កីឡា

យប់មិញស៊ុត២គ្រាប់ យុវជន Yamal ចង់ក្លាយជាវីរបុរសក្លិប Barcelona

បានផុស

៧ ខែ មុន

នៅ

ថ្ងៃចន្ទ ១៦ កញ្ញា ២០២៤

ដោយ

កីឡាករវ័យក្មេងសញ្ជាតិអេស្ប៉ាញ Lamine Yamal កំពុងបង្ហាញទម្រង់លេងយ៉ាងអស្ចារ្យទាំងនៅក្នុងក្រុមបាល់ទាត់ជម្រើសជាតិអេស្ប៉ាញ និង Barcelona ដែលជាក្លិបក្តីស្រមៃរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Yamal បានបង្ហាញខ្លួនលើកដំបូងឲ្យក្រុមធំ Barcelona ក្នុងវ័យ១៥ឆ្នាំ កាលពីខែមេសា ឆ្នាំ២០២៣។ នៅយប់ថ្ងៃទី១៥ ខែកញ្ញា ឆ្នាំ២០២៤ រូបគេស៊ុតបាន២គ្រាប់ជួយឲ្យក្លិបអ្នកមានបុណ្យយកឈ្នះលើក្រុម Girona ដោយលទ្ធផល ៤-១ ក្នុងសប្តាហ៍ទី៥ នៃលីគកំពូលអេស្ប៉ាញ ស្របពេល៥សប្តាហ៍កន្លងទៅ ពួកគេមិនទាន់ចាញ់សោះ ហើយក៏មិនទាន់មានក្រុមណាស៊ុតចូលឡើយ។

កីឡាករវ័យ១៧ឆ្នាំ Yamal បាននិយាយក្នុងកម្មវិធី “El Hormiguero” របស់ទូរទស្សន៍អេស្ប៉ាញមួយថា៖«ខ្ញុំសង្ឃឹមថា ខ្ញុំនឹងមិនចាកចេញទេ (Barcelona)។ ខ្ញុំចង់ក្លាយជាវីរបុរសនៅ Barca»។

ខ្សែបម្រើស្លាប Yamal បានដើរតួយ៉ាងសំខាន់ក្នុងការជួយឲ្យក្រុមជម្រើសជាតិអេស្បាញឈ្នះពានរង្វាន់ទ្វីបអឺរ៉ុប Euro ឆ្នាំ២០២៤ ជាលើកទី៤ និងបានក្លាយជាកីឡាករវ័យក្មេងបំផុតបានបង្ហាញខ្លួន និងស៊ុតបញ្ចូលទីក្នុងប្រវត្តិសាស្រ្ដបាល់ទាត់ប្រចាំទ្វីបអឺរ៉ុប។

ផ្ដើមចេញពីកីឡាករនៅសាលាយុវជនថ្នាល La Masia កីឡាករ Yamal ត្រូវបានជាមើលឃើញកំពុងដើរតាមគន្លងរបស់កីឡាករ Lionel Messi ដែលផ្ដើមចេញពីយុវជនថ្នាលដូចគ្នា។

បន្ទាប់ពីការប្រៀបធៀបបែបនេះ Yamal បានឆ្លើយតបថា ៖«ខ្ញុំព្យាយាមធ្វើអ្វីជាខ្ញុំ ហើយចង់ឲ្យគេចងចាំថាខ្ញុំជាខ្ញុំ។ វានឹងពិបាកណាស់ក្នុងការឈានទៅដល់ទីនោះគឺការសម្រេចសមិទ្ធផលដ៏អស្ចារ្យដូច Messi។ ខ្ញុំសង្ឃឹមថា ខ្ញុំនឹងត្រូវបានគេចងចាំជា Lamine Yamal»៕

ប្រែសម្រួល៖ ផា រតនា