កីឡា

២៤ក្រុមឡើងជុំទី៣ 2027 AFC Asian Cup ខណៈកម្ពុជាក្រុមអាស៊ាន១គត់ធ្លាក់

បានផុស

៧ ខែ មុន

នៅ

ថ្ងៃពុធ ១១ កញ្ញា ២០២៤

ដោយ

បន្ទាប់ពីការប្រកួតជម្រុះជុំទី២ចប់ ពេលនេះរកឃើញក្រុម២៤ឡើងទៅជុំទី៣ ដែលជាវគ្គជម្រុះក្នុងពូល ពានរង្វាន់ AFC Asian Cup ឆ្នាំ២០២៧ ដែលប្រទេសអារ៉ាប៊ីសាអ៊ូឌីត ធ្វើជាម្ចាស់ផ្ទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុម៣ដែលជាប់ជម្រុះជុំទី២ និងបានឡើងជុំទី៣គឺ ព្រុយណេ ទីម័រខាងកើត និងស្រីលង្កា។ ការឡើងវគ្គបន្តនេះ ព្រុយណេ បានយកឈ្នះ ម៉ាកាវ ទាំងពីរជើង ៤-០។ ទីម័រខាងកើត យកឈ្នះ ម៉ុងហ្គោលី ទាំងពីរជើង ៤-៣ និង ស្រីលង្កា យកឈ្នះ កម្ពុជា ដោយប៉េណាល់ទី ៤-២ ក្រោយស្មើគ្នា ២-២។

ចំណែក ក្រុមជម្រើសជាតិឡាវ ប៊ូតាន និង ម៉ាល់ឌីវ បានឡើងជុំទី៣ ក្នុងនាមជាក្រុមចាញ់ល្អបំផុតកាលពីជុំទី២ និងក្រោមពេលក្រុមជម្រើសកោះហ្គាម បានដកខ្លួន ដូច្នេះក្រុមទាំង៣នេះបានឡើងទៅជុំទី៣ដោយស្វ័យប្រវត្តិ។

ចំណែក១៨ក្រុមផ្សេងទៀត អាហ្វាហ្គានីស្ថាន ម៉ាឡេស៊ី ស៊ីរី បង់ក្លាដែស មីយ៉ាន់ម៉ា តាជីគីស្ថាន ឆាយនីសតៃប៊ិ នេប៉ាល់ ថៃ ហុងកុង ប៉ាគីស្ថាន តួកមេនីស្ថាន ឥណ្ឌា ហ្វីលីពីន វៀតណាម លីបង់ សិង្ហបុរី និង យេម៉ែន បានឈរចាំនៅជុំទី៣ដោយស្វ័យប្រវត្តិក្នុងនាមជាក្រុមមានចំណាត់ថ្នាក់ FIFA ល្អ។

ក្រុមទាំង២៤ នឹងត្រូវចាប់ឆ្នោតជ្រើសរើសពូលនៅថ្ងៃទី១៩ ខែធ្នូ ឆ្នាំ២០២៤ ដើម្បីបែងចែកជា៦ពូល ក្នុង១ពូលមាន៤ក្រុម។ ការប្រកួតសន្សំពិន្ទុក្នុងពូល លក្ខណៈក្នុងដី និងក្រៅដី ចាប់ពីថ្ងៃទី២៥ ខែមីនា ឆ្នាំ២០២៥ ដល់ថ្ងៃទី៣១ ខែមីនា ឆ្នាំ២០២៦ ដើម្បីជ្រើសរើសយក៦ក្រុមពោលគឺលេខ១ក្នុងពូលនីមួយៗឡើងទៅជុំផ្តាច់ព្រ័ត្រជាមួយក្រុមជម្រើសជាតិ១៨ដែលឈរចាំ។

ក្រុម១៨ដែលនៅចាំជុំចុងក្រោយស្វ័យប្រវត្តិគឺ ម្ចាស់ផ្ទះអារ៉ាប៊ីសាអ៊ូឌីត អូស្ត្រាលី អ៉ីរ៉ាក់ អ៉ីរ៉ង់ អ៊ូបេគីស្ថាន កាតា អារ៉ាប់រួម ជប៉ុន កូរ៉េខាងត្បូង អូម៉ង់ ប៉ាឡេស្ទីន បារ៉ែន ហ្ស៊កដានី ចិន ឥណ្ឌូណេស៊ី កូរ៉េខាងជើង គុយវែត និងគីជីស្ថាន ក្នុងនាមជាក្រុមធ្វើបានល្អក្នុងវគ្គជម្រុះជើងឯកពិភពលោក (FIFA World Cup 2026)។

កម្ពុជាបានក្លាយជាក្រុមអាស៊ានតែ១គត់ក្នុងចំណោម១១ប្រទេសបានធ្លាក់ត្រឹមវគ្គជម្រុះជុំទី២ ខណៈ៩ប្រទេសឡើងទៅជុំទី៣ និងឥណ្ឌូណេស៊ី ជាក្រុមល្អបំផុតរង់ចាំនៅជុំផ្តាច់ព្រ័ត្រ៕

អត្ថបទ៖ វីរបុត្រ