កីឡា

កីឡាការិនីខ្មែរ-កាណាដា Melania Joy សោកស្តាយមិនអាចមកជួយក្រុមនារីកម្ពុជា

បានផុស

៣ ខែ មុន

នៅ

ថ្ងៃសៅរ៍ ៩ វិច្ឆិកា ២០២៤

ដោយ

កីឡាការិនីខ្មែរ-កាណាដា Melania Joy Hoekstra បានបង្ហាញការសោកស្តាយដែលមិនអាចមកចូលរួមជាមួយក្រុមបាល់ទាត់នារីជម្រើសជាតិកម្ពុជា ក្នុងវគ្គជម្រុះពានរង្វាន់អាស៊ាន AFF Women’s Cup ឆ្នាំ២០២៤ នៅប្រទេសឡាវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាការិនី Melania Joy Hoekstra បានសរសើរលើ Facebook ផ្ទាល់ខ្លួនថា ៖១ពិតជាសោកស្តាយក្នុងការប្រកាសនេះ ប៉ុន្តែខ្ញុំនឹងមិនអាចចូលរួមប្រកួតឲ្យជម្រើសជាតិក្នុងវគ្គជម្រុះ AFF បានទេ។ រដូវកាលរបស់ខ្ញុំនៅតៃវ៉ាន់ដល់ថ្ងៃទី២៣ ខែវិច្ឆិកា ទើបចប់ ហើយខ្ញុំពិតជាមិនអាចចាកចេញបានមុនពេលទីផ្សារ FIFA បើកឡើយ»។

«សង្ឃឹមថា ខ្ញុំអាចវិលត្រឡប់ទៅតំណាងជម្រើសជាតិកម្ពុជានៅឆ្នាំ២០២៥។ សូមសំណាងល្អដល់កីឡាការិនីដែលត្រូវបានជ្រើសរើស។ ខ្ញុំនឹងអបអរដល់អ្នកទាំងអស់គ្នា។ ស៊ូស៊ូកម្ពុជា!!» កីឡាការិនីខ្មែរ-កាណាដា បានបញ្ជាក់។

ខ្សែការពារ Melania Joy Hoekstra ត្រូវបានអ្នកគាំទ្រកម្ពុជាស្គាល់យ៉ាងច្បាស់នៅពេលចូលរួមជាមួយក្រុមបាល់ទាត់នារីកម្ពុជាលើកទី១ក្នុងព្រឹត្តិការណ៍កីឡាស៊ីហ្គេម ឆ្នាំ២០២៣។ ខ្សែការពាររូបនេះជាកម្លាំងដ៏សំខាន់ម្នាក់បានជួយក្រុមបាល់ទាត់នារីជម្រើសជាតិកម្ពុជា ឡើងវគ្គពាក់កណ្តាលផ្តាច់ព្រ័ត្រ កីឡាស៊ីហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ កាលណោះ ក្រុមនារីកម្ពុជា ឈ្នះឡាវ ២-០, ឈ្នះសិង្ហបុរី ១-០ និងចាញ់ថៃ ០-៣។ យ៉ាងណា នៅវគ្គពាក់កណ្តាលផ្តាច់ព្រ័ត្រ ក្រុមនារីកម្ពុជាបានចាញ់វៀតណាម ០-៤។

បន្ទាប់ពីចប់ស៊ីហ្គេម Melania Joy Hoekstra ត្រូវបានក្លិបតៃវ៉ាន់ Kaohsiung Attackers នាំយកទៅលេងក្នុងលីគបាល់ទាត់កំពូលតៃវ៉ាន់រហូតដល់បច្ចុប្បន្ន។ កីឡាការិនីរូបនេះមានដើមកំណើតនៅតំបន់ Bowmanville ក្នុងខេត្ត Ontario ប្រទេសកាណាដា។

ជើងឯកនារីអាស៊ាន AFF Women’s Cup ពីថ្ងៃទី២៣ ដល់ទី២៩ ខែវិច្ឆិកា ឆ្នាំ២០២៤។ ក្រុមនារីកម្ពុជាស្ថិតនៅពូលដ៏លំបាកគឺ B ជាមួយ ម៉ាឡេស៊ី និង ឥណ្ឌូណេស៊ី ខណៈពូល A ហាក់ស្រួលបន្តិចដោយមានម្ចាស់ផ្ទះឡាវ សិង្ហបុរី និង ទីម័រខាងកើត។ ការប្រកួតសន្សំពិន្ទុនេះ ជរើសរើសយកក្រុមលេខ១ និងលេខ២ ឡើងទៅវគ្គពាក់កណ្តាលផ្តាច់ព្រ័ត្រ ដើម្បីជ្រើសរើសយកក្រុមលំដាប់កំពូល៣ឡើងទៅកម្រិតទី១ AFF Women’s Championship ដែលមានក្រុមខ្លាំងហ្វីលីពីន ថៃ និង វៀតណាម៕