កីឡា

ធឿន ធារ៉ា, ធន់ រិទ្ធី, ឈឿ ល្វៃ និង ឡៅ ចន្ទ្រា ប៉ះគ្នាក្នុងពានរង្វាន់សម្តេចធិបតី

បានផុស

៥ ខែ មុន

នៅ

ថ្ងៃសុក្រ ៤ តុលា ២០២៤

ដោយ

ជើងខ្លាំងគុនខ្មែរទម្ងន់លើ៧២គីឡូក្រាមត្រូវជួបគ្នាដណ្តើមមេដាយមាសក្នុងព្រឹត្តិការណ៍យុទ្ធគុនចម្រុះបុរាណខ្មែរពានរង្វាន់សម្តេចធិបតីនៅថ្ងៃទី១៨-១៩-២០ ខែតុលា ឆ្នាំ២០២៤ នៅពហុកីឡដ្ឋានជាតិអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជើងខ្លាំងលំដាប់ទី១ ធឿន ធារ៉ា ភាគច្រើនប្រកួតក្នុងទម្ងន់៧២គីឡូក្រាមបានឡើងទៅប្រកួតទម្ងន់៧៥គីឡូក្រាម។ អ្នកលេងកែងពិឃាត ឈឿង ល្វៃ ភាគច្រើនប្រកួតក្នុងទម្ងន់៧២គីឡូក្រាមក៏បានឡើងទៅប្រកួតក្នុងទម្ងន់៧៥គីឡូក្រាមដែរ។

ជាមួយគ្នានេះ ឡៅ ចន្ទ្រា និង ធន់ រិទ្ធី ក៏កំពុងឡើងទម្ងន់ស្រាប់ ដូច្នេះពួកគេហាក់មិនពិបាកក្នុងការធ្វើឲ្យទម្ងន់ឲ្យត្រឹមនឹង៧៥គីឡូក្រាមឡើយ។ ដូច្នេះអ្នកទាំងពីរត្រូវប្រជែងគ្នាដើម្បីមេដាយមាស និងប្រាក់រង្វាន់យ៉ាងច្រើន។

បច្ចុប្បន្ន ធឿន ធារ៉ា អាចត្រូវបានចាត់ទុកជាកីឡាករឈរលំដាប់កំពូលក្នុងទម្ងន់ក្រោម៧២គីឡូក្រាម។ ជាមួយនឹងកាយសម្បទាល្អ កណ្តាប់ដៃធ្ងន់ និងទាត់ក៏ធ្ងន់គឺជាបេក្ខភាពឈានមុខគេក្នុងការប្រជែងមេដាយមាស។

ទោះបីជាយ៉ាងណា ការប្រកួតនេះអាចមិនសូវល្អមើល ពីព្រោះការប្រកួតមានតែ២ទឹក ហើយក្នុង១ទឹកមាន២នាទី។ ការប្រកួតភាគច្រើនផ្តោតលើបច្ចេកទេសជាជាងអាវុធសាហាវ ឬគ្រោះថ្នាក់ខ្លាំង។

ព្រឹត្តិការណ៍នេះក៏អាចជាឱកាស ធឿន ធារ៉ា សាងស្នាដៃ និងកេរ្តិ៍ឈ្មោះមួយកម្រិតទៀត ពីព្រោះគណៈកម្មការចំពោះកិច្ចដែលទទួលបន្ទុករៀបចំការប្រកួតគ្រោងស្នើទៅរាជរដ្ឋាភិបាលដើម្បីបង្កើត«ងាស្តេចយុទ្ធគុនចម្រុះបុរាណខ្មែរ»ដែលមានរយៈពេល១០ឆ្នាំម្តង។

សូមបញ្ជាក់ថា ព្រឹត្តិការណ៍ប្រកួតយុទ្ធគុនចម្រុះបុរាណខ្មែរ ជ័យលាភីមេដាយមាសទទួលបានប្រាក់រង្វាន់៣០០០ដុល្លារ មេដាយប្រាក់ទទួលបាន២០០០ដុល្លារ និងមេដាយសំរិទ្ធ១០០០ដុល្លារ។ ជាមួយគ្នានេះ ក៏នឹងមានពានរង្វាន់អត្តពលិកឆ្នើមប្រចាំវិញ្ញាសានីមួយៗដែលទទួលបានពីសម្តេចធិបតីនាយករដ្ឋមន្ត្រីនៃកម្ពុជាថែមទៀត៕