Joshua ធ្លាក់មកលេខ៧ពិភពលោក ក្រោយសន្លប់ក្រោមថ្វីដៃ Dubois

ការបរាជ័យក្រោមថ្វីដៃរបស់កីឡាករ Daniel Dubois នៅទឹកទី៥ បានធ្វើឲ្យប៉ះពាល់ដល់អាជីពរបស់អតីតជើងឯកប្រដាល់ទម្ងន់ធ្ងន់ពិភពលោក Anthony Joshua យ៉ាងខ្លាំង។

Anthony Joshua ដែលហៅកាតរ់ថា “AJ” ត្រូវបានរាប់៤លើក ក្នុងការប្រកួតជាមួយ កីឡាករ Daniel Dubois ក្នុងនោះទឹកទី១ រាប់១លើក, ទឹកទី៣ រាប់១លើក, ទឹកទី៤ រាប់២លើក និងទឹកទី៥ ត្រូវបានអាជ្ញាកណ្ដាលបញ្ឈប់ ក្រោយសន្លប់ក្រោមកណ្ដាប់ដៃរបស់កីឡាករ Dubois។ ការបរាជ័យដ៏ធ្ងន់ធ្ងរនេះបានជះឥទ្ធិពលដល់ចំណាត់ថ្នាក់អ្នកប្រដាល់ទម្ងន់ធ្ងន់ពិភពលោករូប​នេះ។

មុនពេលការប្រកួតជាដណ្ដើមខ្សែក្រវាត់ជាមួយមួយ Dubois កីឡាករ Joshua ឈរនៅលេខ៣ ក្នុងតារាងចំណាត់ថ្នាក់អ្នកប្រដាល់ទម្ងន់ធ្ងន់ពិភពលោករៀបចំដោយ The Ring បន្ទាប់ពីការទទួលជ័យជម្នះចំនួន៤ដងជាប់គ្នារបស់ Joshua។ ទោះបីជាយ៉ាងណា បន្ទាប់ពីចាញ់ក្រោម Dubois នៅចំពោះមុខអ្នកទស្សនាជាង៩៦,០០០ នាក់ នៅកីឡដ្ឋាន Wembley ទីក្រុងឡុងដ៍ អ្នកប្រដាល់អង់គ្លេស កីឡាករ Joshua បានធ្លាក់ចុះមកនៅចំណាត់ថ្នាក់ទី៧ ក្នុងតារាង The Ring ជាចំណាត់ទាបបំផុតរបស់រូបគេក្នុងឆ្នាំ២០២៤ ។

ចំពោះចំណាត់ថ្នាក់នៅស្ថាប័ន WBO កីឡាករ Joshua បានធ្លាក់ចុះមកនៅចំណាត់ថ្នាក់ទី៦ ប៉ុន្ដែចំណាត់ថ្នាក់នៅស្ថាប័ន WBA រូបគេគឺបាត់ក្នុងបញ្ជីឈ្មោះកីឡាករកំពួលទាំង១៥នាក់របស់ពិភពលោកតែម្ដង។

ចំណែកកីឡាករ​វ័យ២៧ឆ្នាំ​ កីឡាករ​ Dubois ដែល​មាន​រហស្សនាម​ថា Dynamite បានឡើងទៅឈរនៅក្នុងចំណាត់ថ្នាក់លេខ​២ ​ក្នុងតារាងចំណាត់ថ្នាក់អ្នកប្រដាល់ទម្ងន់ធ្ងន់ពិភពលោកដែលរៀបចំដោយ The Ring៕

ប្រែសម្រួល៖ ផា រតនា