កីឡា

អបអរសាទរ! ក្រុមនារីកម្ពុជាបង្កើតកំណត់ត្រាឡើងវគ្គ៤ក្រុម ASEAN Women’s Cup

បានផុស

២ ខែ មុន

នៅ

ថ្ងៃសុក្រ ២៩ វិច្ឆិកា ២០២៤

ដោយ

ក្រុមបាល់ទាត់នារីជម្រើសជាតិកម្ពុជា បានឡើងទៅកាន់វគ្គពាក់កណ្តាលផ្តាច់ព្រ័ត្រពានរង្វាន់ ASEAN Women’s Cup បន្ទាប់ពីបានយកឈ្នះក្រុមនារីម៉ាឡេស៊ី ដោយលទ្ធផល ២-០ នៅថ្ងៃទី២៩ ខែវិច្ឆិកា ឆ្នាំ២០២៤ វគ្គសន្សំពិន្ទុក្នុងពូល B នៅប្រទេសឡាវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈជ័យជម្នះលើម៉ាឡេស៊ីដោយគ្រាប់បាល់ ២-០ បានផ្តល់ឲ្យកម្ពុជាទទួលបានចំណាត់ថ្នាក់លេខ១ក្នុងពូល B ដោយសារមានគ្រាប់បាល់ចំណេញច្រើនជាងឥណ្ឌូណេស៊ី ដែលមាន៤ពិន្ទុដូចកម្ពុជា។ ២គ្រាប់របស់កម្ពុជារកបានដោយកីឡាករ ពឿន គន្ធា និង ឈិត សុភឿន នៅវគ្គទី១។

ការប្រកួតសន្សំពិន្ទុ លើកទី១ កម្ពុជា បានស្មើជាមួយ ឥណ្ឌូណេស៊ី ០-០ និងការប្រកួតលើកទី២ ឈ្នះម៉ាឡេស៊ី ដោយលទ្ធផល ២-០។ ចំណែក ឥណ្ឌូណេស៊ី ស្មើ កម្ពុជា ០-០ និងឈ្នះ ម៉ាឡេស៊ី ១-០។ ដូច្នេះ ក្រុមម៉ាឡេស៊ី បានធ្លាក់។

ក្រុមម្ចាស់ផ្ទះ ឡាវ បានធ្លាក់ បន្ទាប់ពីចាញ់សិង្ហបុរី ១-០ សម្រាប់ការប្រកួតចុងក្រោយ ហើយប្រកួតលើកទី១បានត្រឹមស្មើ ទីម័រខាងកើត ដូច្នេះ ទីម័រខាងកើត និង សិង្ហបុរី ឡើងវគ្គពាក់កណ្តាលផ្តាច់ព្រ័ត្រ។

នៅវគ្គពាក់កណ្តាលផ្តាច់ព្រ័ត្រ ក្រុមនារីកម្ពុជា ប៉ះ ក្រុមលេខ២ក្នុងពូល A គឺ សិង្ហបុរី ខណៈ ឥណ្ឌូណេស៊ី ជួបក្រុមលេខ១ក្នុងពូល A គឺ ទីម័រខាងកើត។

នេះជាលើកដំបូងដែលក្រុមបាល់ទាត់នារីកម្ពុជាបានបង្កើតកំណត់ត្រាឡើងវគ្គពាក់កណ្តាលផ្តាច់ព្រ័ត្រក្នុងពានរង្វាន់ ASEAN Women’s Cup ប៉ុន្តែនៅឆ្នាំ២០២៤ ពានរង្វាន់នារីអាស៊ាននេះត្រូវបានបែងចែកជា២កម្រិតគឺ ASEAN Women’s Cup (កម្រិតទី២) និង ASEAN Women’s Championship (កម្រិតទី១)ដែលមានក្រុមខ្លាំង ហ្វីលីពីន ថៃ និង វៀតណាមកំពុងរង់ចាំ។ ពានរង្វាន់ ASEAN Women’s Cup ត្រូវជ្រើសរើស៣ក្រុមឡើងទៅកម្រិតទី១នៅឆ្នាំ២០២៥៕

អត្ថបទ៖ វីរបុត្រ