កីឡា

សហព័ន្ធកីឡាកង់ទទួលបានជោគជ័យបំផុតក្នុងអាណត្តិចាស់កន្លងទៅ

បានផុស

៦ ខែ មុន

នៅ

ថ្ងៃអង្គារ ១៧ កញ្ញា ២០២៤

ដោយ

សហព័ន្ធកីឡាទោចក្រយានកម្ពុជាទទួលបានជោគជ័យបំផុតក្នុងអាណត្តិចាស់រយៈពេល៤ឆ្នាំកន្លងទៅ បន្ទាប់ពីបង្កើតប្រវត្តិសាស្ត្រក្នុងការឈ្នះមេដាយកីឡាស៊ីហ្គេមជាលើកដំបូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហព័ន្ធកីឡាទោចក្រយានកម្ពុជាបានរៀបចំមហាសន្និបាតបញ្ចប់អាណត្តិចាស់ ២០២០-២០២៤ និងបន្តអាណត្តិថ្មី ២០២៤-២០២៨ កាលពីរសៀលថ្ងៃទី១៦ ខែកញ្ញា ឆ្នាំ២០២៤ នៅទីស្នាក់ការនៃគណៈកម្មាធិការជាតិអូឡាំពិកកម្ពុជា។

តាមរបាយការណ៍របស់លោក នូ ចំរើន អគ្គលេខាធិការសហព័ន្ធកីឡាទោចក្រយានកម្ពុជាបានបង្ហាញថា អាណត្តិចាស់២០២០-២០២៤កន្លងទៅគឺជាអាណត្តិទទួលបានជោគជ័យបំផុតជាប្រវត្តិសាស្ត្ររបស់កីឡាកង់កម្ពុជា។ ជោគជ័យធំបំផុតទី១គឺទទួលបានមេដាយប្រាក់១ និងសំរិទ្ធ១ ពីកីឡាស៊ីហ្គេម ឆ្នាំ២០២៣ ដែលប្រទេសកម្ពុជាធ្វើជាម្ចាស់ផ្ទះលើកដំបូង។ កន្លងមក កីឡាជិះកង់កម្ពុជាមិនធ្លាប់ទទួលបានមេដាយស៊ីហ្គេមឡើយ។ មេដាយទាំងពីររកបានដោយកីឡាករ គីម ម៉េងហុង គឺមេដាយប្រាក់ លើវិញ្ញាសាកង់ភ្នំ Men’s Elimination និងមេដាយសំរិទ្ធ លើវិញ្ញាសាកង់ភ្នំ Men’s Cross Country។

លោក នូ ចំរើន បន្ថែមទៀតថា ពិសេសទៀតនោះ អាណត្តិចាស់កន្លងទៅនេះបានបណ្តុះបណ្តាលធនធានបានច្រើន។ ក្នុងនោះបណ្តុះបណ្តាលមន្ត្រីបច្ចេកទេសរៀបចំការប្រកួតកម្រិតអន្តរជាតិ។ ជាក់ស្តែងការធ្វើម្ចាស់ផ្ទះរៀបចំការប្រកួតកីឡាជិះកង់ក្នុងកីឡាស៊ីហ្គេម ឆ្នាំ២០២៣គឺភាគច្រើនបំផុតប្រើប្រាស់មន្ត្រីបច្ចេកទេសកម្ពុជា ហើយមន្ត្រីអន្តរជាតិតែ៦នាក់ប៉ុណ្ណោះ។ ជាមួយគ្នានេះ ក៏បានបណ្តុះបណ្តាលក្រុមគ្រូបង្វឹកកម្រិតអន្តរជាតិដែលពួកគាត់នឹងកាន់តែឡើងកម្រិតទៀតនៅឆ្នាំបន្តបន្ទាប់។

តាមរយៈរបាយការណ៍ហិរញ្ញវត្ថុរបស់លោកអគ្គហិរញ្ញិកបានបង្ហាញថា សហព័ន្ធកីឡាទោចក្រយានកម្ពុជាក្នុងអាណត្តិចាស់៤ឆ្នាំកន្លងទៅទទួលបានថវិកាគាំទ្រពី៣ផ្នែក។ ផ្នែកទី១ទទួលបានប្រាក់ឧបត្ថម្ភប្រចាំឆ្នាំដែលសរុប៤ឆ្នាំគឺ៣០០លានរៀលពីក្រសួងអប់រំ យុវជន និងកីឡា។ ផ្នែកទី២ទទួលបានប្រាក់ពីដៃគូឧបត្ថម្ភជាង១២ម៉ឺនដុល្លារអាមេរិក និងផ្នែកទី៣ទទួលបានប្រាក់ឧបត្ថម្ភពីលោក ប៉ាន សូរស័ក្តិ ដែលជាប្រធានសហព័ន្ធកីឡាទោចក្រយានកម្ពុជា។

លោកអគ្គហិរញ្ញិកបានបញ្ជាក់ថា លោកប្រធានសហព័ន្ធកីឡាទោចក្រយានកម្ពុជាបានចំណាយថវិកាផ្ទាល់ខ្លួនចំនួន៥៥៤១៧ដុល្លារអាមេរិកដើម្បីទ្រទ្រង់សហព័ន្ធក្នុងរយៈពេល៤ឆ្នាំកន្លង។ ការចំណាយសំខាន់ទៅលើ រដ្ឋបាល រៀបចំការប្រកួត ការបណ្តុះបណ្តាល ការហ្វឹកហាត់ ព្រមទាំងកិច្ចការសំខាន់ចាំបាច់ផ្សេងៗទៀត។ ទោះបីជាយ៉ាងណា ថវិកាដែលទទួលបានទាំងនេះមិនគ្រប់គ្រាន់ឡើយ ពីព្រោះកីឡាកង់ត្រូវការចំណាយខ្ពស់។

សម្រាប់សមាសភាពថ្នាក់ដឹកនាំអាណត្តិថ្មី២០២៤-២០២៨ ដែលត្រូវបានបោះឆ្នោតជាឯកច្ឆន្ទគឺលោក ប៉ាន សូរស័ក្តិ បន្តជាប្រធាន ក្នុងនោះអនុប្រធាន៣រូប អគ្គលេខាធិការ១រូប អគ្គលេខាធិការរង២រូប អគ្គហិរញ្ញិក១រូប និងសមាជិក៥រូប។

លោក ប៉ាន សូរស័ក្តិ ប្រធាន
លោក កឹម សុខុន អនុប្រធាន
លោក វង្ស ខាន់ពៅ អនុប្រធាន
លោក ឡាយ សុខសៅគន្ធា អនុប្រធាន
លោក នូ ចំរើន អគ្គលេខាធិការ
លោក ព្យែរ អ៊ីវកាទ្រី អគ្គលេខាធិការរង
លោក សុខ ដារិទ្ធិ អគ្គលេខាធិការរង
កញ្ញា សួង ចាន់តូរ៉ាទី អគ្គហិរញ្ញិក
សមាជិក៥រូប លោក ឡុង កែមវិចិត្រ លោក អ៊ូច សាវិន កញ្ញា មាស តឿ លោក សែម ប៊ុតឌី និងលោក ខ្លួត ករណី។

ក្នុងមហាសន្និបាតបញ្ចប់អាណត្តិចាស់ និងបន្តអាណត្តិថ្មី ធ្វើវិសោធនកម្មក្នុងការកែប្រែលក្ខន្តិកៈមួយចំនួនដើម្បីឲ្យទាន់តាមសម័យកាល។ ជាពិសេសបានប្តូរឈ្មោះពី«សហព័ន្ធខ្មែរទោចក្រយាន»ទៅជា«សហព័ន្ធទោចក្រយានកម្ពុជា»ដើម្បីស្របទៅតាមឈ្មោះជាភាសាអង់គ្លេស ក៏ដូចជាសម័យកាលរីកចម្រើន។ ជាមួយគ្នានេះ សហព័ន្ធបានផ្តល់លិខិតថ្លែងអំណគុនដល់ភាគីពាក់ព័ន្ធដូចជាដៃគូ ក្លិប និងអ្នកសារព័ត៌មានជាដើមដែលរួមចំណែកជំរុញឲ្យកីឡាជិះកង់ឆ្ពោះទៅមុខជាលំដាប់៕