ស៊ុតចូល១គ្រាប់យប់មិញ Endrick បំបែកកំណត់ត្រាថ្មីនៅ Real Madrid

ក្រោយស៊ុតបញ្ចូលទី១គ្រាប់យប់មិញ ខ្សែប្រយុទ្ធវ័យក្មេង Endrick បានបំបែកកំណត់ត្រាកីឡាករ Raul របស់ Real Madrid តាំងពីឆ្នាំ១៩៩៥ ក្នុងក្របខណ្ឌ UEFA Champions League ។

កីឡាករ Endrick បានក្លាយជាអ្នកស៊ុតបញ្ចូលទីក្មេងបំផុតមិនធ្លាប់មានរបស់ក្លិប Real Madrid នៅ UEFA Champions League ក្រោយពួកគេបានយកឈ្នះក្រុម Stuttgart ក្នុងលទ្ធផល ៣-១ ថ្ងៃប្រកួតបើកឆាកពានរង្វាន់កំពូលទ្វីបអឺរ៉ុប។ កីឡាករ​វ័យ​១៨​ឆ្នាំ​ ត្រូវបានប្ដូរចូលនៅនាទី៨០ នៅពេលការប្រកួតជិតបញ្ចប់នៅនាទី៩០+៥ Endrick បានប្រើជើងឆ្វេងស៊ុតបញ្ចូលបានយ៉ាងល្អ។

គ្រាប់បាល់នោះហើយបានធ្វើឲ្យរូបគេបំបែកកំណត់ត្រាជាកីឡាករក្មេងបំផុតក្នុងប្រវត្តិសាស្រ្ដរបស់ក្លិប Real Madrid ចាប់តាំងពីឆ្នាំ១៩៩៥ ក្រោយវីរបុរសក្លិបអធិរាជស Raul បានកាន់កាប់កំណត់ត្រាមួយនេះអស់រយៈពេលយ៉ាងយូរ ក្នុងនាមជាកីឡាករក្មេងបំផុតស៊ុតបញ្ចូលទី UEFA នៅអាយុ១៨ឆ្នាំ និង១១៣ថ្ងៃ ខណៈកំណត់ត្រាថ្មីរបស់ Endrick ស៊ុតបញ្ចូលទីនៅអាយុ១៨ឆ្នាំនិង៥៨ថ្ងៃ។

គ្រាប់​បាល់​របស់ Endrick ​ធ្វើ​ឲ្យរូបគេ​ក្លាយ​ជា​កីឡាករ​ក្មេង​បំផុត​ទី​២ ​ដែល​មិន​មែន​ជា​កីឡាករនៅតំបន់​អឺរ៉ុប​ ​ក្នុង​ការ​បង្ហាញ​ខ្លួន​លើក​ដំបូង​ UEFA Champions League។ អតីតខ្សែប្រយុទ្ធសញ្ជាតិហ្គាណាលោក Peter Ofori-Quaye របស់ក្រុម Olympiacos បានស៊ុតបញ្ចូលទីនៅអាយុ១៧ឆ្នាំ និង១៩៤​ថ្ងៃក្នុងការបង្ហាញខ្លួនលើកដំបូងនៅក្នុងក្របខណ្ឌ UEFA៕

ប្រែសម្រួល៖​ ផា រតនា