កីឡា

ព្រឹត្តិការណ៍កីឡាសំខាន់ចំនួន៥នៅកម្ពុជាក្នុងខែតុលានេះ

បានផុស

៥ ខែ មុន

នៅ

ថ្ងៃចន្ទ ៧ តុលា ២០២៤

ដោយ

នៅខែតុលា ឆ្នាំ២០២៤នេះ មានព្រឹត្តិការណ៍កីឡាសំខាន់ចំនួន៥ផ្សេងគ្នាត្រូវរៀបចំការប្រកួតនៅពហុកីឡដ្ឋានជាតិ រាជធានីភ្នំពេញ ប្រទេសកម្ពុជា និងតាមខេត្តមួយចំនួនទៀត។

ទី១. ការប្រកួតកីឡាឃីកបុកស៊ីងជើងឯកអាស៊ី ឆ្នាំ២០២៤

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសកម្ពុជាបានទទួលសិទ្ធិរៀបចំការប្រកួតឃីកបុកស៊ីងជ្រើសរើសជើងឯកអាស៊ី ចាប់ពីថ្ងៃទី៧ ដល់ទី១៣ ខែតុលា ដែលមានប្រទេសចំនួន២២មកពីទូទាំងទ្វីបអាស៊ីចូលរួមប្រកួត។ ក្នុងនាមជាម្ចាស់ផ្ទះ កម្ពុជាបានត្រៀមកីឡាករ កីឡាករជាង៥០នាក់សម្រាប់ការប្រជែងមេដាយជូនជាតិ ខណៈសរុបកីឡាករ កីឡាការិនីទាំងអស់ជាង៤០០នាក់។

ទី២. ការប្រកួតកីឡាបាល់ទាត់មិត្តភាពអន្តរជាតិ កម្ពុជា និង ឆាយនីស តៃប៊ិ

នៅថ្ងៃ FIFA Day ក្រុមបាល់ទាត់ជាតិជម្រើសជាតិកម្ពុជា នឹងប្រកួតមិត្តភាពអន្តរជាតិ ជាមួយឆាយនីស តៃប៊ិ នាថ្ងៃទី១១ ខែតុលា នៅពហុកីឡដ្ឋានជាតិអូឡាំពិក ក្រោមការដឹកនាំរបស់គ្រូបង្វឹកថ្មីលោក Koji Gyotoku មុនពេលលោកត្រូវដឹកនាំក្រុមកម្ពុជាទៅប្រកួតមិត្តភាពអន្តរជាតិជាមួយម្ចាស់ផ្ទះ ហុងកុង នៅថ្ងៃទី១៥ ខែតុលា។

ទី៣. ការប្រកួតជម្រុះជើងឯកយុវជនអាស៊ីអាយុ១៧ឆ្នាំ

ចប់ការប្រកួតមិត្តភាពអន្តរជាតិសម្រាប់ក្រុមធំភ្លាម លោក Koji Gyotoku ត្រូវបន្តភារកិច្ចកាន់តែធ្ងន់ដោយដឹកនាំក្រុមបាល់ទាត់កម្ពុជាអាយុក្រោម១៧ឆ្នាំ (U17) ប្រកួតជម្រុះជើងឯកអាស៊ីអាយុក្រោម១៧ឆ្នាំ AFC U17 Asian Cup សម្រាប់ពូល B នៅពហុកីឡដ្ឋានជាតិអូឡាំពិក រាជធានីភ្នំពេញ ចាប់ពីថ្ងៃទី១៩ ដល់ទី២៧ ខែតុលា ដែលមានម្ចាស់ផ្ទះកម្ពុជា អាហ្វហ្គានីស្ថាន បង់ក្លាដែស ហ្វីលីពីន និង ម៉ាកាវ។

ទី៤. ការប្រកួតកីឡាយុទ្ធគុនចម្រុះបុរាណខ្មែរពានរង្វាន់សម្តេចធិបតី

ព្រឹត្តិការណ៍ប្រកួតកីឡាយុទ្ធគុនចម្រុះបុរាណខ្មែរពានរង្វាន់សម្តេចធិបតី លើកទី១ នៅថ្ងៃទី១៨-១៩-២០ ខែតុលា ឆ្នាំ២០២៤ នៅពហុកីឡដ្ឋានជាតិអូឡាំពិក។ កីឡាដែលជាអត្តសញ្ញាណខ្មែរមានដូចជា គុនល្បុក្កតោ យុទ្ធក្រមខម គុនខ្មែរ គុនចម្រុះ គុនចំបាប់ ខ្លាក្រាប ក្រពើហា ស្រង៉ែពែន និង ក្បាច់គុនកងយោធពលខេមរភូមិន្ទ។

ទី៥. កីឡាជាតិ លើកទី៤ និងកីឡាជាតិជនពិការលើកទី២

កម្ពុជានឹងរៀបចំការប្រកួតកីឡាជាតិ លើកទី៤ និងកីឡាជាតិជនពិការ លើកទី២ ចាប់ពីថ្ងៃទី៣០ ខែតុលា ដល់ទី៨ ខែវិច្ឆិកា ឆ្នាំ២០២៤។ កីឡាជាតិ លើកទី៤ កីឡាចំនួន៣៦ប្រភេទ លើ២៨៣វិញ្ញាសា ខណៈកីឡាជាតិជនពិការមាន កីឡា៧ប្រភេទ លើ៤៤វិញ្ញាសា។ ពិធីបើក និងបិទប្រារព្ធនៅពហុកីឡដ្ឋានជាតិ ហើយទីតាំងប្រកួតមានខេត្តកែប ព្រះសីហនុ កំពង់ឆ្នាំង ស្វាយរៀង និងទីលានប្រកួតជាច្រើនទៀតក្នុងរាជធានីភ្នំពេញ៕

អត្ថបទ៖ វីរបុត្រ