កីឡា

ក្រុមណាឡើងវគ្គបន្ត កម្ពុជា ប៉ះ ស្រីលង្កា យប់នេះជាការជួបគ្នាលើកទី៥?

បានផុស

៦ ថ្ងៃ មុន

នៅ

ថ្ងៃអង្គារ ១០ កញ្ញា ២០២៤

ដោយ

ក្រុមបាល់ទាត់ជម្រើសជាតិ កម្ពុជា និង ស្រីលង្កា នឹងមានក្រុមមួយឡើងជុំបន្តក្នុងពានរង្វាន់ 2027 AFC Asian Cup នៅពេលក្រុមទាំងពីរត្រូវជួបគ្នាវគ្គជម្រុះ ជើងទី២ វេលាម៉ោង៧យប់ ថ្ងៃទី១០ ខែកញ្ញា ឆ្នាំ២០២៤ នៅពហុកីឡដ្ឋានជាតិអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតជើងទី២នេះពិតជាសំខាន់ណាស់សម្រាប់ក្រុមទាំងពីរ បន្ទាប់ពីជើងទី១បញ្ចប់ទៅដោយលទ្ធផលស្មើគ្នា ០-០ កាលពីថ្ងៃទី៥ ខែកញ្ញា ឆ្នាំ២០២៤ នៅទឹកដីស្រីលង្កា ដូច្នេះក្រុមទាំងពីរត្រូវការឈ្នះរៀងៗខ្លាំងដើម្បីបង្កើតប្រវត្តិសាស្ត្រថ្មីឡើងទៅវគ្គបន្ត។

ក្នុងសន្និសីទសារព័ត៌មានកាលពីថ្ងៃទី៩ ខែកញ្ញា ឆ្នាំ២០២៤ លោក Abdullah Almutairi គ្រូបង្វឹកស្រីលង្កា បាននិយាយថា ការប្រកួតនឹងក្លាយជាការប្រកួតដ៏អស្ចារ្យសម្រាប់អ្នកគាំទ្ររបស់ក្រុមជម្រើសជាតិទាំងពីរ។

មុនពេលធ្វើដំណើរមកទឹកដីកម្ពុជា លោក Almutairi បានសន្យាចំពោះអ្នកគាំទ្ររបស់ខ្លួនពីការប្តេជ្ញាយកជ័យជម្នះឲ្យខាងតែបាននៅលើទឹកដីកម្ពុជា។ ជាពិសេសក្រុមរបស់លោកនឹងបង្ហាញទម្រង់ខុសប្លែកពីក្រុមស្រីលង្កាកាលពីមុន។

ជាមួយគ្នានេះ លោក Felix Dalmas បាននិយាយថា នេះជាការប្រកួតលើកទី១សម្រាប់អ្នកគាំទ្រកម្ពុជាដែលឃើញជម្រើសជាតិរបស់ខ្លួនលេងតទល់ជាមួយក្រុមដែលមានកីឡាករស្ទើរតែកីឡាករអឺរ៉ុបទាំងអស់ ហើយលោករំពឹងផ្តល់ភាពរីករាយដល់អ្នកគាំទ្រតាមរយៈលទ្ធផលវិជ្ជមានសម្រាប់ឡើងទៅវគ្គបន្ត។

កម្ពុជាស្ថិតនៅចំណាត់ថ្នាក់លេខ១៨០ ក្នុងតារាងចំណាត់ថ្នាក់ពិភពលោក FIFA Ranking ខណៈ ស្រីលង្កា ស្ថិតនៅលេខ២០៥ ដែលជាចំណាត់ថ្នាក់ទាបបំផុត។ ទោះបីជាចំណាត់ថ្នាក់ខុសគ្នា ប៉ុន្តែបើនិយាយពីគុណភាព និងសមត្ថភាពកីឡាករហាក់មិនសូវខុសប្លែកគ្នាប៉ុន្មានឡើយ។

ស្រីលង្កា បានប្រើប្រាស់កីឡាករដែលហៅមកពីក្រៅប្រទេសស្ទើរទាំងអស់សម្រាប់ជម្រើស១១នាក់ដំបូងនៅលើទីលានកាលពីជើងទី១។ ចំណែកកម្ពុជាកីឡាករទាំងអស់ដែលបង្ហាញខ្លួននៅលើទីលានគឺសុទ្ធតែជាកីឡាករលេងក្នុងលីគកំពូលកម្ពុជា។

កម្ពុជា និង ស្រីលង្កា ធ្លាប់ជួបគ្នា៤លើកគឺកម្ពុជាឈ្នះ២លើក ស្រីលង្កាឈ្នះ១លើក និងស្មើគ្នា១លើក។ ជួបគ្នាលើកដំបូង កម្ពុជាទទួលបានជោគជ័យយ៉ាងធំធេងក្នុងលទ្ធផល ៦-១ សម្រាប់ការប្រកួតមិត្តភាពអន្តរជាតិ នៅក្រៅដី ក្នុងឆ្នាំ១៩៧២។

ការជួបគ្នាលើកទី២ កម្ពុជា បានចាញ់ ស្រីលង្កា ដោយលទ្ធផល ០-១ សម្រាប់ការប្រកួតមិត្តភាពអន្តរជាតិ នៅក្រៅដីកាលពីឆ្នាំ២០០១។ ការជួបគ្នាលើកទី៣ក្នុងការប្រកួតមិត្តភាពអន្តរជាតិដោយកម្ពុជាបានលត់ស្រីលង្កា ដោយលទ្ធផល ៤-០ នៅទឹកដីរបស់កម្ពុជាកាលពីឆ្នាំ២០១៦។

ចុងក្រោយបំផុត ក្រុមទាំងពីរបានបញ្ចប់ដោយលទ្ធផលស្មើគ្នា ០-០ ជើងទី១ វគ្គជម្រុះ AFC 2027 Asian Cup។

ប្រវត្តិជួបគ្នា៤លើក

ស្រីលង្កា ១-៦ កម្ពុជា (មិត្តភាពអន្តរជាតិ ឆ្នាំ១៩៧២)
ស្រីលង្កា ១-០ កម្ពុជា (មិត្តភាពអន្តរជាតិ ឆ្នាំ២០០១)
កម្ពុជា ៤-០ ស្រីលង្កា (មិត្តភាពអន្តរជាតិ ឆ្នាំ២០១៦)
ស្រីលង្កា ០-០ កម្ពុជា (ជម្រុះពានរង្វាន់ AFC Asian Cup 2027) ឆ្នាំ២០២៤

សូមបញ្ជាក់ថា ការប្រកួតជម្រុះនេះត្រូវជ្រើសរើសក្រុមចំនួន៣ឡើងទៅជុំទី៣ (វគ្គជម្រុះក្នុងពូល) ក្នុងចំណោមប្រទេស៦គឺ ម៉ុងហ្គោលី ទីម័រខាងកើត ព្រុយណេ ម៉ាកាវ ស្រីលង្កា និងកម្ពុជា។