កីឡា

សហព័ន្ធគុនខ្មែរនៅរុស្ស៊ីត្រៀមខ្លួនយ៉ាងល្អ ចូលរួមប្រកួតគុនខ្មែរពិភពលោកខែក្រោយ

បានផុស

៣ ខែ មុន

នៅ

ថ្ងៃអង្គារ ១២ វិច្ឆិកា ២០២៤

ដោយ

សហព័ន្ធកីឡាប្រដាល់គុនខ្មែរប្រចាំប្រទេសរុស្ស៊ី នឹងបញ្ជូនអត្តពលិកចូលរួមប្រកួតគុនខ្មែរពិភពលោក លើកទី៥ នាដើមខែធ្នូ ឆ្នាំ២០២៤ នៅខេត្តសៀមរាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Oleg Kudrinsky ស្ថាបនិកសហព័ន្ធកីឡាគុនខ្មែរប្រចាំប្រទេសរុស្ស៊ីបានឲ្យដឹងថា លោកគ្រោងនឹងបញ្ជូនកីឡាករ កីឡាការិនីរុស្ស៊ីចំនួន៧រូបចូលរួមប្រកួតគុនខ្មែរពិភពលោក “Kun Khmer World Championship” លើកទី៥ ឆ្នាំ២០២៤។

លោកបានប្រាប់ថា ក្នុងរយៈពេលមួយឆ្នាំកន្លងទៅនេះ លោកបានរៀបចំកម្មវិធីប្រកួតជាច្រើនទាំងនៅកម្រិតតំបន់ និងនៅទូទាំងប្រទេសរុស្ស៊ីជាមួយក្លិបដែលជាសមាជិកសហព័ន្ធកីឡាគុនខ្មែរប្រចាំប្រទេសរុស្ស៊ី។ បន្ទាប់មកលោកបានរៀបចំការប្រកួតជម្រុះ និងជ្រើសរើសកីឡាករ កីឡាការិនីសម្រាប់ត្រៀមមកប្រទេសកម្ពុជានាចុងឆ្នាំ២០២៤។

បច្ចុប្បន្នមានកីឡាកររុស្ស៊ីកំពុងហ្វឹកហាត់ និងប្រកួតនៅប្រទេសកម្ពុជា ប៉ុន្តែ លោក Oleg Kudrinsky បានបញ្ជាក់ថា លោកមិនប្រើប្រាស់កីឡាកររុស្ស៊ីដែលហ្វឹកហាត់នៅប្រទេសកម្ពុជាដើម្បីចូលរួមប្រកួតគុនខ្មែរពិភពលោកទេ ពីព្រោះពួកគេសុទ្ធជាកីឡាករអាជីព។

ទោះបីជាយ៉ាងណា លោកមិនបានបញ្ជាក់ថាតើក្នុងចំណោមកីឡាករ កីឡាការិនី៧រូបដែលលោកត្រៀមបញ្ជូនមកប្រកួតនៅប្រទេសកម្ពុជាមានអត្តពលិកអាជីពឬទេ។

តាមការឲ្យដឹងពី គណៈកម្មាធិការជាតិអូឡាំពិកកម្ពុជាថា ព្រឹត្តិការណ៍ប្រកួតជើងឯកគុនខ្មែរពិភពលោក លើកទី៥ នឹងធ្វើរយៈ៣ថ្ងៃចាប់ពីថ្ងៃទី៦ ដល់ទី៨ ខែធ្នូ ឆ្នាំ២០២៤ នៅសួនមុខព្រះរាជដំណាក់។ សមាជិកជិត៣០ប្រទេសមកពីទូទាំងពិភពលោកនឹងចូលរួមប្រកួត។

កាលពីឆ្នាំ២០២៣ រៀបចំពីថ្ងៃទី២៦ ដល់ទី២៨ ខែវិច្ឆិកា នៅខេត្តសៀមរាបដោយមានវិញ្ញាសាចំនួន២៤ ក្នុងនោះមានអាជីព និងស្ម័គ្រចិត្ត។ រុស្ស៊ី ក៏បានឈ្នះមេដាយមាស១ (ខ្សែក្រវាត់)ឥណ្ឌាឈ្នះ៣ អ៉ីរ៉ង់ឈ្នះ២ កាមេរ៉ូន ជប៉ុន ហ្វីលីពីន និង Mauritius ឈ្នះមេដាយមាស១ដូចគ្នា។ ចំពោះម្ចាស់ផ្ទះកម្ពុជាបានឈ្នះមេដាយមាសចំនួន១៤៕