កីឡា

កំពូលកីឡាករបាល់បោះ៣រូបរកចំណូលបានច្រើនបំផុតក្នុងឆ្នាំ២០២៤

បានផុស

៣ ខែ មុន

នៅ

ថ្ងៃអង្គារ ២៩ តុលា ២០២៤

ដោយ

បាល់បោះជាកីឡាពេញនិយមបំផុតនៅទឹកដីសហរដ្ឋអាមេរិកដែលប្រជុំដោយកីឡាករកំពូលៗលំដាប់ពិភពលោក។ ថ្ងៃនេះសារព័ត៌មាន«កម្ពុជាថ្មី» សូមបង្ហាញកីឡាករបាល់បោះ៣រូបដែលរកចំណូលបានច្រើនបំផុតក្នុងឆ្នាំ២០២៤ យោងតាមការចុះផ្សាយរបស់ទស្សនាវដ្តី Forbes ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

១. កីឡាករ LeBron James

បន្ទាប់ពីចុះហត្ថលេខាម្តងទៀតជាមួយក្រុម Los Angeles Lakers រយៈពេល២ឆ្នាំ ក្នុងតម្លៃ១០៤លានដុល្លារ ក្នុងការបន្តអាជីពបាល់បោះកាលពីខែកក្កដា កីឡាករ LeBron James បានបង្កើតប្រវត្តិសាស្ត្រថ្មីក្នុងក្របខណ្ឌលីគបាល់បោះអាមេរិក NBA ក្រោយបានចាប់ដៃគូលេងជាកូនប្រុសរបស់ខ្លួន Bronny James នៅលើទីលាន។

កីឡាករវ័យ៣៩ឆ្នាំ LeBron James ទទួលបានថ្លៃហត់នឿយចំនួន៤៨.៧លានដុល្លារក្នុង១រដូវកាលជាមួយក្លិប Los Angeles Lakers។ ក្រៅពីចំណូលក្នុងការប្រកបអាជីពជាកីឡាករបាល់បាល់បោះ លោកក៏អាចរកចំណូលបាន៨០លានដុល្លារបន្ថែមទៀតពីកិច្ចសហការជាមួយក្រុមហ៊ុនធំៗជាច្រើនទៀត។ សរុបចំណូលទាំងអស់ក្នុងឆ្នាំ២០២៤លោករកចំណូលបានសរុបចំនួន១២៨.៧លានដុល្លារ ឈរលំដាប់ទី១។

២. កីឡាករ Stephen Curry

បើនិយាយពីប្រាក់ពលកម្មរបស់កីឡាករបាល់បោះវ័យ៣៦ឆ្នាំ Stephen Curry របស់ក្លិប Golden State Warriors ទទួលបានថ្លៃហត់នឿយចំនួន៥៥.៨លានដុល្លារក្នុង១រដូវកាល ច្រើនជាង LeBron James ទៀត ប៉ុន្តែចំណូលក្រៅពីការលេងបាល់បោះ Stephen Curry រកបានត្រឹមតែ៥០លានដុល្លារប៉ុណ្ណោះ។ ដូច្នេះលោកឈរនៅលេខ២ ក្នុងនាមជាកីឡាករបោះបង់រកចំណូលបានច្រើនបំផុតក្នុងឆ្នាំ២០២៤ ជាមួយចំណូលសរុបចំនួន១០៥.៨លានដុល្លារ។

៣. កីឡាករ Kevin Durant

កីឡាករវ័យ៣៦ឆ្នាំ Kevin Durant ជាអ្នកលេងបាល់បោះទី៣រកចំណូលបានច្រើនបំផុតក្នុងឆ្នាំ២០២៤ ជាមួយចំណូលសរុបចំនួន៩៩.៩លានដុល្លារ។ កីឡាករលេងឲ្យក្លិប Phoenix Suns ទទួលបានថ្លៃហត់នឿយក្នុង១រដូវកាលចំនួន៤៩.៩លានដុល្លារ។ លោករកបានចំណូលក្រៅពីបាល់បោះ៥០លានដុល្លារមទៀត។

Kevin Durant បានក្លាយជាកីឡាករបាល់បោះបុរសដំបូងគេដែលឈ្នះមេដាយមាសចំនួន៤លើកជាប់គ្នាក្នុងព្រឹត្តិការណ៍អូឡាំពិក។ មុនព្រឹត្តិការណ៍អូឡាំពិកទីក្រុងប៉ារីសឆ្នាំ២០២៤ លោកបានបង្ហាញកិច្ចព្រមព្រៀងថ្មីមួយទៀតជាមួយភេសជ្ជៈកីឡា Prime បន្ថែមលើការងារជាមួយក្រុមហ៊ុន Nike, FanDuel និង 2K៕