មនុស្ស៤៣នាក់ជាប់បម្រាមពេញមួយជីវិត នៅចិន​ពីការកំណត់លទ្ធផលការប្រកួតទុកមុន

ប្រធានាធិបតី​សាធារណរដ្ឋប្រជាមានិតចិន លោក Xi Jinping បាននិងកំពុងមើលការខុសត្រូវលើការបង្រ្កាបអំពើពុករលួយនៅក្នុងពិភពកីឡាដែលមានរឿងអាស្រូវ​នា​រយៈពេលប៉ុន្មានឆ្នាំចុងក្រោយ​ ជាពិសេសនៅក្នុង​កីឡាបាល់ទាត់។

កាលពី​សប្តាហ៍​មុន អតីតកីឡាករជម្រើសជាតិចិន​៣រូប និងកីឡាករកូរ៉េខាងត្បូង Son Jun-ho ត្រូវបានពិន័យ ព្រមទាំង​មាន​មន្ត្រីសមាគម​កីឡា​បាល់ទាត់ចិន (CFA) ថ្នាក់ខ្ពស់​ជា​ច្រើន​នាក់ត្រូវបានដាក់ទណ្ឌកម្មរួចហើយនៅក្នុងការស៊ើបអង្កេតអំពើពុករលួយ។

ដោយល្បីល្បាញជាអ្នកគាំទ្របាល់ទាត់ លោក Xi Jinping មានចេតនាចង់ឃើញបាល់ទាត់ចិនរីកចម្រើនលើកម្រិតអន្តរជាតិ ហើយសង្ឃឹមថានឹងឃើញប្រទេសចិនធ្វើជាម្ចាស់ផ្ទះ​បាល់ទាត់​ពិភព​លោក​ World Cup ប៉ុន្តែសេចក្តីប្រាថ្នារបស់លោកត្រូវបានបង្អាក់ដោយការលេងមិនល្អ និងរឿងអាស្រូវ​ឥតឈប់ឈរ។

យ៉ាងហោចណាស់មន្ត្រីសមាគមបាល់ទាត់ចិន លំដាប់ខ្ពស់ចំនួន ១០នាក់ត្រូវបានដាក់ទណ្ឌកម្មរួចហើយនៅក្នុងការស៊ើបអង្កេតអំពើពុករលួយ​ក្នុង​នោះ​មាន​ទាំង​អតីតប្រធានសមាគមកីឡា​បាល់ទាត់ចិន លោក Chen Xuyuan ដែលត្រូវ​បាន​កាត់ទោសជាប់ពន្ធនាគារអស់មួយជីវិតកាលពីខែមីនា។

កាល​ពី​ដើមឆ្នាំ​២០២៤ លោក Gou Zhongwen អតីត​នាយករដ្ឋបាលទូទៅកីឡា​របស់​ចិនពីឆ្នាំ២០១៦ ដល់ឆ្នាំ២០២២ បានក្លាយជាឥស្សរជនខ្ពស់ម្នាក់ទៀតដែលត្រូវបានចោទប្រកាន់ពីបទពុករលួយ។ បច្ចុប្បន្ន​មនុស្ស​​ចំនួន ៤៣នាក់ត្រូវបានហាមឃាត់ពេញ​មួយ​ជីវិត​ ពាក់​ព័ន្ធ​នឹង​បាល់ទាត់ ល្បែងស៊ីសង និងការកំណត់លទ្ធផលទុកមុនក្នុងការប្រកួតនៅក្នុងរលកថ្មីនៃការបង្រ្កាបអំពើពុករលួយរបស់លោក​ប្រធានាធិបតី Jinping។

ការស៊ើបអង្កេតរយៈពេលពីរឆ្នាំលើល្បែងស៊ីសងខុសច្បាប់ និងការជួសជុលការប្រកួត​ក្នុងស្រុកបានជាប់ពាក់ព័ន្ធមនុស្ស ១២៨នាក់។ ការហាមប្រាមកាលពី​សប្តាហ៍​មុន​ ធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីក្រុមបាល់ទាត់ជម្រើសជាតិចិន បានរងបរាជ័យយ៉ាងអាម៉ាស់ដល់ទៅ ៧-០ ក្រោម​ថ្វី​ជើង​របស់ជប៉ុនក្នុង​វគ្គ​ជម្រុះ World Cup ឆ្នាំ២០២៦ និងប៉ុន្មានម៉ោងមុនការប្រកួតជម្រុះផ្សេងទៀតជាមួយអារ៉ាប៊ីសាអ៊ូឌីត។

ដោយឡែក កីឡាករ Son Jun-ho ដែលលេងបាន ៤ប្រកួតឱ្យកូរ៉េខាងត្បូង ក្នុងព្រឹត្តិការណ៍ World Cup ឆ្នាំ២០២២ ​ត្រូវបានហាមឃាត់។ ខ្សែបម្រើវ័យ ៣២ឆ្នាំរូបនេះធ្លាប់លេងឱ្យក្លិប​ Shandong Taishan ក្នុងក្របខ័ណ្ឌលីគកំពូលចិន ហើយត្រូវបានឃុំខ្លួននៅ​ចិនអស់រយៈពេលជិតមួយឆ្នាំ “ពីបទសង្ស័យទទួលសំណូកដោយបុគ្គលិកមិនមែនរដ្ឋ”។

តំណាងម្នាក់បានរាយការណ៍ថា Son Jun-ho និងបក្សពួករបស់គេត្រូវបានគេចោទប្រកាន់ ហើយនឹងដោះស្រាយក្នុងពេលឆាប់ៗ។ ខ្សែបម្រើរូបនេះបច្ចុប្បន្នលេងនៅលីគកំពូលរបស់កូរ៉េខាងត្បូង។ កីឡាករជម្រើស​ជាតិ​​ចិន​៣​នាក់​គឺ​ Jin Jingdao, Guo Tianyu និង Gu Chao ត្រូវ​បាន​​ជាប់​បម្រាមពេញមួយជីវិត៕

ប្រែសម្រួល៖ មន្នីរ័ត្ន
ប្រភព៖ Inside The Games