កីឡា

ខ្សែប្រយុទ្ធ Teerasil ថា ល្ងាចនេះជាឱកាសដ៏ល្អយក៣ពិន្ទុពីព្រះខ័នរាជស្វាយរៀង

បានផុស

១ នាទី មុន

នៅ

ថ្ងៃពុធ ២៥ កញ្ញា ២០២៤

ដោយ

ខ្សែប្រយុទ្ធចាស់វស្សា Teerasil Dangda ចាត់ទុកការប្រកួតរបស់ BG Pathum United ជាមួយព្រះខ័នរាជស្វាយរៀង វេលាម៉ោង៦ល្ងាចនេះជាឱកាសដ៏ល្អសម្រាប់ទទួលបាន៣ពិន្ទុក្នុងផ្ទះរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់ប្រធានក្រុមបាល់ទាត់ជម្រើសជាតិថៃនៅក្នុងសន្និសីទសារព័ត៌មានកាលពីថ្ងៃទី២៤ ខែកញ្ញា ឆ្នាំ២០២៤ បន្ទាប់ពីក្រុមរបស់ខ្លួន BG Pathum United ទទួលបាន១ពិន្ទុប៉ុណ្ណោះពីការប្រកួតបើកឆាកស្មើជាមួយក្រុមម្ចាស់ផ្ទះឥណ្ឌូណេស៊ី PSM Makassar ដោយលទ្ធផល ១-១ កាលពីថ្ងៃទី២១ ខែសីហា ឆ្នាំ២០២៤។ ស្របពេលជាមួយគ្នានេះ ព្រះខ័នរាជស្វាយរៀងទទួលបាន៣ពិន្ទុ ពីការប្រកួតបើកឆាកយកឈ្នះលើក្រុមម្ចាស់ផ្ទះម៉ាឡេស៊ី Terengganu ដោយលទ្ធផល ៣-២។

ខ្សែប្រយុទ្ធវ័យ៣៦ឆ្នាំ Teerasil Dangda បាននិយាយថា ៖«នេះជាឱកាសដ៏ល្អ ឱកាសធំសម្រាប់ក្រុមយើងទទួលបាន៣ពិន្ទុលើកដំបូងនៅក្នុងផ្ទះរបស់យើង។ យើងទាំងអស់គ្នាបានត្រៀមខ្លួនរួចរាល់ហើយ ហើយនឹងប្រឹងប្រែងឲ្យអស់ពីសមត្ថភាពដើម្បីទទួលបានជ័យជម្នះ»។

ក្រុមខ្លាំងថៃ BG Pathum United មិនបានសម្រាកច្រើនទេសម្រាប់ការប្រកួតជាមួយព្រះខ័នរាជស្វាយរៀង។ ពួកគេទើបតែប្រកួតកាលពីថ្ងៃអាទិត្យទី២២ ខែកញ្ញា ដែលទទួលបានជ័យជម្នះ ២-១ លើក្រុមខ្លាំង Port FC ក្នុងលីគកំពូលថៃ ដូច្នេះពួកគេមានពេលវេលាសម្រាកត្រៀមខ្លួនត្រឹមតែ២ថ្ងៃប៉ុណ្ណោះ។

ទោះបីជាយ៉ាងណា បុរសសញ្ជាតិជប៉ុន 𝗠𝗮𝗸𝗼𝘁𝗼 𝗧𝗲𝗴𝘂𝗿𝗮𝗺𝗼𝗿𝗶 គ្រូបង្វឹក BG Pathum United បាននិយាយថា ជ័យជម្នះកាលពីថ្ងៃអាទិត្យគឺជាកម្លាំងចិត្តដ៏សំខាន់សម្រាប់ការប្រកួតជាមួយព្រះខ័នរាជស្វាយរៀង។ ទោះបីមានពេលវេលាសម្រាកតែ២ថ្ងៃ តែក្រុមរបស់លោកមានគុណភាពខ្ពស់អាចស្វែងរកជ័យជម្នះបានល្ងាចនេះ។

ក្រុមថៃមួយនេះសំបូរដោយកីឡាករល្អៗដូចជាខ្សែប្រយុទ្ធចាស់វស្សា Teerasil Dangda និងខ្សែបម្រើដ៏ល្បីល្បាញ Chanathip Songkrasin ដែលជាអ្នកបង្កគ្រោះថ្នាក់ខ្លាំង។ ជាមួយគ្នានេះ ពួកគេមានកីឡាករបរទេសរហូតដល់ទៅ១០នាក់នៅក្នុងបញ្ជីក្នុងនោះមានទាំងខ្សែការពារ ខ្សែបម្រើ និងខ្សែប្រយុទ្ធ ប្រៀបធៀបជាមួយព្រះខ័នរាជស្វាយរៀងមានកីឡាករបរទេសតែ៦នាក់ប៉ុណ្ណោះ។