កីឡា

ប៉ះចិនថ្ងៃស្អែក ឥណ្ឌូណេសុីរំពឹងបាន៣ពិន្ទុដំបូងវគ្គជម្រុះ World Cup ជុំទី៣

បានផុស

៦ ខែ មុន

នៅ

ថ្ងៃចន្ទ ១៤ តុលា ២០២៤

ដោយ

ក្រុមបាល់ទាត់ជម្រើសជាតិឥណ្ឌូណេសុីត្រូវជួបជាមួយក្រុមបាល់ទាត់ជម្រើសជាតិចិន សម្រាប់ការប្រកួតទី៤ ក្នុងពូល C វគ្គជម្រុះជុំទី៣ ពានរង្វាន់ World Cup ប្រចាំតំបន់អាសុី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឥណ្ឌូណេសុីជាក្រុមអាស៊ានតែមួយគត់ ដែលបានឡើងដល់វគ្គជម្រុះជុំទី៣ ក្នុងពានរង្វាន់បាល់ទាត់ពិភពលោកឆ្នាំ២០២៦ ក្នុងតំបន់អាសុី។ រឿងដ៏គួរឲ្យភ្ញាក់ផ្អើលក្រុមនេះចាប់ផ្ដើម៣ប្រកួតដំបូងទល់នឹងក្រុមខ្លាំងៗ មិនទាន់ស្គាល់បរាជ័យសោះ គឺស្មើទាំង៣ដង រកបាន៣ពិន្ទុ។

ការប្រកួតជាមួយក្រុមជម្រើសជាតិចិន ក្រុមឥណ្ឌូណសុី រំពឹងរកបាន៣ពិន្ទុលើកដំបូង ដើម្បីរក្សាឱកាសក្នុងការប្រជែងឡើងទៅជុំចុងក្រោយ World Cup ឆ្នាំ២០២៦។ ៣ប្រកួតកន្លងទៅ ចិនជាក្រុមតែមួយគត់មិនទាន់រកបានពិន្ទុសោះ។ ក្រុមម្ចាស់ផ្ទះចិនអាចនឹងពិបាកក្នុងការប្រកួតទល់ជាមួយក្រុមឥណ្ឌូណេសុី ដោយសារក្រុមអាស៊ានមួយនេះកំពុងធ្វើបានល្អ។

ប្រវត្តិជួបគ្នា៣កន្លងមកគិតតាំងពីឆ្នាំ២០០៤ គឺចិនឈ្នះ២ និងស្មើ១ ប៉ុន្តែបើក្រឡែកមើលពីកម្រិតរបស់ក្រុមទាំង២ នាពេលបច្ចុប្បន្នជាមួយលទ្ធផល៣ប្រកួតចុងក្រោយគឺ ឥណ្ឌូណេសុីមានទម្រង់ល្អជាង។

ការប្រកួតវគ្គជម្រុះទី៣ ក្រុមឈរលេខ១និងលេខ២ ក្នុងពូលនឹងឡើងទៅជុំចុងក្រោយក្នុងការប្រកួតពានរង្វាន់ World Cup ឆ្នាំ២០២៦ ខណៈក្រុមលេខ៣និងលេខ៤ ត្រូវបន្ដធ្វើការប្រកួតនៅវគ្គជម្រុះជុំទី៤ ដើម្បីស្វែងរកឱកាសឡើងទៅជុំចុងក្រោយ៕