កីឡា

កម្ពុជា នឹងបើកវគ្គបណ្តុះបណ្តាល៤លើកត្រៀម«ពានរង្វាន់សម្តេចបវរធិបតី»លើកទី២

បានផុស

២ នាទីutes មុន

នៅ

ថ្ងៃព្រហស្បតិ៍ ១២ ធ្នូ ២០២៤

ដោយ

គណៈកម្មការរៀបចំការប្រកួតកីឡាយុទ្ធគុនចម្រុះខ្មែរបុរាណ«ពានរង្វាន់បវរធិបតី» គ្រោងបើកវគ្គបណ្តុះបណ្តាលចំនួន៤លើកដើម្បីត្រៀមឆ្ពោះទៅរៀបចំការប្រកួតលើកទី២ នៅឆ្នាំ២០២៥ ឲ្យកាន់តែទទួលបានជោគជ័យ និងធំទូលំទូលាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីជូនដំណឹងរបស់សហព័ន្ធកីឡាយុទ្ធគុនចម្រុះកម្ពុជាបានបង្ហាញថា វគ្គបណ្តុះបណ្តាលជំនាញគឺមានចំនួន៥។ ទី១ វគ្គបណ្តុះបណ្តាលស្តីពីបច្ចេកទេសយុទ្ធគុនចម្រុះខ្មែរបុរាណ នៅក្នុងខែមករា, ទី២ វគ្គបណ្តុះបណ្តាលអាជ្ញាកណ្តាល-ចៅក្រម នៅក្នុងខែមីនា, ទី៣ វគ្គបណ្តុះបណ្តាលបច្ចេកទេសយុទ្ធគុនចម្រុះខ្មែរបុរាណ នៅក្នុងខែឧសភា និងទី៤ វគ្គបណ្តុះបណ្តាលអាជ្ញាកណ្តាល-ចៅក្រម នៅក្នុងខែសីហា ឆ្នាំ២០២៥។

ទន្ទឹមជាមួយនឹងវគ្គបណ្តុះបណ្តាលជំនាញខាងលើ គណៈកម្មការរៀបចំការប្រកួតចាប់ផ្តើមការងារចាប់ពីចុងឆ្នាំ២០២៤នេះទៅមានដូចជា សម្រេចលើទីលានប្រកួត កាលបរិច្ឆេទប្រកួត និងកែសម្រួលបទបញ្ជា បច្ចេកទេស-បញ្ជាការប្រកួត។ ចូលដល់ខែកុម្ភៈ ឆ្នាំ២០២៥ នឹងរៀបចំសន្និសីទសារព័ត៌មានស្តីពីការប្រកួតលើកទី២, នៅក្នុងខែមេសាសម្រេចលើគម្រោងថវិការៀបចំការប្រកួត, ចន្លោះខែមិថុនា-កក្កដា នឹងបើកចុះឈ្មោះការប្រកួត និងចុងក្រោយធ្វើសន្និសីទសារព័ត៌មានលើកទី២នៅក្នុងខែកញ្ញា។

តាមការកំណត់ ព្រឹត្តិការណ៍ប្រកួតកីឡាយុទ្ធគុនចម្រុះខ្មែរបុរាណ«ពានរង្វាន់បវរធិបតី»លើកទី២ នឹងធ្វើនៅក្នុងខែតុលា ឆ្នាំ២០២៥។ ព្រឹត្តិការណ៍ប្រកួតកីឡាយុទ្ធគុនចម្រុះខ្មែរបុរាណ«ពានរង្វាន់បវរធិបតី»លើកទី១បានធ្វើពីថ្ងៃទី១៨-១៩-២០ ខែតុលា ឆ្នាំ២០២៤ នៅវិមានពហុកីឡដ្ឋានជាតិអូឡាំពិក រាជធានីភ្នំពេញ ដោយមានអត្តពលិកចំនួន៤៨២នាក់ (កីឡាករចំនួន៣៤៨នាក់ និងកីឡាការិនីចំនួន៧៧នាក់។ ព្រឹទ្ធាចារ្យយុទ្ធគុន៣៥នាក់ គ្រូបង្វឹកចំនួន៥៧នាក់ និងអាជ្ញាកណ្តាល ចៅក្រម មន្ត្រីបច្ចេកទេស និងគ្រូពេទ្យចំនួន១៧១នាក់។

ការប្រកួតចែកចែកជា៤ប្រភេទកីឡា ស្មើនឹង១៤វិញ្ញាសាគឺ១-ការប្រកួតស្ម័គ្រចិត្តបុរសចំនួន៤វិញ្ញាសាគឺទម្ងន់-៥០គីឡូក្រាម -៦០គីឡូក្រាម -៦៥គីឡូក្រាម និង-៧០គីឡូក្រាម។ ២-ការប្រកួតស្ម័គ្រចិត្តនារីចំនួន៤វិញ្ញាសាគឺ-៤៥គីឡូក្រាម -៥០គីឡូក្រាម -៥៥គីឡូក្រាម និង-៦០គីឡូក្រាម។ ៣-ការប្រកួតប្រយុទ្ធអាជីពបុរសចំនួន២វិញ្ញាសាគឺ -៦៧គីឡូក្រាម និង-៧៥គីឡូក្រាម និង៤-ការប្រកួតសម្តែងចំនួន៤វិញ្ញាសាគឺ ថ្វាយបង្គំគ្រូឯកត្តជន មេគុនដៃឯកត្តជន មេគុនអាវុធក្រុម៣នាក់ និងមេគុនសមយុទ្ធក្រុម៥នាក់។

ប្រាក់រង្វាន់ការប្រកួតអាជីពជ័យលាភីមេដាយមាសទទួលបាន១២លានរៀល, ជ័យលាភីមេដាយប្រាក់ ទទួលបាន៨លានរៀល និងជ័យលាភីមេដាយសំរិទ្ធទទួលបាន៤លានរៀល។ សម្រាប់ប្រាក់រង្វាន់ការប្រកួតស្ម័គ្រចិត្ត ជ័យលាភីមេដាយមាស ទទួលបាន៨លានរៀល, ជ័យលាភីមេដាយប្រាក់ទទួលបាន៦លាន និងជ័យលាភីមេដាយសំរិទ្ធទទួលបាន៤លាន។ ជាមួយគ្នានេះអត្តពលិកឆ្នើមប្រចាំវិញ្ញាសានីមួយៗ និងអាជ្ញាកណ្តាលឆ្នើមប្រចាំព្រឹត្តិការណ៍ទទួលបានពាន១ និងម៉ូតូ១គ្រឿងដូចគ្នា៕