កីឡា

មុនប៉ះកម្ពុជាថ្ងៃទី៨ធ្នូនេះ ម៉ាឡេស៊ី គ្មានកីឡាករមកពីក្លិបយក្ស Johor Darul

បានផុស

៤ ខែ មុន

នៅ

ថ្ងៃពុធ ៤ ធ្នូ ២០២៤

ដោយ

ក្លិបបាល់ទាត់យក្ស Johor Darul Ta’zim មិនអនុញ្ញាតឲ្យកីឡាករជម្រើសទី១របស់ខ្លួនចូលរួមជាមួយក្រុមបាល់ទាត់ជម្រើសជាតិម៉ាឡេស៊ី ក្នុងពានរង្វាន់ ASEAN Mitsubishi Electric Cup ដែលនឹងចាប់ផ្តើមនៅថ្ងៃទី៨ ខែធ្នូ ឆ្នាំ២០២៤។

សហព័ន្ធកីឡាបាល់ទាត់ម៉ាឡេស៊ីបានចេញបញ្ជីឈ្មោះកីឡាករចំនួន២៦រូប ក្នុងនោះមានកីឡាករ៣រូបមកពីក្រៅប្រទេស ប៉ុន្តែក្លិបធំសំបូរកីឡាករល្អៗ Johor Darul Ta’zim បានផ្តល់ឲ្យកីឡាករយុវជនអាយុក្រោម២៣ឆ្នាំតែ២រូបប៉ុណ្ណោះ។ ចំពោះកីឡាករជម្រើសទី១មានរហូតដល់៧នាក់គឺមិនអនុញ្ញាតឲ្យចូលរួមជាមួយក្រុមជម្រើសជាតិឡើយ ដោយសារក្លិបធំមួយនេះមានភារកិច្ចសំខាន់ក្នុងពានរង្វាន់លំដាប់ទី១ប្រចាំទ្វីបអាស៊ី AFC Champions League Elite។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករទាំង៧នាក់សុទ្ធតែល្អៗរបស់ Johor Darul Ta’zim គឺអ្នកចាំទី Syihan Hazmi អាយុ២៨ឆ្នាំ, ខ្សែបម្រើស្លាប Arif Aiman អាយុ២២ឆ្នាំ, ខ្សែបម្រើស្លាបស្ទាំ Matthew Davies អាយុ២៩ឆ្នាំ, ខ្សែបម្រើកណ្តាល Feroz Baharudin ២៤ឆ្នាំ, ខ្សែបម្រើស្លាបឆ្វេង La’Vere Corbin-Ong អាយុ៣៣ឆ្នាំ, ខ្សែបម្រើកណ្តាល Natxo Insa អាយុ៣៨ឆ្នាំ និងខ្សែប្រយុទ្ធ Romel Morales អាយុ២៧ឆ្នាំ។

ទោះបីជាយ៉ាងណា ម៉ាឡេស៊ី បានកោះហៅកីឡាករមកពីក្រៅប្រទេស៣នាក់។ កីឡាករដើមកំណើតប្រេស៊ីល Endrick ដែលជាខ្សែបប្រយុទ្ធនៅក្លិបវៀតណាម Ho Chi Minh City។ កីឡាករ Muhammad Khalil ជាខ្សែបម្រើក្លិប FC Osaka ប្រទេសជប៉ុន និងកីឡាករដើមកំណើតតស្កុតឡែន Fergus Tierney កំពុងលេងជាខ្សែប្រយុទ្ធនៅក្លិប Chonburi ប្រទេសថៃ។

ម៉ាឡេស៊ី ស្ថិតនៅពូល A ជាមួយ កម្ពុជា ថៃ សិង្ហបុរី និងទីម័រខាងកើត ក្នុងពានរង្វាន់លំដាប់ទី១អាស៊ាន ASEAN Mitsubishi Electric Cup ដែលការប្រកួតបើកឆាក កម្ពុជា នឹងទ្វារពហុកីឡដ្ឋានជាតិអូឡាំពិក ទទួល ម៉ាឡេស៊ី វេលាម៉ោង៥:៤៥នាទីល្ងាច ថ្ងៃទី៨ ខែធ្នូ ខណៈនៅថ្ងៃដដែល ទីម័រខាងកើត បើកទ្វារកីឡដ្ឋាន Hang Day នៅទីក្រុងហាណូយ ទទួលក្រុមខ្លាំងថៃ វេលាម៉ោង៨យប់៕