កីឡា

ព្រឹកនេះ ក្រុមកម្ពុជាចេញដំណើរទៅសិង្ហបុរីជាមួយទំនុកចិត្តខ្ពស់

បានផុស

៤ ខែ មុន

នៅ

ថ្ងៃចន្ទ ៩ ធ្នូ ២០២៤

ដោយ

ក្រុមបាល់ទាត់ជម្រើសជាតិកម្ពុជាចេញដំណើរទៅប្រទេសសិង្ហបុរី នៅព្រឹកថ្ងៃទី៩ ខែធ្នូ ឆ្នាំ២០២៤ ដើម្បីប្រកួតលើកទី២ វគ្គសន្សំពិន្ទុក្នុងពូល A ពានរង្វាន់ ASEAN Championship ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការធ្វើដំណើរទៅប្រទេសសិង្ហបុរីអាចត្រូវបានចាត់ទុកជាទៅប្រកួតពោរពេញដោយភាពជឿជាក់ និងទំនុកចិត្តខ្ពស់សម្រាប់ក្រុមបាល់ទាត់ជម្រើសជាតិកម្ពុជា បន្ទាប់ពីរកបាន១ពិន្ទុពីក្រុមខ្លាំងម៉ាឡេស៊ី កាលពីយប់ថ្ងៃទី៨ ខែធ្នូ ឆ្នាំ២០២៤ នៅពហុកីឡដ្ឋានជាតិអូឡាំពិក។

តាមរយៈការសម្រិតសម្រាំងកីឡាករ និងទទួលបានកីឡាករបរទេសចូលសញ្ជាតិខ្មែរបានធ្វើឲ្យសមត្ថភាពរបស់ក្រុមកម្ពុជាកើនឡើងគួរឲ្យកត់សំគាល់រហូតអាចរកបាន១ពិន្ទុពីក្រុមជម្រើសជាតិម៉ាឡេស៊ី បន្ទាប់ពីស្មើគ្នា ២-២។ រយៈពេល៥៤ឆ្នាំពោលគឺតាំងពីឆ្នាំ១៩៧០មក កម្ពុជាមិនធ្លាប់ឈ្នះ ឬស្មើ ម៉ាឡេស៊ីឡើយគឺចាញ់រហូត ប៉ុន្តែពេលនេះបង្កើតបានស្ថិតិថ្មីមួយហើយ។

កន្លងមក សិង្ហបុរី មានសមត្ថភាព និងបច្ចេកទេសមិនលើសកម្ពុជាប៉ុន្មានឡើយ ប៉ុន្តែនៅមានកម្រិតទាបជាងម៉ាឡេស៊ី។ យ៉ាងណា បច្ចុប្បន្ននេះ កម្ពុជាកំពុងអភិវឌ្ឍក្រុមបានយ៉ាងល្អ ដូច្នេះអាចមានសង្ឃឹមក្នុងការរកបានពិន្ទុពីម្ចាស់ផ្ទះសិង្ហបុរី។ ជាពិសេសខ្សែប្រយុទ្ធ Andres Neito ដែលរបួសមិនបានបង្ហាញខ្លួនពេលប្រកួតជាមួយ ម៉ាឡេស៊ី ក៏មានវត្តមានធ្វើដំណើរទៅប្រទេសសិង្ហបុរីដែរ។ ប្រសិនបើរូបគេជាសះស្បើយពីរបួស និងអាចលេងបាននោះគឺរឹតតែប្រសើរសម្រាប់កម្ពុជា។

ការជួបគ្នាថ្ងៃទី១១ ខែធ្នូ ខាងមុខនេះគឺជាការប្រកួតលើកទី២របស់កម្ពុជាវគ្គសន្សំពិន្ទុក្នុងពូល A ប៉ុន្តែជាការប្រកួតលើកទី១របស់សិង្ហបុរី។ អ្វីដែលសិង្ហបុរីមានប្រៀបនោះគឺពួកគេមានកម្លាំងស៊ុហ្វ និងកីឡាករពេញជើងល្អ ដោយសារមិនទាន់បានប្រកួតម្តងណាឡើយ។

ឆ្លងកាត់១ប្រកួតកន្លងទៅ កម្ពុជាមាន១ពិន្ទុ កំពុងស្ថិតនៅលេខ២ ខណៈថៃមាន៣ពិន្ទុ ឈរលេខ១ បន្ទាប់ពីបំបាក់ ទីម័រខាងកើត យ៉ាងចាស់ ដោយលទ្ធផល ១០-០ ខណៈម៉ាឡេស៊ីមាន១ពិន្ទុឈរលេខ៣ ហើយទីម័រខាងកើតស្ថិតនៅបាតតារាង។

សូមបញ្ជាក់ថា ជំនួបរវាងម្ចាស់ផ្ទះ សិង្ហបុរី និង កម្ពុជា ធ្វើនៅវេលាម៉ោង៦ល្ងាច ថ្ងៃទី១១ ខែធ្នូ ឆ្នាំ២០២៤ នៅកីឡដ្ឋាន National Stadium៕