អតីតខ្សែការពារ Liverpool ជឿថា Arnold នឹង បន្ដ​នៅ​ជាមួយក្លិប

ខ្សែការពារ Trent Alexander-Arnold អាចបន្ដស្នាក់នៅជាមួយក្រុមហង្សក្រហម Liverpool ទៀត ប្រសិនបើរូបគេឈ្នះពានរង្វាន់ Premier League ក្នុងរដូវកាលនេះ។

អនាគតរបស់ Alexander-Arnold នៅតែជាប្រធានបទក្ដៅ ខណៈកីឡាករ​អង់គ្លេសឈាន​ដល់ឆ្នាំចុងក្រោយនៃកិច្ចសន្យា​ជា​មួយ​ Liverpool ហើយមិនទាន់យល់ព្រមលើការបន្តកិច្ចសន្យាថ្មីទេ។ ក្លិប Real Madrid ត្រូវបានគេរាយការណ៍​ពី​ការ​ចាប់អារម្មណ៍ ខែ្សការពារវ័យ២៦ឆ្នាំរូបនេះ ដោយគ្មានតម្លៃខ្លួននៅពេលបញ្ចប់នៃរដូវកាល។

Liverpool បច្ចុប្បន្នកំពុងរីករាយនឹងរដូវកាលដ៏ត្រចះត្រចង់ ក្រោមការដឹកនាំរបស់គ្រូបង្វឹកថ្មីលោក Arne Slot ។ ក្រុមហង្សក្រហមកំពុងឈរនៅលើកំពូលតារាង Premier League និងស្ថិតក្នុងចំណាត់ថ្នាក់លេខ១ ក្នុងតារាងក្របខ័ណ្ឌ Champions League ជាមួយនឹងកំណត់ត្រាដ៏ល្អឥតខ្ចោះ បន្ទាប់ពីឈ្នះទាំង៦ប្រកួត។

អតីតខ្សែការពារក្រុម Liverpool លោក Glen Johnson បានបង្ហាញចំណាប់អារម្មណ៍ថា ប្រសិនបើ Alexander-Arnold អាចឈ្នះ Premier League ជាលើកទី២ គាត់នឹងបន្តកុងត្រាថ្មី​ជា​មួយក្លិបអង់គ្លេស។

លោក Glen Johnson បានប្រាប់ BetFred បាន​និយាយ​ថា ៖«បើ Liverpool ឈ្នះ Premier League នោះខ្ញុំជឿថា គាត់នឹង​បន្ត​ស្នាក់នៅ។ ខ្ញុំ​មិន​គិត​ថា​ គាត់​ចង់​ចាកចេញ​ទេ ហើយ​ខ្ញុំ​គិតថា Liverpool ក៏មិនចង់​ឱ្យ​គាត់​ចាកចេញ​ដែរ»។

Alexander-Arnold មិនមែនជាកីឡាករសំខាន់តែមួយគត់របស់ Liverpool ដែលឈានទៅដល់ប៉ុន្មានខែចុងក្រោយនៃកិច្ចសន្យា។ សូម្បី​ខ្សែការពារ Virgil van Dijk និង Mohamed Salah ដូចគ្នា​ដែរ៕

ប្រែសម្រូល៖ ផា រតនា​