Terada ឡើងឈរលេខ១ពិភពលោក ឃីក​បុកស៊ីង​​​ទម្ងន់៥៧គីឡូក្រាម

អ្នកប្រដាល់ឃីកបុកសុីងវ័យ២៣ឆ្នាំ សញ្ជាតិជប៉ុន កីឡាករ Takumi Terada បាន​ឡើងឈរលេខ១ក្នុងតារាងចំណាត់ថ្នាក់ឃីក​បុក​ស៊ី​ពិភពលោកក្នុងប្រភេទទម្ងន់៥៧គីឡូក្រាម​ ក្រោយឈ្នះខ្សែក្រវាត់ K-1 Featherweight។

អ្នកប្រដាល់វ័យក្មេង Takumi Terada បានទម្លាក់ជើងខ្លាំងកីឡាករ Taito Gunji ឲ្យធ្លាក់មកលេខ២ក្នុងតារាងចំណាត់ថ្នាក់​ពិភពលោកក្នុងប្រភេទទម្ងន់៥៧គីឡូក្រាម​រៀបចំឡើងដោយ Beyond Kick។ អ្វីដែលកាន់តែពិសេសគឺកីឡាករ Takumi Terada នេះហើយបានធ្វើឲ្យកីឡាករ Taito Gunji ស្គាល់បរាជ័យលើកដំបូងគិតតាំងពីឆ្នាំ​២០១២។ ក្នុងការប្រកួតដណ្ដើមខ្សែក្រវាត់ K-1 Featherweight កម្មវិធី K-1 World Max 2024 នៅទីក្រុង​តូក្យូ​ កាលពីថ្ងៃទី២៩ ខែកញ្ញា ឆ្នាំ២០២៤ កីឡាករ Terada បានឈ្នះពិន្ទុកីឡាករ Taito Gunji ក្នុងទឹកទី៤ ដែលជាទឹកបន្ថែម ក្រោយការប្រកួត៣ទឹកលទ្ធផលស្មើគ្នា។

ក្រោយជ័យជម្នះ Terada បានគ្រងជាម្ចាស់ខ្សែក្រវាត់ K-1 Featherweight ជាពិសេសបានឡើងឈរលេខ១ក្នុងតារាងចំណាត់ថ្នាក់ពិភព​លោក​ ស្របពេលរូបគេកំពុងមានកំណត់ត្រាយ៉ាងល្អក្នុងការប្រកួតឃីកបុងសុីងកម្រិតអាជីព។ គិត​ចាប់តាំងពីឆ្នាំ២០២០ កីឡាករ Terada ប្រកួតបាន១១លើក​ ឈ្នះ១០ ចាញ់១លើក ហើយកំពុងគ្រងខ្សែក្រវាត់​២ខ្សែ​គឺ​ ISKA Oriental Rules World Super-featherweight និង K-1 Featherweight។

កីឡាករ Takumi Terada ស្ថិត​នៅ​ក្លិប​ Team Vasileus ជាមួយកីឡាករឆ្នើម Takeru Segawa។ រូប​គេ​មាន​​ពេល​វេលា​វែងឆ្ងាយទៀត ក្នុងការប្រឡូក​អាជីពឈឺសាច់មួយនេះ។ ជាពិសេសនៅមានដៃគូខ្លាំងៗ​ជាងច្រើនទៀតដែលអ្នកប្រដាល់វ័យក្មេងម្នាក់នេះត្រូវជួប៕

អត្ថបទ៖ ផា រតនា