កីឡា

Nick Taylor សុំទោសអ្នកគាំទ្រ និងមិត្តរួមក្រុមសម្រាប់ប៉េណាល់ទីអត់ចូល

បានផុស

៣ ខែ មុន

នៅ

ថ្ងៃព្រហស្បតិ៍ ១២ កញ្ញា ២០២៤

ដោយ

ខ្សែបម្រើស្លាបខ្មែរ-អាមេរិក Nick Taylor នៅព្រឹកថ្ងៃទី១២ ខែកញ្ញា ឆ្នាំ២០២៤ បានបង្ហោះសារសុំទោសដល់អ្នកគាំទ្រ និងមិត្តរួមក្រុមដែលរូបគេស៊ុតប៉េណាល់ទីមិនបានសម្រេចសម្រាប់ការប្រកួតជាមួយស្រីលង្កា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រុសស្អាត Nick Taylor ជាអ្នកស៊ុតប៉េណាល់ទីមុនគេសម្រាប់ការប្រកួតជើងទី២ វគ្គជម្រុះ AFC Asian Cup 2027 ជាមួយស្រីលង្កា កាលពីយប់ថ្ងៃទី១០ ខែកញ្ញា ឆ្នាំ២០២៤ នៅពហុកីឡដ្ឋានជាតិអូឡាំពិក បន្ទាប់ពីក្រុមទាំងពីរស្មើគ្នា ២-២ ក្នុងរយៈពេល១២០នាទី។

Taylor បាននិយាយថា ៖«ជាដំបូង ខ្ញុំសុំទោសដ៏អស់ពីចិត្តចំពោះអ្នកគាំទ្រ និងមិត្តរួមក្រុម។ ការស៊ុតប៉េណាល់ទីដំបូងមិនចូលបានធ្វើឲ្យលំបាកកាន់តែខ្លាំងសម្រាប់កីឡាករស៊ុតបន្តបន្ទាប់។ ខ្ញុំទទួលខុសត្រូវ ពីព្រោះខ្ញុំមានអារម្មណ៍មានទំនុកចិត្តចំពោះសមត្ថភាពខ្លួនឯង តែជាអកុសលមិនសមតាមបំណងទៅវិញ»។

«ខ្ញុំមិនចង់ឲ្យមានការអាណិតអាសូរពីនរណាម្នាក់ទេ ខ្ញុំគ្រាន់តែចង់សុំទោស។ ខ្ញុំមានអារម្មណ៍សោកស្តាយយ៉ាងខ្លាំង។ យើងទាំងអស់គ្នាខកចិត្ត កីឡាករ អ្នកគាំទ្រ ក្រុមគ្រូបង្វឹក យើងទាំងអស់គ្នាពិតជាចង់ឈ្នះខ្លាំងណាស់ ហើយជឿជាក់ថា យើងអាចធ្វើបាន។ វាស្ទើរតែបែកទ្រូងនៅពេលលទ្ធផលជិតនឹងឈ្នះទៅហើយ បែរជាចាញ់»។ កីឡាករបានរៀបរាប់។

កីឡាករបន្ថែមថា ៖«ចំពោះអ្វីដែលកើតមានឥឡូវនេះ និងអនាគត ខ្ញុំតែងតែមានមោទនភាពដែលបានតំណាងឲ្យកម្ពុជា។ បាល់ទាត់ និងជីវិតនឹងនៅតែបន្តឆ្ពោះទៅមុខ។ យើងខ្ញុំទាំងអស់គ្នាពិតជាអរគុណខ្លាំងណាស់ចំពោះការគាំទ្រក្នុងកាលៈទេសៈដ៏លំបាកទាំងនេះ»។

តាមរយៈបរាជ័យក្រោមថ្វីជើងស្រីលង្កាដោយលទ្ធផលប៉េណាល់ទី២-៤ កម្ពុជាបានធ្លាក់ត្រឹមវគ្គជម្រុះជុំទី២ក្នុងជើងឯកអាស៊ី ហើយនៅចុងឆ្នាំ២០២៤ កម្ពុជាត្រូវមានកាតព្វកិច្ចធំមួយទៀតគឺប្រកួតពានរង្វាន់លំដាប់ទី១អាស៊ាន AFF Championship ៕