កីឡា

កម្ពុជាដាក់តាំងបង្ហាញ«សិលាចារឹកយុទ្ធគុនដូនតាខ្មែរ»៤ថ្ងៃនៅស្តាតអូឡាំពិក

បានផុស

៥ ខែ មុន

នៅ

ថ្ងៃពុធ ១៦ តុលា ២០២៤

ដោយ

គណៈកម្មការចំពោះកិច្ចដែលរៀបចំព្រឹត្តិការណ៍ប្រកួតយុទ្ធគុនចម្រុះបុរាណខ្មែរដាក់តាំងបង្ហាញ«អាថ៌កំបាំងយុទ្ធគុនដូនតាខ្មែរ»រយៈពេល៤ថ្ងៃនៅពហុកីឡដ្ឋានជាតិអូឡាំពិក រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជាបានឲ្យដឹងថា ៖«ពិព៌ណអាថ៌កំបាំងយុទ្ធគុនដូនតាខ្មែរគឺតាំងបង្ហាញសិលាចារឹក ចារប្រវត្តិមហាយុទ្ធគុនបុព្វបុរសដូនតាខ្មែរ។ សូមបងប្អូន ប្រជាពលរដ្ឋមកទស្សនា និងសិក្សាស្វែងយល់នៅពហុកីឡដ្ឋានជាតិអូឡាំពិក ចាប់ពីថ្ងៃទី១៧ ដល់ ២០ ខែតុលា ឆ្នាំ ២០២៤ តទៅ ដោយសេរី»។ ពិព៌ណអាថ៌កំបាំងយុទ្ធគុនដូនតាខ្មែរ ក៏បង្ហាញពីអតីតព្រះមហាក្សត្រខ្មែរអង្គណាដែលមានល្បីល្បាញ និងខ្លាំងពូកែខាងយុទ្ធគុនដើម្បីឲ្យប្រជាពលរដ្ឋខ្មែរបានដឹង។

ព្រឹត្តិការណ៍ប្រកួត«យុទ្ធគុនចម្រុះបរាណខ្មែរពានរង្វាន់សម្តេចធិបតី»គឺមានតែកីឡាអត្តសញ្ញាណជាតិដូចជា គុនល្បុក្កតោ យុទ្ធក្រមខម គុនខ្មែរ គុនចម្រុះ គុនចំបាប់ ខ្លាក្រាប ក្រពើហា ស្រង៉ែពែន និង ក្បាច់គុនកងយោធពលខេមរភូមិន្ទជាដើម។ ការប្រកួតនេះប្រើច្បាប់ និងលក្ខន្តិកៈថ្មី ហើយចៅក្រម-អាជ្ញាកណ្តាលក៏មិនមែនប្រើជំនាញមុនៗដូចជាគុនខ្មែរជាដើមមកប្រើប្រាស់ឡើយ ប៉ុន្តែគឺជាការប្រើប្រាស់ជំនាញថ្មីដោយផ្តោតលើបច្ចេកទេស។

«យុទ្ធគុនចម្រុះបរាណខ្មែរ»ផ្តួចផ្តើមឡើងដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាដោយមានគោលបំណងសំខាន់គឺជំរុញយុទ្ធគុនដូនតាខ្មែរឲ្យផុលផុស ការអភិរក្ស និងការអភិវឌ្ឍសិល្បៈក្បាច់បុរាណខ្មែរឲ្យមានបែបបទ ក្បួនច្បាប់ច្បាស់លាស់សម្រាប់អ្នកជំនាន់ក្រោយ។ ការប្រកួតមានរយៈពេល៣ថ្ងៃគឺថ្ងៃទី១៨-១៩-២០ ខែតុលា នៅពហុកីឡដ្ឋានជាតិអូឡាំពិក រាជធានីភ្នំពេញ៕