កីឡា

តើមានអ្វីពិសេសបានជា Beckham ទិញវីឡាតម្លៃ៧២លានដុល្លារ?

បានផុស

៤៤ វិនាទី មុន

នៅ

ថ្ងៃអង្គារ ២៩ តុលា ២០២៤

ដោយ

អតីតតារាបាល់ទាត់អង់គ្លេសលោក David Beckham រួមជាមួយភរិយាលោកស្រី Victoria Beckham ត្រូវបានគេរាយការណ៍ពីការបានទិញវីឡាថ្មីដ៏ប្រណីតមួយ តម្លៃ៧២លានដុល្លារ ក្នុងទីក្រុង Miami សហរដ្ឋអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មូលហេតុដែលវីឡាមួយនេះមានតម្លៃរហូតដល់៧២លានដុល្លារ ដោយសារស្ថិតនៅតំបន់មួយមានទេសភាពស្រស់ស្អាតជាប់មាត់សមុទ្រក្នុងតំបន់ Biscayne Bay ឆ្នេរសមុទ្រអាត្លង់ទិក ភាគខាងត្បូងរដ្ឋ Florida។ វីឡាដ៏ប្រណីតនេះមានបន្ទប់គេងចំនួន៩ មានអាងហែលទឹកទំហំ៣៧.៧ម៉ែត្រ ផ្ទះបាយ និងបន្ទប់រោងកុន។ លោក David និងលោកស្រី Victoria អាចរីករាយជាមួយរោងកុនផ្ទាល់ខ្លួន កន្លែងហាត់ប្រាណ ស្ប៉ា អាងហែលទឹក ផ្ទះបាយខាងក្រៅផ្ទះ និងកន្លែងទទួលភ្ញៀវនៅលើដំបូល។ យោងតាមការចុះផ្សាយរបស់ The Sun ប្ដីប្រពន្ធមួយនេះស្រលាញ់វីឡានេះណាស់ ហើយចង់ចំណាយពេលនៅទីនោះឲ្យបានច្រើន។

វីឡាដ៏ធំនៅទីក្រុង Miami គឺគ្រាន់តែជាអចលនទ្រព្យមួយក្នុងចំណោមអចលនទ្រព្យមានតម្លៃរាប់លានដុល្លាររបស់ប្តីប្រពន្ធមួយគូនេះប៉ុណ្ណោះ។ កាលពីឆ្នាំ២០២០ ពួកគេបានទិញផ្ទះល្វែងតម្លៃ២៣.៣លានដុល្លារនៅអគារ One Thousand Museum ក្នុងទីក្រុង Miami។ ពួកគេក៏មានផ្ទះជួលតម្លៃ៤០,២លានដុល្លារនៅ Holland Park ភាគខាងលិចទីក្រុងឡុងដ៍ផងដែរ។

គូស្នេហ៍ទាំងពីរក៏បានទិញផ្ទះបុរាណមួយតម្លៃ១៥.៥លានដុល្លារនៅ Cotswolds ជាកន្លែងដែលពួកគេបានចំណាយពេលច្រើនជាមួយកូន៤នាក់គឺ Brooklyn, Romeo, Cruz និង Harper។ ទ្រព្យសម្បត្តិរបស់គូស្នេហ៍ត្រូវបានគេប៉ាន់ប្រមាណថា មានចំនួនជាង៥៨៤លានដុល្លារ។

បន្ទាប់ពីចូលនិវត្តន៍ពីបាល់ទាត់ក្នុងឆ្នាំ២០១៤ លោក David Beckham ក៏បន្ដភាពជោគជ័យក្នុងជីវិតដោយបន្តរកប្រាក់ជាច្រើនពីភាពជាដៃគូម៉ាកយីហោ និងកិច្ចព្រមព្រៀងផ្សេងៗទៀត។

លោក David Beckham កាន់តែជោគជ័យ ក្រោយបានទិញក្លិបបាល់ទាត់ Inter Miami ក្នុងឆ្នាំ២០១៤។ លោកបានជួយឲ្យក្លិបមួយទទួលបានអ្នកគាំទ្រនៅជុំវិញពិភពលោកក្នុងឆ្នាំ២០២៣ បន្ទាប់ពីបានចុះហត្ថលេខានាំយកតារាបាល់ទាត់ឆ្នើមដូចជា Lionel Messi, Luis Suarez និង Sergio Busquets ។ គិតមកទល់ពេលនេះតម្លៃក្លិប Inter Miami ត្រូវបានគេរាយការណ៍ថា មានតម្លៃប្រមាណជាង១ពាន់លានដុល្លារ៕

ប្រែសម្រួល៖ ផា រតនា