ក្រោយជោគជ័យបាល់ទាត់ ឥណ្ឌូណេស៊ី កំពុ​ង​ស្វែង​រក​​អត្តពលិក​កីឡា​ផ្សេង​ចូលសញ្ជាតិ

គណៈកម្មាធិការជាតិអូឡាំពិកឥណ្ឌូណេស៊ី​ កាល​ពី​សប្តាហ៍មុន​បាន​បង្ហាញ​ការ​ប្រឹង​ប្រែង​ក្នុង​ការ​ស្វែង​​អត្តពលិក​​កីឡា​ផ្សេង​ៗ​​ដែលមានទេពកោសល្យ​នៅ​ក្រៅ​ប្រទេស​​ឲ្យ​ចូល​សញ្ជាតិ​របស់​ខ្លួន​ ដើម្បីជួយប្រទេសនេះបង្កើន​សមិទ្ធផល​នៅព្រឹត្តិការណ៍​កីឡា​អូឡាំពិក។

កីឡាករដែលមានដើមកំណើត​ក្រៅ​ប្រទេស​ បច្ចុប្បន្នស្ទើរមានពាកកណ្ដាលនៃក្រុមបាល់ទាត់ជម្រើសជាតិឥណ្ឌូណេស៊ី​គឺ​មាន​​កីឡាករ​១៣នាក់ក្នុងចំណោមកីឡាករ ២២នាក់ដែលត្រូវបានជ្រើសរើសសម្រាប់ការប្រកួតជម្រុះ World Cup ឆ្នាំ២០២៦។

ប្រទេសដែលស្រឡាញ់ងុបងល់​នឹង​កីឡាបាល់ទាត់មួយនេះ កំពុងសម្លឹងរកការពង្រីកទៅលើកីឡាផ្សេងទៀត និងផ្តល់សិទ្ធិដល់អត្តពលិកដែលមានសមត្ថភាពទទួលបានសញ្ជាតិឥណ្ឌូណេស៊ី។

ប្រធានអូឡាំពិក​ឥណ្ឌូណេស៊ី​ លោក Raja Sapta Oktohari បានប្រាប់សារព័ត៌មានកាលពីថ្ងៃចន្ទ​ថា ៖«ខ្ញុំនឹងស្វែងរកអ្នកមានទេពកោសល្យដែលជាកូនកាត់ទាំងនេះ។ ខ្ញុំចង់ឱ្យពួកគេ លេងឱ្យប្រទេសឥណ្ឌូណេស៊ី។ ខ្ញុំមិនប្រឆាំងនឹងកីឡាករចូលសញ្ជាតិនោះទេ»។

គោលនយោបាយនៃការចូលសញ្ជាតិរបស់កីឡាបាល់ទាត់ឥណ្ឌូណេស៊ី បាន​ធ្វើ​ឡើង​កាល​ពី​ឆ្នាំ២០១០ ជាដំណោះស្រាយរយៈពេលខ្លីមួយដើម្បីកែលម្អភាពរឹងមាំរបស់ក្រុមបាល់ទាត់ជាតិឱ្យបានលឿនតាមដែលអាចធ្វើទៅបាន។ នៅឆ្នាំ២០២៣ សមាគម​បាល់ទាត់​ឥណ្ឌូណេស៊ី គ្រប់​គ្រង​ដោយលោក Erick Thohir អតីតប្រធានក្លិបអ៊ីតាលី Inter Milan ដែល​មានគោលបំណងបំបែកខ្លួនចូលទៅក្នុងចំណាត់ថ្នាក់កំពូលទាំង១០០ នៃចំណាត់ថ្នាក់ពិភពលោក និងមានកីឡាករយ៉ាងហោចណាស់ ១៥៤នាក់ដែលមានសមត្ថភាពលេងឱ្យជម្រើសជាតិ។ កីឡាករដែលមានប្រភពដើមពីប្រទេសឥណ្ឌូណេស៊ី​ (មានឪពុក ឬម្ដាយ ជាជនជាតិឥណ្ឌូណេស៊ី) បានក្លាយជាយុទ្ធសាស្ត្រដ៏សំខាន់នៅក្នុងមហិច្ឆតារបស់ លោក Thohir។

កីឡាករជនជាតិឥណ្ឌូណេស៊ីដើមកំណើតបរទេសបានដណ្ដើមតំណែងក្នុងក្រុមភ្លាមៗ រួមមានអ្នកចាំទី Maarten Praes ខ្សែការពារ Jay Idzes, Justin Hubner, Nathan Tjoe Aon, Shayne Pattynama, ខ្សែបម្រើ Marc Klok, Thom Haye, Ivar Jenner, ខ្សែប្រយុទ្ធ Rafael Struick និង Ragnar Oratmangoen សុទ្ធសឹងមកពីប្រទេសហូឡង់។ Jordi Amat មកពីអេស្ប៉ាញ និងបែលហ្ស៊ិក Sandy Walsh ក៏បានចូលរួមក្នុងបញ្ជីឈ្មោះនេះដែរ។

យុទ្ធសាស្ត្រនេះបានបង្កើនការព្រួយបារម្ភអំពីការរើសអើងចំពោះកីឡាករជនជាតិដើម និង «អឺរ៉ុប» នៃក្រុមជម្រើសជាតិ។ អ្នករិះគន់ខ្លះយល់ថា ស្ថាប័ន​គ្រប់​គ្រង​បាល់ទាត់​ឥណ្ឌូណេស៊ី​ គួរតែវិនិយោគក្នុងការជំរុញទេពកោសល្យក្នុងស្រុក និងរៀបចំប្រទេសឥណ្ឌូណេស៊ី​ឱ្យទទួលបានជោគជ័យយូរអង្វែង។

លោក Adhika Wicaksana អតីតមន្ត្រីពាណិជ្ជកម្មនៅ​សមាគម​​បាល់ទាត់​ឥណ្ឌូណេស៊ី បានប្រាប់ DW ថា ៖«តាមទស្សនៈបាល់ទាត់សុទ្ធសាធ ខ្ញុំយល់ឃើញថា នេះជាបញ្ហាដែលទាមទារការយកចិត្តទុកដាក់របស់​ស្ថាប័ន​ដឹក​នាំ។ ជាពិសេសទាក់ទងនឹងកម្មវិធីមូលដ្ឋាន និងការអភិវឌ្ឍយុវជន។ ការផ្តោតអារម្មណ៍ខ្លាំងពេកលើកីឡាករដែលកើតនៅបរទេស ធ្វើឱ្យមានការធ្វេសប្រហែសពីតម្រូវការសំខាន់សម្រាប់ការធ្វើឱ្យប្រសើរឡើងនូវហេដ្ឋារចនាសម្ព័ន្ធ និងការបណ្តុះបណ្តាលដើម្បីអភិវឌ្ឍទេពកោសល្យកីឡាករក្នុងស្រុក»។

លោក Simon McMenemy គ្រូបង្វឹក​ជម្រើស​ជាតិ​ឥណ្ឌូណេស៊ី ចន្លោះ​ឆ្នាំ២០១៨-២០១៩ ជឿជាក់ថា ការនាំយកចូល​កីឡាករទេពកោសល្យដែលមានដើមកំណើតពីបរទេសអាចជួយប្រទេសនេះទទួលបានទស្សនវិស័យថ្មី។ លោកគិតថា វាគ្រាន់តែជាអ្វីដែលប្រទេសត្រូវការដើម្បីទទួលបានសន្ទុះក្នុងដំណើរឆ្ពោះទៅរកភាពជោគជ័យ៕

ប្រែសម្រួល៖ មន្នីរ័ត្ន
ប្រភព៖ Inside The Games