កីឡា

៣ក្រុមមិនទាន់ចាញ់ក្នុងលីគកំពូលកម្ពុជាត្រឹមសប្តាហ៍ទី៤

បានផុស

១ សប្តាហ៍ មុន

នៅ

ថ្ងៃចន្ទ ១៦ កញ្ញា ២០២៤

ដោយ

ក្លិបបាល់ទាត់ភ្នំពេញក្រោន ណាហ្គាវើលដ៍ និង អង្គរថាយហ្គឺរ ជាក្រុមមិនទាន់ស្គាល់បរាជ័យក្នុងការប្រកួតខេមបូឌានព្រីមៀរលីគ២០២៤-២៥ ដែលបានដំណើរការ៤សប្តាហ៍កន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្នំពេញក្រោន រកបាន១២ពិន្ទុពេញ ឈរលើកំពូលតារាង តាមរយៈជ័យជម្នះទាំង៤ប្រកួត។ ប្រកួតទី១ ពួកគេបានយកឈ្នះ វិសាខា ៤-២, សប្តាហ៍ទី២ ឈ្នះ ក្រសួងការពារជាតិ ២-១, សប្តាហ៍ទី៣ ឈ្នះ បឹងកេត ២-១ និងសប្តាហ៍ទី៤ ឈ្នះ គិរីវង់សុខសែនជ័យ៦-០។

ណាហ្គាវើលដ៍ ទើបតែឆ្លងកាត់៣ប្រកួត ដោយរកបាន៩ពិន្ទុពេញ ឈរចំណាត់ថ្នាក់លេខ៣ តាមរយៈជ័យជម្នះលើក្រុមគិរីវង់សុខសែនជ័យ ២-០ ក្នុងសប្តាហ៍ទី១, ឈ្នះ វិសាខា ១-០ ក្នុងសប្តាហ៍ទី២ និងឈ្នះ បឹងកេត ៣-១ ក្នុងសប្តាហ៍ទី៣។

ក្រុមភ្ញាក់ផ្អើលនោះគឺ អង្គរថាយហ្គឺរ មិនទាន់ស្គាល់បរាជ័យដែរ ដោយឆ្លងកាត់៣ប្រកួតគឺឈ្នះទាំងអស់ រកបាន៩ពិន្ទុ កំពុងឈរចំណាត់ថ្នាក់លេខ៤។ សប្តាហ៍ទី១ ពួកគេបានយកឈ្នះ សមាគមបាល់ទាត់ក្រសួងមហាផ្ទៃ ១-០, សប្តាហ៍ទី២ ឈ្នះក្រសួងការពារជាតិ ២-១ និងសប្តាហ៍ទី៣ ឈ្នះ អាយអេសអាយ ដង្កោសែនជ័យ ២-០។

ព្រះខ័នរាជស្វាយរៀង ឈ្នះ៣ និងចាញ់១ ឈរចំណាត់ថ្នាក់លេខ២។ វិសាខា ឈ្នះ២ និងចាញ់២ ឈរលេខ៥ ហើយ អាយអេសអាយ ដង្កោសែនជ័យ ឈ្នះ២ និងចាញ់២ ឈរលេខ៦។

ជាមួយគ្នានេះ បឹងកេត ឈ្នះ១ និងចាញ់២ មាន៣ពិន្ទុ ឈរលេខ៧ ហើយក្រសួងការពារជាតិឈ្នះ១ និងចាញ់៣ មាន៣ពិន្ទុឈរលេខ៨។ ក្រុម៣ដែលមិនទាន់ស្គាល់ជ័យជម្នះគឺ សមាគមបាល់ទាត់ក្រសួងមហាផ្ទៃ ចាញ់២ និងស្មើ១ មាន១ពិន្ទុ។ ឡាយហ្វ ព្រះសីហនុ ស្មើ១ និងចាញ់៣មាន១ពិន្ទុ ខណៈគិរីវង់សុខសែនជ័យចាញ់ទាំង៤ប្រកួត៕