កីឡា

សួន ចាន់ណារ៉ូ ប្រាប់ថា សមត្ថភាព កែវ ស្រេងលីហ៊ួរ ស្ទើរល្អជាងខ្លួន

បានផុស

២ ខែ មុន

នៅ

ថ្ងៃពុធ ២៥ ធ្នូ ២០២៤

ដោយ

កីឡាករប៉ះសេដ៏ឆ្នើម សួន ចាន់ណារ៉ូ បានចាត់ទុកកីឡាករវ័យក្មេង កែវ ស្រេងលីហ៊ួរ មានកម្រិតសមត្ថភាពលើជំនាញប៉ះសេ និងការធ្វើជារនាំងគឺស្ទើរលើកម្រិតសមត្ថភាពរបស់ខ្លួនថែមទៀត។

ការលើកឡើងរបស់ សួន ចាន់ណារ៉ូ បានកើតមានឡើង បន្ទាប់ពីក្រុមបាល់ទះនគរបាលខេត្តស្វាយរៀង បានប្រកួតជាមួយ សមាគមបាល់ទះក្រសួងមហាផ្ទៃ ក្នុងវគ្គផ្តាច់ព្រ័ត្រ ពានរង្វាន់ក្រឡាហោម ស ខេង លើកទី៣ កាលពីថ្ងៃទី២៣ ខែធ្នូ ឆ្នាំ២០២៤។ ការប្រកួតបានបញ្ចប់ទៅដោយក្រុមខេត្តស្វាយរៀងបានវាយបកយកឈ្នះដោយលទ្ធផល ៣-២ បន្ទាប់ពីក្រសួងមហាផ្ទៃបាននាំមុខ ០-២ ទៅហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សួន ចាន់ណារ៉ូ បានឲ្យដឹងថា ក្រុមខេត្តស្វាយរៀងបានប្រមូលកីឡាករចូលរួមហ្វឹកហាត់ជាមួយគ្នារយៈពេលខ្លីប៉ុណ្ណោះដើម្បីត្រៀមប្រកួតពានរង្វាន់សម្តេចក្រឡាហោម ស ខេង ឆ្នាំ២០២៤។ ចំណែក សមាគមបាល់ទះក្រសួងមហាផ្ទៃជាក្រុមដែលបានហ្វឹកហាត់ជាមួយគ្នាយូរមកហើយ និងជាម្ចាស់ការពារជើងឯកឆ្នាំចាស់ថែមទៀត។

សួន ចាន់ណារ៉ូ បាននិយាយក្នុងបទសម្ភាសថា ៖«សម្រាប់ខ្ញុំផ្ទាល់គឺមិននឹកស្មានដល់ទេ ពីព្រោះឡើងមកដល់វគ្គនេះ ក្រសួងមហាផ្ទៃល្អខ្លាំងមែនទែន។ ខាងស្វាយរៀងខ្ញុំគឺកីឡាករលក្ខណៈក្រៅផ្លូវការ ក្នុងផ្លូវការផង យកមកបញ្ចូលគ្នា។ ការលេងគឺពិបាក ជួបក្រសួងមហាផ្ទៃ ពួកគេហាត់ជុំគ្នារាល់ថ្ងៃយូរហើយ។ គេមានកីឡាករលេចធ្លោគឺ មឿន ម៉េងឡាយ និង ធី ម៉េងហួស ហើយ កែវ ស្រេងលីហ៊ួរ ដែលជាអ្នកប៉ះសេ គឺកម្រិតសមត្ថភាពរបស់គាត់ចង់ស្មើខ្ញុំដែរ។ និយាយរួមចង់លើខ្ញុំទៀត បូកទាំងការធ្វើរនាំងផង»។

នេះមិនមែនជាលើកទី១ទេដែល សួន ចាន់ណារ៉ូ បានសរសើរពីសិស្សប្អូន កែវ ស្រេងលីហ៊ួរ។ កន្លងមកអតីតប្រធានក្រុមជម្រើសជាតិកម្ពុជាសម្លឹងឃើញកីឡាករវ័យក្មេងរបស់ក្រសួងមហាផ្ទៃអាចស្នងតំណែងជាអ្នកប៉ះសេរបស់ខ្លួនបាននៅក្រុមបាល់ទះជម្រើសជាតិកម្ពុជា។ ទោះបីជាយ៉ាងណា កីឡាករវ័យក្មេងរូបនេះនៅស្ទើរទាំងបទពិសោធលើទីលាន និងជាស្មារតីមិនទាន់ធ្ងន់។

ជ័យលាភីមានដូចខាងក្រោម៖

ជើងឯក៖ ក្រុមខេត្តស្វាយរៀង ទទួលបានពាន មេដាយមាស និងប្រាក់រង្វាន ៥០លានរៀល
ជើងឯករង៖ ក្រសួងមហាផ្ទៃ ទទួលបានមេដាយប្រាក់ និងប្រាក់រង្វាន់ ២០លានរៀល
លេខ៣៖ ក្រុមបញ្ជាការដ្ឋានអង្គរក្ស (A) ទទួលបានមេដាយសំរិទ្ធ និងប្រាក់រង្វាន់ ១២លានររៀល
កីឡាករបិទកណ្តាលល្អបំផុត៖ ឈាង ជីវែង មកបញ្ជាការដ្ឋានអង្គរក្ស (A)
កីឡាករបិទកណ្តាលល្អបំផុត៖ ផល រតនៈ មកពីក្រុមខេត្តតាកែវ
កីឡាករប៉ះសេល្អបំផុត៖ សួន ចាន់ណារ៉ួ មកពីក្រុមខេត្តស្វាយរៀង
កីឡាករលីប៊ើរ៉ូល្អបំផុត៖ ឃឹម សុវណ្ណដារ៉ា មកពីក្រុមខេត្តស្វាយរៀង
កីឡាករវាយផ្តាច់ស្តាំល្អបំផុត៖ Herera មកពីក្រុមខេត្តស្វាយរៀង
កីឡាករវាយផ្តាច់ស្តាំល្អបំផុត៖ គួន ម៉ុម មកពីក្រុមខេត្តតាកែវ
កីឡាករវាយផ្តាច់ឆ្វេងល្អបំផុត៖ ធី ម៉េងហួង មកពីក្រសួងមហាផ្ទៃ
កីឡាករល្អបំផុតប្រចាំព្រឹត្តិការណ៍៖ ធី ម៉េងហួង មកពីក្រសួងមហាផ្ទៃ