កីឡា

Nick Taylor ប្រាប់ពីបង្ហាញប្រឈម កម្ពុជាពិបាកប្រជែងក្នុងតំបន់

បានផុស

៤ ខែ មុន

នៅ

ថ្ងៃអង្គារ ១០ កញ្ញា ២០២៤

ដោយ

ខ្សែបម្រើប្រយុទ្ធកូនកាត់ខ្មែរ-អាមេរិក Nick Taylor បានមើលឃើញពីការប្រែប្រួលយ៉ាងខ្លាំងរបស់ក្រុមបាល់ទាត់ជម្រើសជាតិនៅក្នុងតំបន់អាស៊ាន និងអាស៊ី តាមរយៈការស្វះស្វែងរកកីឡាករនៅក្រៅប្រទេស ឬផ្តល់សញ្ជាតិដល់កីឡាករបរទេសដើម្បីពង្រឹងក្រុម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសសង្ហា Nick Taylor បានលើកឡើងថា កីឡាករក្នុងប្រទេសកម្ពុជានៅមានកម្រិត បើប្រៀបធៀបនឹងប្រទេសក្នុងតំបន់។ ប្រការនេះជាមូលហេតុធ្វើឲ្យពិបាកក្នុងការជ្រើសរើសកីឡាករដើម្បីពង្រឹងក្រុមជម្រើសជាតិ។ ប្រទេសមួយចំនួននៅតំបន់អាស៊ាន ដូចជាឥណ្ឌូណេសុី និងម៉ាឡេសុី មានកីឡាករកូនកាត់ច្រើនលេងនៅក្រៅប្រទេស។

កីឡាករ Nick Taylor បាននិយាយថា ៖«ខ្ញុំមើលឃើញពីការប្រែប្រួលបាល់ទាត់ក្នុងតំបន់អាស៊ាន។ ឥណ្ឌូណេសុី និងម៉ាឡេសុី បានប្រើប្រាស់កីឡាករចូលសញ្ជាតិនិងកូនកាត់ច្រើន។ ចំពោះក្រុមជម្រើសជាតិកម្ពុជាយើងវិញមិនមានកីឡាករច្រើនដូចគេទេ។ មិនត្រឹមតែមិនសូវមានកីឡាករកូនកាត់នៅក្រៅប្រទេសប៉ុណ្ណោះទេ សូម្បីតែកីឡាករទៅលេងនៅក្រៅប្រទេស ដូច្នេះពិតជាពិបាកក្នុងការប្រកួតប្រជែងជាមួយគេណាស់»។

ទើបតែរយៈពេល២ឆ្នាំចុងក្រោយនេះប៉ុណ្ណោះដែលកម្ពុជាបានព្យាយាមស្វះស្វែងរកកីឡាករកូនកាត់នៅក្រៅប្រទេស និងផ្តល់សញ្ជាតិកីឡាករបរទេសលេងនៅលីគកំពូលកម្ពុជាដើម្បីក្លាយជាកីឡាករជម្រើសជាតិ។ ជាក់ស្តែង Nick Taylor ជាកីឡាករខ្មែរ-អាមេរិក យុវជន លឹម លោកាថុង និង Asharvy Mustapha ជាដើម។ ចំណែកកីឡាករផ្តល់សញ្ជាិមាន Yudai Ogawa មកពីប្រទេសជប៉ុន កីឡាករ Mizuno មកពីប្រទេសជប៉ុន និងកីឡាករ កាន់ ម៉ូ មកពីអាហ្វ្រិកខាងត្បូង៕