James ជាកីឡាករបាល់បោះរកប្រាក់ចំណូល​ច្រើន​បំផុត១១លើកជាប់គ្នា

កីឡាករ​បាល់បោះ LeBron James របស់ក្លិប Los Angeles Lakers ជាប់ឈ្មោះជាកីឡាករបាល់បោះរកប្រាក់ចំណូលសរុបបានច្រើនជាងគេ​បំផុត​ចំនួន១១លើកជាប់គ្នា។

គិតត្រឹមឆ្នាំ២០២៤នេះមិនមានកីឡាករបាល់បោះក្នុងក្រប​ខណ្ឌ​លីគ​បាល់បោះ​អាមេរិក​ NBA មានអាយុច្រើនជាងកីឡាករ LeBron James ឡើយ ខណៈរូបគេនឹងប្រារព្ធខួបកំណើត​ចូលអាយុ៤០ឆ្នាំនៅក្នុងខែធ្នូខាងមុខ។ លោក​មានអាយុ​ច្រើន​ជាងគ្រូបង្វឹកក្លិបបាល់បោះ​៣រូបផ្សេងទៀតក្នុងក្របខណ្ឌ NBA។

ឆ្នាំ២០២៤ ជាឆ្នាំទី១១ជាប់គ្នាដែល James ជាប់ឈ្នោះជាកីឡាករបាល់បោះមានប្រាក់ខែខ្ពស់បំផុតរបស់ NBA ជាមួយទឹកប្រាក់៤៨.៨លានដុល្លារ​សម្រាប់រដូវកាលនេះ។ បន្ថែមពី​លើ​នេះ លោក​អាចរកចំណូល​ផ្សេង​បាន​ម្រមាណ​៨០លានដុល្លារ ពីកិច្ច​សន្យា​ ការផ្តល់អាជ្ញាបណ្ណ និងការងារជាមួយអាជីវកម្ម​ជា​ច្រើន​ទៀត។

ឆ្នាំ២០២៤ James អាចរកប្រាក់ចំណូលសរុបបានរហូតចំនួន១២៨.៧លានដុល្លារ (គិតមុនពេលបង់ពន្ធ និងថ្លៃភ្នាក់ងារផ្សេង)។ នេះគឺប្រាក់ចំណូលខ្ពស់បំផុតក្នុងប្រវត្តិសាស្ត្រ រយៈពេល១៥ឆ្នាំចុងក្រោយ ក្នុងក្របខណ្ឌ NBA។ យោងតាមចុះផ្សាយរបស់ទស្សនាវដ្តី​ Forbes។ រដូវ​កាល​២០២២-២៤ លោក​រកបានត្រឹមតែ១២៤.៥លានដុល្លារ។

James បានក្លាយជាកីឡាករបាល់បោះ NBA កំពុង​ប្រកប​អាជីព​ដំបូងគេត្រូវបានតែងតាំងជាមហាសេដ្ឋីដោយទស្សនាវដ្តី Forbes ក្នុងឆ្នាំ២០២២ ជាមួយការរកចំណូលបានយ៉ាងច្រើន​ពី​ដៃគូសហការដូច​ជា ក្រុមហ៊ុន DraftKings, Fanatics និង Hennessy ហើយបានបណ្តាក់ទុននៅក្នុងក្រុមហ៊ុន PGA Tour Enterprises។

ក្រុមហ៊ុនប្រព័ន្ធផ្សព្វផ្សាយ​របស់​លោក​គឺ​ Uninterrupted បានផលិតកម្មវិធីទូរទស្សន៍​ដែលមានបង្ហាញពីលក្ខណៈពិសេសរបស់ James ក៏ដូចជាតារាបាល់បោះ NBA បួននាក់ផ្សេងទៀតក្នុងកម្មវិធីជជែក The Shop។ លោក​​បានបង្ហាញផតឃែស្ថថ្មីមួយដែលមានឈ្មោះថា Mind the Game កាលពីខែមីនា។

James ចាប់ផ្ដើមក្លាយជាស្តេចបាល់បោះរកប្រាក់ចំណូលបានច្រើនបំផុត​កាល​ពី​ឆ្នាំ២០១៤-១៥ ជាមួយនឹងទឹកប្រាក់​៦៤.៦លានដុល្លារក្នុង១ឆ្នាំ។ ពេលនោះកីឡាករបាល់បោះ​កំពូលទាំង១០ របស់ក្របខណ្ឌ NBA រកបានទឹកប្រាក់សរុប៣៦៨លានដុល្លារ។ នេះបើយោងតាមការប៉ាន់ស្មានរបស់ Forbes ប៉ុន្តែ​ឆ្នាំ២០២៤ កីឡាករបាល់បោះកំពូលទាំង១០ របស់ក្របខណ្ឌ NBA អាចរកចំណូលសរុបបានចំនួន៧៨៧លាន​ដុល្លារ៕

ប្រែសម្រួល៖ ផា រតនា