០២៣ រូបគេក៏បានរួមដំណើរជាមួយជម្រើសជាតិម៉ាឡេស៊ី ក្នុងព្រឹត្តិការណ៍កីឡាស៊ីហ្គេម លើកទី៣២ នៅវិមានពហុកីឡដ្ឋានជាតិអូឡាំពិក។

៥ប្រកួតក្នុងកម្មវិធី SEA V. League ក្រុមបាល់ទះជម្រើសជាតិម៉ាឡេស៊ីទទួលបានជ័យជម្នះលើក្រុមជម្រើសជាតិសិង្ហបុរី និងឡាវ ប៉ុន្តែចាញ់កម្ពុជាដើម្បីទទួលបានចំណាត់ថ្នាក់លេខ២៕

អត្ថបទ៖ វីរបុត្រ