កីឡា

Son រិះគន់ការបង្កើនចំនួនការប្រកួតច្រើនហើយថាកីឡាករមិនមែនមនុស្សយន្ត

បានផុស

៤ ខែ មុន

នៅ

ថ្ងៃសុក្រ ២៧ កញ្ញា ២០២៤

ដោយ

ប្រធានក្រុម Tottenham Hotspur កីឡាករ Son Heung-min ជាកីឡាករចុងក្រោយគេដែលបង្ហាញពីការព្រួយបារម្ភជុំវិញសហព័ន្ធកីឡាបាល់ទាត់ទ្វីបអឺរ៉ុប (UEFA) សម្រេចប្រើប្រាស់រូបមន្ដថ្មីបង្កើនការប្រកួតកាន់តែច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងរបស់ Son បន្ទាប់ពីកីឡាករ Manuel Akanji និង Rodri របស់ក្លិប Manchester City ក៏ដូចជាអ្នកចាំទី Allison របស់ Liverpoolបានប្រតិកម្ម ចំពោះការសម្រេចចិត្តក្នុងការផ្លាស់ប្តូររូបមន្ដថ្មី។

កីឡាករ Son បាននិយាយថា៖«យើងមិនមែនជាមនុស្សយន្តទេ។ ខ្ញុំគិតថា យើងត្រូវតែពិចារណាឡើងវិញ ហើយត្រូវតែកាត់បន្ថយការប្រកួតខ្លះ ហើយបង្កើនគុណភាពនៃការប្រកួតជាងមុន។ នេះជាអ្វីដែលគួរគិតឡើងវិញ។ វាពិតជាការមានប្រកួតច្រើន ការធ្វើដំណើរច្រើន ពីព្រោះយើងត្រូវការពេលថែរក្សាខ្លួន ពេលខ្លះរបួស ពេលខ្លះមានបញ្ហាផ្លូវចិត្ត ពេលអ្នកមិនទាន់ត្រៀមខ្លួនរួចរាល់ តើអ្នកបង្ហាញខ្លួននៅលើទីលានដោយមានគុណភាពបែបណា»។

ការលើកឡើងបែបនេះរបស់ កីឡាករ Son Heung-min ក្រោយកីឡាករជាច្រើនបានរបួស។ ពួកគេមិនមានពេលសម្រាកគ្រប់គ្រាន់ ហើយត្រូវមានភារកិច្ចជាមួយជម្រើសជាតិថែមទៀត។

Son Heung-min បានបន្ថែមថា៖«ក្នុងនាមជាអ្នកគាំទ្របាល់ទាត់ អ្នកចង់ឃើញការប្រកួតដែលមានគុណភាព មិនមែនជាការប្រកួតច្រើននោះទេ ហើយអ្នកក៏មិនចង់ឃើញមនុស្ស ឬកីឡាករជួបបញ្ហារបួសនោះទេ»៕

ប្រែសម្រួល៖ ផា រតនា