ម៉ោង​៤​ថ្ងៃនេះ ក្រុម​នារី Esports កម្ពុជា ប៉ះ ឥណ្ឌូណេស៊ី វគ្គ​៦​ក្រុម​ចុង​ក្រោយ ជើង​ឯក​ពិភព​លោក

ក្រុម​​កីឡាការិនី​អេឡិចត្រូនិក​ជម្រើស​ជាតិ​កម្ពុជា​បាន​ឡើង​ទៅ​កាន់​វគ្គ​៦​ក្រុម​ចុង​ក្រោយ​ក្នុង​​ព្រឹត្តិការណ៍ជើងឯកពិភពលោកលើកទី១៦ (16th World Esports Championship 2024) វិញ្ញាសា ​Mobile Legends: Bang Bang បន្ទាប់ពីធ្វើបានយ៉ាងល្អក្នុងវគ្គសន្សំពិន្ទុ​ក្នុង​ពូល​B នៅ​ប្រទេស​អារ៉ាប៊ីសាអ៊ូឌីត។

ក្រុម​នារី​កម្ពុជា​ស្ថិត​នៅ​ចំណាត់​ថ្នាក់​លេខ​២​ក្នុង​ពូល B បន្ទាប់​ពី​ធ្វើ​បាន​ល្អ​ក្នុង​វគ្គ​សន្សំពិន្ទុ។ ពួក​គេ​បាន​យក​ឈ្នះ​៤​ប្រកួត​ជាប់​គ្នា​លើ​ក្រុម​ជម្រើស​ជាតិ​នារី កូឡុំប៊ី អាហ្សង់ទីន ម៉ុងហ្គោលី នេប៉ាល់ ប៉ុន្តែ​ចុង​ក្រោយ​ចាញ់ អ៊ុយក្រែន។

បញ្ចប់​នៅ​ចំណាត់ថ្នាក់​លេខ​២​នេះ​​ ក្រុម​នារី​កម្ពុជា​បាន​ឡើង​ទៅ​កាន់​វគ្គ​​៦​ក្រុម​ចុង​ក្រោយ ស្ថិត​នៅ Upper Bracket ​ដែល​ត្រូវ​ប៉ះ​លេខ​១​ក្នុង​ពូល A គឺ​ឥណ្ឌូណេស៊ី ខណៈអ៊ុយក្រែន​ដែល​ជាក្រុម​​លេខ​១​ក្នុង​ពូល B ត្រូវ​ប៉ះ អេហ្ស៊ីប ដែល​ជា​ក្រុម​លេខ​​២​ក្នុង​ពូល A។

ជា​មួយ​គ្នា​នេះ ក្រុម​លេខ​៣​ក្នុង​ពូល​ទាំង​ពីរ​ក៏​មិន​ទាន់​អស់​ឱកាស​ដែរ​ដោយ​ពួក​គេ​ត្រូវ​ធ្លាក់​ទៅ​កម្រិត Lower Bracket គឺ​​លេខ៣​ពូល B នេប៉ាល់ និង​លេខ​៣​ពូល A ម្ចាស់​ផ្ទះអារ៉ាប៊ីសាអ៊ូឌីត។

តាម​រូប​មន្ត​នៃ​ការ​ប្រកួត ក្រុម​ណា​ចាញ់​នៅ Upper Bracket ត្រូវ​ធ្លាក់​មក​ជួប​ក្រុម Lower Bracket ខណៈ​ក្រុម​ចំនួន​២​ដែល​ឈ្នះ​នៅ​វគ្គ Upper Bracket ត្រូវ​​ប៉ះ​គ្នា​​​នៅ​​វគ្គ​ពាក់​កណ្តាល​ផ្តាច់​ព្រ័ត្រ។​

និយាយ​ដោយ​ឡែក ក្រុម​នារី​កម្ពុជា​ទោះ​បី​ជា​ចាញ់​ឥណ្ឌូណេស៊ី ក៏​មិន​ទាន់​អស់​ឱកាស​ដែរ​ដោយ​ត្រូវ​ធ្លាក់​មក​ប៉ះ នេប៉ាល់ ឬ អារ៉ាប៊ីសាអ៊ូឌីត​ នៅ​កម្រិត Lower Bracket។

ការ​ប្រកួត​​រវាង​ក្រុម​នារីកម្ពុជា និង ឥណ្ឌូណេស៊ី នឹង​ធ្វើ​នៅវេលា​ម៉ោង​៤​​រសៀល ថ្ងៃ​ទី​ចន្ទ ទី​១៨ ខែ​វិច្ឆិកា ឆ្នាំ​២០២៤។

សូម​បញ្ជាក់​ថា ប្រាក់​រង្វាន់ ក្រុម​ជើង​ឯក​ទទួល​បាន​៥​ម៉ឺន​ដុល្លារ ក្រុម​លេខ​២​ទទួល​បាន​២.៥​ម៉ឺន​ដុល្លារ និង​ក្រុម​លេខ​៣​ទទួល​បាន​១.៥​ម៉ឺន​ដុល្លារ ខណៈ​ក្រុម​ចំណាត់​ថ្នាក់​លេខ​៤​ដល់​លេខ​១៦​ក៏​ទទួល​បាន​ប្រាក់​រង្វាន់​ដែរ៕

អត្ថបទ៖ វីរបុត្រ