កីឡា

U20 កម្ពុជា ប៉ះ ក្រុមជើងឯក អ៊ូបេគីស្ថាន ម៉ោង២ថ្ងៃនេះ

បានផុស

៥ ខែ មុន

នៅ

ថ្ងៃចន្ទ ២៣ កញ្ញា ២០២៤

ដោយ

ក្រុមបាល់ទាត់ជម្រើសជាតិកម្ពុជាអាយុ២០ឆ្នាំ (U20) នឹងប្រកួតជាមួយ ក្រុមជម្រើសជាតិ អ៊ូបេគីស្ថាន វគ្គជម្រុះក្នុងពូល B ពានរង្វាន់ AFC U20 Asian Cup China PR 2025 វេលាម៉ោង២រសៀល ថ្ងៃទី២៣ ខែកញ្ញា នៅឆាយនីសតៃប៊ិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាការប្រកួតលើកទី២របស់ក្រុមយុវជនកម្ពុជា បន្ទាប់ពីការប្រកួតបើកឆាកទទួលបានជ័យជម្នះដោយលទ្ធផល ៤-១ លើក្រុមយុវជននេប៉ាល់ កាលពីថ្ងៃសៅរ៍ ទី២១ ខែកញ្ញា ប៉ុន្តែជាការប្រកួតលើកទី១របស់ក្រុមយុវជនអ៊ូបេគីស្ថាន។

អ៊ូបេគីស្ថាន ជាក្រុមការពារតំណែងជើងឯកឆ្នាំចាស់ដែលពួកគេបានឈ្នះកាលពីឆ្នាំ២០២៣ ដូច្នេះជាការប្រកួតដ៏លំបាកបំផុតសម្រាប់ក្រុមកម្ពុជា។ ជាពិសេសទៀតនោះ ពួកគេមានកម្លាំងស៊ុហ្វពេញល្អ ខុសពីកម្ពុជាដែលបានចំណាយកម្លាំងអស់១ប្រកួតហើយ។

គិតតារាងពិន្ទុបណ្តោះអាសន្ននៅក្នុងពូល B កម្ពុជាមាន៣ពិន្ទុ កំពុងឈរលើកំពូលតារាង ហើយបារ៉ែន មាន៣ពិន្ទុ ស្ថិតនៅលេខ២ បន្ទាប់ពីយកឈ្នះម្ចាស់ផ្ទះឆាយនិសតៃប៊ិ នៅចុងម៉ោងដោយលទ្ធផល ១-០។ អ៊ូបេគីស្ថាន ស្ថិតនៅលេខ៣ ហើយឆាយនីសតៃប៊ិ លេខ៤ និងនេប៉ាល់លេខ៥។

លើកទី២ហើយដែលបុរសសញ្ជាតិជប៉ុនបានដឹកនាំក្រុមយុវជនកម្ពុជាក្នុងវគ្គជម្រុះពានរង្វាន់ AFC U20 Asian Cup បន្ទាប់ពីដឹកនាំលើកទី១ កាលពីឆ្នាំ២០២០។ លោកបានបង្កើតប្រវត្តិសាស្ត្រជាលើកដំបូងដោយបានឆ្លងផុតវគ្គជម្រុះក្នុងពូល និងបានឡើងទៅជុំផ្តាច់ព្រ័ត្រ។ ឆ្លងកាត់៤ប្រកួត ក្រុម U20 កម្ពុជា បានយកឈ្នះ ថៃ ២-១, ឈ្នះព្រុយណេ ៣-០, ឈ្នះ កោះម៉ារីណាខាងជើង ៩-០ និងចាញ់ ម៉ាឡេស៊ី ៤-៥ ដើម្បីក្លាយជាក្រុមលេខ២ល្អបំផុតក្នុងពូលបានឡើងទៅជុំផ្តាច់ព្រ័ត្រ។

កាលពីខែមិថុនា ឆ្នាំ២០២៤ លោក Koji Gyotoku បានដឹកនាំក្រុមយុវជនកម្ពុជាអាយុ១៦ឆ្នាំធ្វើបានល្អមែនទែន វគ្គសន្សំពិន្ទុក្នុងពូលពានរង្វាន ASEAN U-16 Boys Championship នៅប្រទេសឥណ្ឌូណេស៊ី។ ក្រុម U16 កម្ពុជាមិនចាញ់សោះក្នុងការប្រកួតសន្សំពិន្ទុ៣លើកគឺឈ្នះ មីយ៉ាន់ម៉ា ២-១, ឈ្នះ ព្រុយណេ ៦-០ និង ស្មើ វៀតណាម ១-១ ប៉ុន្តែមិនបានឡើងវគ្គពាក់កណ្តាលផ្តាច់ព្រ័ត្រ ដោយសារចាញ់គ្រាប់បាល់វៀតណាម ដែលមាន៧ពិន្ទុស្មើគ្នា។ នៅពូលផ្សេង ថៃ និងអូស្ត្រាលី ក៏មាន៧ពិន្ទុ ស្មើនឹងកម្ពុជាដែរ។

ការប្រកួតជម្រុះក្នុងពូល ពានរង្វាន់ AFC U20 Asian Cup នេះ គឺមាន១០ពូល ដែលក្រុមលេខ១ក្នុងពូលចំនួន១០ និងក្រុមលេខ២ល្អបំផុតក្នុងពូលចំនួន៥ សរុប ១៥ក្រុមឡើងទៅជុំចុងក្រោយ បូករួមទាំងម្ចាស់ផ្ទះចិនត្រូវជា១៦ក្រុម៕