កីឡា

ឯកឧត្តម ឌី វិជ្ជា ចូលរួមប្រជុំដើម្បីរកដំណោះស្រាយករណីក្លិបទ័ព

បានផុស

២ ខែ មុន

នៅ

ថ្ងៃចន្ទ ១៤ តុលា ២០២៤

ដោយ

នាព្រឹកថ្ងៃទី១៤ ខែតុលា ឆ្នាំ២០២៤ ឯកឧត្ដម ឌី វិជ្ចា ប្រធានក្លិបបាល់ទាត់ព្រះខ័នរាជស្វាយរៀង បានចូលរួមកិច្ចប្រជុំជាមួយ លោក Peter Koo ជានាយកប្រតិបត្តិក្រុមហ៊ុន CPL និងអគ្គលេខាធិការសមាគមកីឡាបាល់ទាត់កងយោធពលខេមរភូមិន្ទ លោក ខូវ ឆាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំមានភាគីពាក់ព័ន្ធជាច្រើនចូលរួមក្នុងនោះ ក៏មានវត្តមានប្រធាននាយកដ្ឋានស្ដីទីអាជ្ញាកណ្ដាល ដើម្បីពិភាក្សាគ្នាស្វែងរកដំណោះស្រាយក្នុងនោះករណីបាល់ប៉ះដៃរបស់កីឡាករវិសាខាខ្លួនឯង ប៉ុន្តែអាជ្ញាកណ្ដាលឱ្យប៉េណាលទី។ ក្រោយមក សហព័ន្ធកីឡាបាល់ទាត់កម្ពុជា បានដាក់ពិន័យលើក្រុមក្រសួងការពារជាតិ ក្នុងនោះមានគ្រូបង្វឹក កីឡាករ និងបុគ្គលិក ដោយសារបង្ហាញសកម្មភាពមិនសមរម្យក្នុងអំឡុងការប្រកួតជាមួយក្លិបវិសាខា។

សហព័ន្ធកីឡាបាល់ទាត់កម្ពុជាបានទទួលស្គាល់ពីកំហុសរបស់អាជ្ញាកណ្តាលពីបាល់ប៉ះដៃរបស់កីឡាករវិសាខា និងបាល់ Offside មួយថែមទៀត ប៉ុន្តែសហព័ន្ធមិនបង្ហាញពីចំណាត់ការអ្វីលើអាជ្ញាកណ្តាលទេ។

ភ្លាមៗ ក្លិបក្រសួងការពារជាតិ បានចេញលិខិតជំទាស់នឹងការពិន័យទាំងនោះ ហើយបានស្នើសុំឲ្យមានការលុបចោលចំពោះការពិន័យមួយនេះ។ ក្លិបក្រសួងការពារជាតិបានសង្កត់ធ្ងន់ថា បើមិនមានដោះស្រាយណាមួយសមស្រប ចំពោះក្លិបទាំងមូលទេ នឹងសម្រេចចិត្តដកខ្លួនចេញពីការប្រកួតពានរង្វាន់ខេមបូឌានព្រីមៀរលីគ។

ក្រោយជួបបញ្ហាបែបនេះទើបនៅព្រឹកថ្ងៃទី១៤ ខែតុលា ឆ្នាំ២០២៤ ក៏មានកិច្ចប្រជុំមួយដែលចូលរួមដោយ ឯកឧត្ដម ឌី វិជ្ចា ក្នុងនាមជាសមាជិក១រូបរបស់ក្រុមហ៊ុនខេមបូឌានព្រីមៀរលីគ រួមទាំងលោក Peter Koo នាយកប្រតិបត្តិក្រុមខេមបូឌានព្រីមៀរលីគ និងអគ្គលេខាធិការរបស់សមាគមកីឡាបាល់ទាត់កងយោធពលខេមរភូមិន្ទ លោក ខូវ ឆាយ ដើម្បីរកដោះស្រាយរួមគ្នាមួយក្នុងការបញ្ចប់វិវាទដ៏ចម្រូងចម្រាស់របស់អាជ្ញារកណ្តាល និងសមាគមកីឡាបាល់ទាត់កងយោធពលខេមរភូមិន្ទ។

យ៉ាងណាមិញចំពោះលទ្ធផលនៃកិច្ចប្រជុំនេះ មិនទាន់បង្ហាញជាផ្លួវការនៅឡើយទេ ប៉ុន្តែចំពោះអ្នកគាំទ្របាល់ទាត់នៅប្រទេសកម្ពុជា រំពឹងថានឹងមានដោះស្រាយល្អ ដើម្បីបញ្ចប់លើបញ្ហាមួយនេះ៕