កីឡា

វគ្គផ្តាច់ព្រ័ត្រ ស្វាយរៀងស៊ុបភើខាប់ ថ្ងៃសៅរ៍នេះចូលរួមសម្ដែងដោយកញ្ញា Mina

បានផុស

២ ខែ មុន

នៅ

ថ្ងៃពុធ ២៧ វិច្ឆិកា ២០២៤

ដោយ

នៅថ្ងៃទី៣០ ខែវិច្ឆិកា ឆ្នាំ២០២៤ ជាពេលវេលាវគ្គផ្តាច់ព្រ័ត្រពានរង្វាន់ ស្វាយរៀបស៊ុបភើខាប់ បន្ទាប់ពីរង់ចាំពេលវេលាល្អអស់រយៈពេលជាច្រើនខែ ក្រោយពេលការប្រកួតសន្សំពិន្ទុក្នុងពូល វគ្គ៨ក្រុមចុងក្រោយ និងវគ្គពាក់កណ្តាលផ្តាច់ព្រ័ត្របានចប់ជាច្រើនសប្តាហ៍មកហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់ការប្រកួតវគ្គផ្ដាច់ព្រ័ត្រ នៅចុងសប្ដាហ៍នេះ មានវត្តមានតារាចម្រៀងដ៏ស្រស់ស្អាត គឺកញ្ញា Mina ព្រមទាំងមានការសម្ដែងសិល្បៈ របាំក្ងោកប៉ៃលិន របាំព្រៃប្រសិទ្ធិ និងមានក្បួនដង្ហែបុត្រីស្តេចនាគនាំយកពានរង្វាន់មកប្រគល់ជូនក្រុមជើងឯកថែមទៀត។ បងប្អូនអាចចូលរួមទស្សនាដោយសេរី នៅកីឡដ្ឋាន ខេត្តស្វាយរៀង។

ការប្រកួតវគ្គផ្ដាច់ព្រ័ត្រពានរង្វាន់ ស្វាយរៀង ស៊ុបភើខាប់ គឺជាការជួបគ្នារវាងក្រុមស្នងការដ្ឋាននគរបាលខេត្តស្វាយរៀង ទល់នឹងក្រុមព្រះខ័នរាជស្វាយរៀង U18 វេលាម៉ោង៤:០០នាទីល្ងាច នៅកីឡដ្ឋាន ខេត្តស្វាយរៀង រៀបចំដោយសសយក ខេត្តស្វាយរៀង និងមានការផ្សាយផ្ទាល់តាមរយៈ BTV NEWS។

មុនឡើងមកដល់វគ្គផ្ដាច់ព្រ័ត្រក្រុមទាំង២សុទ្ធតែធ្វើបានល្អដូចគ្នា។ ការប្រកួតវគ្គពាក់កណ្ដាលផ្ដាច់ព្រ័ត្រ ក្រុមស្នងការដ្ឋាននគរបាលខេត្តស្វាយរៀង បានទម្លាក់ក្រុមសសយក ក្រុងបាវិត ក្នុងលទ្ធផល ៥-០។ ចំណែកក្រុមព្រះខ័នរាជស្វាយរៀង U18 គេបានទម្លាក់ក្រុមគោព្រៃភូមិស្វាយធំ ដោយលទ្ធផល ៤-១។

ដូច្នេះការប្រកួតវគ្គផ្ដាច់ព្រ័ត្រជាជំនួបដ៏ជក់ចិត្ត។ សង្ឃឹមថា បងប្អូនអ្នករស់នៅខេត្តស្វាយរៀង ចូលរួមទស្សនាផ្ទាល់ឲ្យបានច្រើនកុះករដើម្បីលើកទឹកចិត្តដល់ក្រុមទាំងពីរ៕