កីឡា

កញ្ញា ឆៃលីម កិន្នារី៖«ការឈ្នះមេដាយប្រាក់ពិភពលោកគឺការសម្រេចគោលដៅរំពឹងទុក»

បានផុស

៤ ខែ មុន

នៅ

ថ្ងៃព្រហស្បតិ៍ ២១ វិច្ឆិកា ២០២៤

ដោយ

កីឡាការិនីអេឡិចត្រូនិកជម្រើសជាតិកម្ពុជា កញ្ញា ឆៃលីម និន្នារី បានចាត់ទុកការឈ្នះមេដាយប្រាក់ពីព្រឹត្តិការណ៍កីឡាអេឡិចត្រូនិកជើងឯកពិភពលោក លើកទី១៦ (World Esports Championship 2024) គឺជាការសម្រេចគោលដៅតាមការរំពឹងទុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កញ្ញា ឆៃលីម កិន្នារី ប្រធានក្រុមបានប្រាប់អ្នកសារព័ត៌មានពេលត្រឡប់មកដល់អាកាសយានដ្ឋានអន្តរជាតិភ្នំពេញ នៅព្រឹកថ្ងៃទី២១ ខែវិច្ឆិកា ឆ្នាំ២០២៤ថា ក្រុមទាំងមូលបានដាក់គោលហោចណាស់លំដាប់លេខ៣ក្នុងការប្រកួតជើងឯកពិភពលោកឆ្នាំ២០២៤ ប៉ុន្តែបានឈានដល់លំដាប់ទី២ដែលលើសពីគោលដៅរំពឹងទុក។

កញ្ញាបាននិយាយថា ៖«ការមិនបានលេខ១គឺដោយសារពួកយើងខ្វះបទពិសោធ។ យើងដឹងស្រាប់ហើយ ក្រុមកីឡាការិនីឥណ្ឌូណេស៊ីបានដើរមុនយើងពីរបីឆ្នាំហើយ។ ពួកយើងទើបតែចាប់ផ្តើមមានក្រុមនារីទេ ដូច្នេះខ្ញុំគិតថា ពួកយើងនៅខ្វះបទពិសោធ។ យើងត្រូវការពេលវេលាច្រើនទៀតទើបអាចតាមទាន់ឥណ្ឌូណេស៊ីបាន»។

បើប្រៀបធៀបនឹងក្រុមនារីរបស់ប្រទេសផ្សេងៗឃើញថា ក្រុមនារីកម្ពុជាធ្វើបានល្អខ្លាំងមែន។ ៥ប្រកួតក្នុងពូល ក្រុមនារីកម្ពុជាទទួលបានជ័យជម្នះលើ ម៉ុងហ្គោលី អាហ្សង់ទីន នេប៉ាល់ និងកូឡុំប៊ី ប៉ុន្តែចាញ់ អ៊ុយក្រែន។ យ៉ាងណា នៅវគ្គ Lower Bracket ក្រុមនារីកម្ពុជាសងសឹកបានសម្រេចលើក្រុមនារីអ៊ុយក្រែន។

កញ្ញា ឆៃលីម កិន្នារី បាននិយាយថា ៖«អ្វីដែលខ្ញុំពេញចិត្តសម្រាប់ការចូលរួមនេះគឺនៅពេលយើងចាញ់ឥណ្ឌូណេស៊ី នៅវគ្គ Upper ហើយធ្លាក់មក Lower។ នៅពេលយើងលេងនៅ Lower ពួកគេបានតាំងស្មារតីបានល្អរហូតឈានដល់វគ្គផ្តាច់ព្រ័ត្រ។ នេះគឺជាអ្វីដែលពួកយើងពេញចិត្តបំផុតចំពោះស្មារតីប្រឹងប្រែងឡើងវិញ»។

ក្នុងព្រឹត្តិការណ៍ប្រកួតជើងឯកពិភពលោកនេះមានតែក្រុមនារីឥណ្ឌូណេស៊ីតែមួយគត់ដែលក្រុមនារីកម្ពុជាចាញ់។ នៅវគ្គជម្រុះប្រចាំតំបន់អាស៊ាន ក្រុមនារីកម្ពុជា បានចាញ់ ឥណ្ឌូណេស៊ី ២ដង ហើយជុំចុងក្រោយ នៅប្រទេសអារ៉ាប៊ីសាអ៊ូឌីត ក្រុមនារីកម្ពុជាបានចាញ់២ដងទៀតគឺចាញ់វគ្គខ្វែង Upper និងចាញ់វគ្គផ្តាច់ព្រ័ត្រដណ្តើមមេដាយមាស។