Aguero ថា ត្រឹមតែ Mbappe ម្នាក់មិនអាចជួយ​ Real Madrid ឈ្នះ UCL

ការចុះហត្ថលេខានាំយក Kylian Mbappe មិនអាចធានាសម្រាប់​ក្លិប​ Real Madrid ឈ្នះជើង​ឯក​ Champions League នោះទេ។ នេះ​បើ​យោងតាមយល់ឃើញរបស់អតីតខ្សែប្រយុទ្ធរបស់ Man City កីឡាករ Sergio Aguero ។

ក្រុម Real Madrid បានឈ្នះពាន UEFA Champions League ចំនួន១៥លើក ហើយក៏ជាក្រុមតែមួយគត់ដែលឈ្នះពានរង្វាន់ច្រើនជាងគេ។ រដូវកាលនេះ Mbappe បានស៊ុតបញ្ចូលទីបាន៥គ្រាប់ក្នុងការបង្ហាញខ្លួន៧​ប្រកួតដំបូងជាមួយ Real Madrid។ យ៉ាង​ណា​ Aguero ជឿជាក់ថា ការពារតំណែងជើងឯក UEFA Champions League នឹងមិនងាយស្រួលទេ ទោះ​ក្លិប​មានខ្សែប្រយុទ្ធលំដាប់ពិភពលោក​ក៏​ដោយ។

លោក Sergio Aguero បាននិយាយថា ៖«គ្មាននរណាម្នាក់អាចមើលរំលង Real Madrid បានទេ។ ការចូលរួមរបស់ Mbappe ជាមួយ Real Madrid គឺដើម្បីធ្វើឲ្យពួកគេក្លាយបង្កើនការគំរាមកំហែងដល់ដៃគូ។ ខ្ញុំគិតថា គាត់នឹងក្លាយអ្នកស៊ុតបញ្ចូលទីបានច្រើនជាងគេ La Liga តែ​​កីឡាករតែម្នាក់មិនអាចធ្វើ​ឲ្យ​ប្លែក​នោះ​ទេ»។

លោក Sergio Aguero យល់ឃើញបែបនេះដោយោង​ទៅ​លើ​ការប្រកួត Champions League កាន់តែពិបាក​នៅរដូវកាលនេះ ដោយសារ​ប្រើប្រាស់រូបមន្ដថ្មី។

លោក Aguero បានបន្ថែមថា៖«យើងនឹងត្រូវតែមើលពីរបៀបដែលវាដំណើរការក្នុងការប្រកួត។ ការផ្លាស់ប្តូរគឺសំខាន់ វានឹងពិបាកក្នុងការស៊ាំជាមួយពួកគេ»៕

ប្រែសម្រួល៖ ផា រតនា