កីឡា

លោក Josep Muñoz ប្តេជ្ញាយកលេខ១ក្នុងពូល ប៉ះ Madura United ថ្ងៃស្អែក

បានផុស

៣ ខែ មុន

នៅ

ថ្ងៃសុក្រ ១ វិច្ឆិកា ២០២៤

ដោយ

លោកគ្រូ Josep Muñoz គ្រូបង្វឹកព្រះខ័នរាជស្វាយរៀងត្រូវការយកលេខ១ក្នុងពូល E ពេលជួបក្រុមឥណ្ឌូណេស៊ី Madura United វេលាម៉ោង២រសៀល ថ្ងៃសៅរ៍ ទី២ ខែវិច្ឆិកា សម្រាប់ការប្រកួតចុងក្រោយ ពានរង្វាន់ AFC Challenge League រដូវកាល២០២៤-២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីបានកក់កៅអីឡើងវគ្គ៨ក្រុមចុងក្រោយ តាមរយៈជ័យជម្នះលើក្រុមម៉ុងហ្គោលី Falcons ២-១ ក៏គ្រូបង្វឹកព្រះខ័នរាជស្វាយរៀងនៅតែយកចិត្តទុកដាក់សម្រាប់ការប្រកួតចុងក្រោយ។ ក្នុងលក្ខខណ្ឌស្មើដើម្បីរកបាន១ពិន្ទុ ឬទទួលបានជ័យជម្នះដើម្បីរកបាន៣ពិន្ទុបន្ថែម នៅពេលប្រកួតជាមួយ Madura United ព្រះខ័នរាជស្វាយនឹងឈរលើកំពូលតារាង ប៉ុន្តែប្រសិនបើចាញ់ ក្លិបតំណាងកម្ពុជាទទួលបានចំណាត់ថ្នាក់លេខ២ ពីព្រោះក្លិបឥណ្ឌូណេស៊ីមាន១ពិន្ទុស្រាប់ ពីការប្រកួតស្មើ ០-០ ជាមួយ Falcons។

លោកគ្រូ Josep Muñoz បានឲ្យដឹងថា លោកបានឲ្យកូនក្រុមសម្រាកឲ្យបានគ្រប់គ្រាន់ដើម្បីត្រៀមខ្លួនប្រកួតចុងក្រោយ។ កីឡាករមួយចំនួនបានរបួស ដូច្នេះលោកមិនទាន់ប្រាកដ១០០%ថាតើកីឡាករណាខ្លះដែលមិនអាចបង្ហាញខ្លួនបានឡើយសម្រាប់ការប្រកួតនៅថ្ងៃស្អែក។

លោកបានលើកឡើងថា ខ្សែប្រយុទ្ធ 𝗣𝗮𝗯𝗹𝗼 មានបញ្ហារបួសជង្គង់ដែលត្រូវពិនិត្យមើលពីស្ថានភាព។ ជាមួយគ្នានេះ ខ្សែបម្រើកណ្តាលសញ្ជាតិជប៉ុន 𝗥𝘆𝗼 បានប៉ះទង្គិចក្បាលយ៉ាងខ្លាំងជាមួយកីឡាកររបស់ Falcons ក៏ត្រូវតាមដានដែរ ហើយប្រធានក្រុម សឿយ វិសាល ក៏មានបញ្ហាជើងដោយសារកីឡាកររបស់ Falcons ពានទាត់ត្រូវជើងរហូតត្រូវបានពិន័យកាតក្រហម។

លោកគ្រូ Josep Muñoz បាននិយាយថា ៖«ស្ថានភាពកីឡាករទាំងនេះជាអ្វីដែលយកត្រូវការយកចិត្តទុកឲ្យពួកគាត់ជាសះស្បើយ។ យើងឲ្យកីឡាករសម្រាក ព្រោះយើងត្រូវការយកលេខ១ក្នុងពូល»។

ក្រុម Madura United នឹងធ្លាក់ ប្រសិនបើចាញ់ព្រះខ័នរាជស្វាយរៀងចាប់ពី២គ្រាប់ឡើង ប៉ុន្តែប្រសិនបើបញ្ចប់ដោយលទ្ធផលស្មើគ្នា ឬក្លិបឥណ្ឌូណេស៊ីឈ្នះ គឺក្រុម Falcons ជាអ្នកធ្លាក់ក្នុងផ្ទះរបស់ខ្លួន៕