កីឡា

ថ្ងៃអាទិត្យនេះ ធន់ ផានិត ប៉ះ Asahi ម្ចាស់ខ្សែក្រវាត់៦ខ្សែ នៅទឹកដីជប៉ុន

បានផុស

២ ខែ មុន

នៅ

ថ្ងៃសុក្រ ១១ តុលា ២០២៤

ដោយ

អ្នកលេងគុនខ្មែរ ធន់ ផានិត បានធ្វើដំណើរទៅដល់ប្រទេសជប៉ុនហើយដើម្បីប្រកួតជាមួយកីឡាករម្ចាស់ផ្ទះ Asahi Shinagawa នៅថ្ងៃអាទិត្យ ទី១៣ ខែតុលា ឆ្នាំ២០២៤។

កីឡាករ Asahi ដែលមានអាយុ២២ឆ្នាំ និងកម្ពស់១.៦៨ម៉ែត្រ របស់ក្លិប Eiwa Sports Gym មានកំណត់យ៉ាងល្អក្នុងរយៈពេលប៉ុន្មានឆ្នាំចុងក្រោយនេះ។ រូបគេមានជំនាញឃីកបុកស៊ីង និងមួយថៃ ដែលបានចាប់ផ្តើមអាជីពប្រដាល់តាំងពីឆ្នាំ២០១៣។ រូបគេជាកីឡាករជោគជ័យក្នុងការឡើងសង្វៀនធំៗនៅប្រទេសជប៉ុន និងថៃ រួមទាំងសង្វៀន ONE Championship។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចន្លោះឆ្នាំ២០១៣-២០១៥ កីឡាករ Asahi បានប្រឡូកក្នុងការប្រកួតស្ម័គ្រចិត្តដែលទទួលបានជើងឯក១០លើក។ ឆ្នាំ២០១៣ រូបគេបានឈ្នះជើងឯកសង្វៀន BigBang ទម្ងន់៣១គីឡូក្រាម។ ឆ្នាំ២០១៤ រូបគេបានឈ្នះជើងឯកទម្ងន់៤០គីឡូក្រាមនៅសង្វៀន Windy Sports និងសង្វៀន BOM។ នៅឆ្នាំ២០១៥ រូបគេបានឈ្នះជើងឯក៣ទៀតគឺ ជើងឯក DBS Kids Tournament ទម្ងន់៤០គីឡូក្រាម និងជើងឯក MA Kids Tournament ទម្ងន់៤២គីឡូក្រាម។ ឆ្នាំ២០១៦ ជាឆ្នាំចុងក្រោយនៃការប្រកួតស្ម័គ្រចិត្ត រូបគេបានឈ្នះជើងឯកដល់៦ផ្សេងគ្នាគឺ ជើងឯក Mauy Thai Open ទម្ងន់៤៥គីឡូក្រាម, ជើងឯក BigBang ទម្ងន់៤៥គីឡូក្រាម, ជើងឯក Muay Thai Open ទម្ងន់៥០គីឡូក្រាម, ជើងឯក UKF Junior ទម្ងន់៥០គីឡូក្រាម និងជើងឯក BOM ទម្ងន់៥០គីឡូក្រាម។

រូបគេបានប្រកួតអាជីព៣៩ដងគឺ ឈ្នះ២៩ និងចាញ់១០។ ៥ប្រកួតដំបូងក្នុងការប្រកួតអាជីព រូបគេទទួលបានជ័យជម្នះតែម្តងគត់ ប៉ុន្តែចាញ់៤ដង។ ទោះបីជាយ៉ាងណា ចាប់តាំងពីបានឈ្នះខ្សែក្រវាត់ពិភពលោក IPCC នៅខែកញ្ញា ឆ្នាំ២០២២មកគឺរូបគេមិនដែលចាញ់សោះរហូតដល់បច្ចុប្បន្ន។

សមិទ្ធផលធំៗក្នុងការប្រឡូកប្រដាល់អាជីពគឺឈ្នះខ្សែក្រវាត់៦ខ្សែ។ រូបគេបានឈ្នះខ្សែក្រវាត់មួយថៃពិភពលោក WBC នៅថ្ងៃទី៩ ខែកុម្ភៈ ឆ្នាំ២០២០ បន្ទាប់ពីផ្តួលកីឡាករថៃ Sing Udom តាមរយៈការផ្តួលឲ្យសន្លប់ក្នុងទឹកទី២ នៅប្រទេសជប៉ុន។

ខ្សែក្រវាត់ទី២គឺ IMC ដែលជាខ្សែក្រវាត់ក្រុមប្រឹក្សាមួយថៃអន្តរជាតិ បន្ទាប់ពីរូបគេបានឈ្នះពិន្ទុកីឡាករថៃ Jomrawee Fefinas នៅខែធ្នូ ឆ្នាំ២០២២ ខណៈខ្សែក្រវាត់ទី៣គឺ IPCC ដែលជាខ្សែក្រវាត់ ក្រុមប្រឹក្សាគីឡាប្រយុទ្ធអាជីពអន្តរជាតិ បន្ទាប់ពីបានឈ្នះកីឡាករថៃ Peym Baraikankendon តាមរយៈការផ្តួលឲ្យសន្លប់នៅខែកញ្ញា ឆ្នាំ២០២២។ ខ្សែក្រវាត់ទី៤ WMC ដែលជាខ្សែក្រវាត់ក្រុមប្រឹក្សាមួយថៃពិភពលោក កម្រិតអាស៊ី បន្ទាប់ពីរូបគេបានយកឈ្នះកីឡាករថៃ Superman Banchaamek នៅខែធ្នូ ឆ្នាំ២០២៣ ព្រមទាំងឈ្នះខ្សែក្រវាត់ឃីកបុកស៊ីងជប៉ុន (MAJKF) ឆ្នាំ២០២១ និងខ្សែក្រវាត់សង្វៀន Lumpinee ប្រចាំប្រទេសជប៉ុន (LPNJ) ឆ្នាំ២០១៩។

ការប្រកួតរវាង ធន់ ផានិត និង Asahi លក្ខណៈមួយថៃដែលវ៉ៃ៥ទឹក ក្នុង១ទឹកមាន៣នាទី។

តម្លៃសំបុត្រសម្រាប់ចូលទស្សនាការប្រកួតនេះមាន៣ប្រភេទ។ កម្រិតទី១ (VIP) មានតម្លៃ ៣០ ០០០យ័ន (២១១ដុល្លារ) កម្រិតទី២ តម្លៃ ១៣០០០យ័ន (៩១ដុល្លារ) និងកម្រិតទី៣ ៧០០០យ័ន (៤៩ដុល្លារ)។

ស្ថិតិ១០ប្រកួតចុងក្រោយ

ផ្តួលកីឡាករថៃ Chaiyakorn ឲ្យសន្លប់ក្នុងទឹកទី១ នៅសង្វៀន Rajaddamnern ខែកក្កដា ឆ្នាំ២០២៤
ឈ្នះកីឡាករអ៊ូបេគីស្ថាន Nur Mohammad ដោយពិន្ទុ នៅសង្វៀន Rajaddamnern ខែមិថុនា ឆ្នាំ២០២៤
ផ្តួលកីឡាករថៃ Petchwaewaw ឲ្យសន្លប់ទឹកទី១ Rajaddamnern ខែមីនា ឆ្នាំ២០២៤
ផ្តួលកីឡាករថៃ Surasak Krudam ឲ្យសន្លប់ក្នុងទឹកទី២ នៅសង្វៀន TOP Brights 1 ខែមករា ឆ្នាំ២០២៤
ផ្តួលកីឡាករថៃ Superman Banchamek ឲ្យសន្លប់ក្នុងទឹកទី២ នៅសង្វៀន Rajaddamnern ខែធ្នូ ឆ្នាំ២០២៣
ផ្តួលកីឡាករថៃ Narit Sor Somnuk ឲ្យសន្លប់ក្នុងទឹកទី២ នៅសង្វៀន BOM 45 ខែវិច្ឆិកា ឆ្នាំ២០២៣
ផ្តួលកីឡាករថៃ Bokbon LB ឲ្យសន្លប់ក្នុងទឹកទី១ នៅសង្វៀន BOM 44 ខែតុលា ឆ្នាំ២០២៣
ផ្តួលកីឡាករថៃ Muangphet Rachanon ឲ្យសន្លប់ក្នុងទឹកទី១ នៅសង្វៀន BOM 43 ខែសីហា ឆ្នាំ២០២៣
ឈ្នះកីឡាករព័រទុយហ្គាល់ Rui Botelho ដោយពិន្ទុ នៅសង្វៀន ONE ខែវិច្ឆិកា ឆ្នាំ២០២២
ផ្តួលកីឡាករថៃ Peym Baraikankendon ឲ្យសន្លប់ក្នុងទឹកទី៤ នៅសងៀន Ouroboros ខែកញ្ញា ឆ្នាំ២០២៣