កីឡា

ប្រវត្តិមិនធម្មតា Whelan ដៃគូរបស់ រឿង សុភ័ណ្ឌ ប្រកួតនៅអង់គ្លេសខែក្រោយ

បានផុស

៧ ខែ មុន

នៅ

ថ្ងៃពុធ ១១ កញ្ញា ២០២៤

ដោយ

ដៃភ្លើងជើងរន្ទះ រឿង សុភ័ណ្ឌ ត្រូវធ្វើការធ្ងន់មែនទែននៅពេលរូបគេធ្វើដំណើរទៅប្រឈមនឹងម្ចាស់ផ្ទះអង់គ្លេស Luke Whelan នៅថ្ងៃទី១៩ ខែតុលា ឆ្នាំ២០២៤ នៅទីក្រុងឡុងដ៍សម្រាប់ការប្រកួតដែលត្រូវបានដាក់រហស្សនាម«គុនខ្មែរ ប៉ះ មួយថៃ»។

កីឡាករ Luke Whelan ជាមួយខ្សែក្រវាត់ទាំង៨ខ្សែ

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករអង់គ្លេស Luke Whelan អាយុ៣៣ឆ្នាំ បានប្រឡូកក្នុងអាជីពប្រដាល់ឃីកបុកស៊ីង និងមួយថៃអស់រយៈពេល១៥ឆ្នាំហើយ។ រូបគេបានឆ្លងកាត់បទពិសោធឡើងសង្វៀនធំៗស្ទើរទូទាំងពិភពលោកដូចជា សង្វៀនឃីកបុកស៊ីងលំដាប់ពិភពលោក K-1 របស់ជប៉ុន សង្វៀនលំដាប់ពិភពលោក Glory របស់ប្រទេសអង់គ្លេស និងសង្វៀនជាច្រើននៅតំបន់អឺរ៉ុប។

ក្នុងរយៈពេល១៥ឆ្នាំនៃប្រដាល់អាជីពប្រដាល់ កីឡាករកម្ពស់១.៨៥ម៉ែត្រ គិតត្រឹមខែកញ្ញា ឆ្នាំ២០២៤ ធ្លាប់ឡើងសង្វៀនចំនួន៧៣ដង ក្នុងនោះទទួលបានជ័យជម្នះ៥៧ដង ចាញ់១៤ដង និងស្មើ២ដង ហើយជាកីឡាករលំដាប់លេខ១នៅចក្រភពអង់គ្លេសក្នុងប្រភេទទម្ងន់៧០គីឡូក្រាម។

បើតាមស្ថិតិដែលបង្ហាញជាផ្លូវការនៅគណនី Instagram កីឡាករ Luke Whelan បានឈ្នះខ្សែក្រវាត់ចំនួន៨ខ្សែគឺ ជើងឯកពិភពលោក៦ខ្សែនៅស្ថាប័ន IKF, FIBA, KGP, ISKA, ជើងឯកទ្វីបអឺរ៉ុប European Championship និងជើងឯកចក្រភពអង់គ្លេស២លើក។

ការជួបគ្នាជាមួយអ្នកលេងគុនខ្មែរ រឿង សុភ័ណ្ឌ មិនមានអ្វីគួរឲ្យបារម្ភខ្លាំងសម្រាប់កីឡាករអង់គ្លេសរូបនេះទេ ពីព្រោះរូបគេបានឆ្លងកាត់ដៃគូខ្លាំងៗជាច្រើនស្ទើរទូទាំងពិភពលោក និងជាការប្រកួតនៅទឹកដីកំណើតខ្លួនឯងរឹតតែមានកម្លាំងចិត្ត។ អ្វីដែលថ្មីសម្រាប់កីឡាករអង់គ្លេសរូបនេះគឺប្រើពាក់ហ្គង់ដៃចេញម្រាម MMA ជាលើកដំបូង។

ផ្ទុយទៅវិញជាការប្រកួតមួយដ៏លំបាកសម្រាប់ រឿង សោភ័ណ្ឌ ដែលត្រូវធ្វើដំណើរទៅទឹកដីអង់គ្លេសចម្ងាយរាប់ពាន់គីឡូម៉ែត្រ ហើយប៉ះដៃគូជាម្ចាស់ផ្ទះ និងមានកម្ពស់ខ្ពស់ជាងថែមទៀត។