កីឡា

Andres Neito បង្ហាញសារសន្យាចំពោះកម្ពុជា ក្រោយក្លាយជាខ្មែរ

បានផុស

៣ ខែ មុន

នៅ

ថ្ងៃអង្គារ ៣ ធ្នូ ២០២៤

ដោយ

កីឡាករកូឡុំប៊ី Andres Neito របស់ក្លិបភ្នំពេញក្រោន ត្រូវបានសហព័ន្ធកីឡាបាល់ទាត់កម្ពុជាបានផ្តល់សញ្ជាតិខ្មែរដើម្បីក្លាយជាកីឡាករជម្រើសជាតិកម្ពុជាលើឆាកអន្តរជាតិ បន្ទាប់ពីរូបគេបានប្រកបអាជីពបាល់ទាត់នៅទីនេះអស់រយៈពេល៥ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយទទួលបានសញ្ជាតិខ្មែរ និងពាក់អាវជម្រើសជាតិកម្ពុជា Neito បានបង្ហាញថា នេះជាដំណាក់កាលដ៏វិសេសវិសាលបំផុតនៅក្នុងអាជីពបាល់ទាត់របស់ខ្លួន ហើយជាក្តីសុបិនក្លាយជាការពិត។

កីឡាករបានរៀបរាប់នៅលើ Instagram របស់ខ្លួនដោយមានខ្លឹមសារថា ៖«ខ្ញុំកំពុងរស់នៅក្នុងដំណាក់កាលដ៏រំភើប និងវិសេសវិសាល បន្ទាប់ពីប្រកបអាជីពបាល់ទាត់រយៈពេល៥ឆ្នាំនៅកម្ពុជា។ ទីបំផុតខ្ញុំបានក្លាយជាប្រជាជនកម្ពុជាដែលជាសុបិនក្លាយជាការពិត។ សម្រាប់សុបិននេះ ខ្ញុំពិតជាថ្លែងអំណរគុណជាពិសេសដល់ក្លិបបាល់ទាត់ភ្នំពេញក្រោនដែលបានបើកទ្វារទទួលយកខ្ញុំចូលមកទឹកដីកម្ពុជាដើម្បីបង្ហាញពីទេពកោសល្យរបស់ខ្ញុំ»។

កីឡាករបានបន្តថា ៖«ខ្ញុំពិតជាអរគុណជាអនេកដល់ព្រះរាជាណាចក្រកម្ពុជា សហព័ន្ធកីឡាបាល់ទាត់កម្ពុជា និងអ្នកពាក់ព័ន្ធទាំងអស់គ្នាដែលបានរួមចំណែកនៅក្នុងអាជីពបាល់ទាត់របស់ខ្ញុំដ៏ភ្លឺស្វាងទាំងពេលនេះ និងអនាគត។ ខ្ញុំសន្យាទុកជាមុនសម្រាប់ការតំណាងឲ្យប្រទេសដ៏ស្រស់ស្អាតមួយនេះប្រកបដោយគារវកិច្ច វិជ្ជាជីវៈ និងសេចក្តីថ្លៃថ្នូរ។ ជាមួយគ្នានេះ ខ្ញុំនៅតែបន្តប្រកាន់ភ្ជាប់នូវប្រទេសកំណើតរបស់ខ្ញុំគឺកូឡុំប៊ី»។

ខ្សែប្រយុទ្ធ Andres Neito បានចូលរួមជាមួយក្លិបភ្នំពេញក្រោនតាំងពីឆ្នាំ២០២០ ដោយបានបង្ហាញខ្លួននៅលើទីលាន៨០ដង ក្នុងនោះរកបាន៥៥គ្រាប់ គិតត្រឹមចុងឆ្នាំ២០២៤ និងជួយឲ្យក្លិបទទួលបានសមិទ្ធផលជាច្រើន។ រូបគេបានឈ្នះជើងឯកលីគកំពូលកម្ពុជា២ដង ឈ្នះជើងឯកខេមបូឌានស៊ុបភើខាប់២ដង និងឈ្នះជើងឯកខេមបូឌានលីគខាប់២ ដង ព្រមទាំងបានជួយក្លិបឈានដល់វគ្គពាក់កណ្តាលផ្តាច់ព្រ័ត្រពានរង្វាន់ AFC Cup រដូវកាល២០២៣-២៤ប្រចាំតំបន់អាស៊ាន៕