ជើង​ខ្លាំង​គុន​ខ្មែរ​១០​រូប​លេច​ធ្លោ​​ខ្លាំង​ក្នុង​ឆ្នាំ​២០២៤

ឆ្នាំ​២០២៤​អាច​​ចាត់​ទុក​ជាពេកវេលា​​ដែលគុន​ខ្មែរ​​លេច​មុខ​មាត់​លើ​ឆាក​អន្តរជាតិ​កាន់​តែ​ខ្លាំង បន្ទាប់​ពី​មាន​​ការ​រៀបចំព្រឹត្តិការណ៍​ប្រកួត​គុន​ខ្មែរ​ជា​ច្រើន​នៅ​ក្រៅ​ប្រទេស​។ ក្នុង​នោះ​កីឡាករ​គុន​ខ្មែរ​​ជា​​ច្រើន​រូប​នេះ​ទទួល​បាន​ឱកាស​ប្រកួត​នៅ​ក្នុង​ប្រទេស​ និង​ក្រៅ​ប្រទេស​ដែល​នាំ​សមិទ្ធផល​សម្រាប់​ខ្លួន​ឯង គ្រួសារ និង​សង្គម​ជាតិ។ ថ្ងៃ​នេះ​សារព័ត៌មាន​«កម្ពុជា​ថ្មី»​សូម​​បង្ហាញ​កីឡាករ​១០​រូប​​គួរ​ឲ្យ​ចាប់​អារម្មណ៍​ក្នុង​ឆ្នាំ​២០២៤។​

• ១. អេ អាំម៉ារីនភូថង

ការ​ឈ្នះ​ខ្សែ​ក្រវាត់ និង​រថយន្ត​ថ្មី​សន្លាង​​១​គ្រឿង​កាល​ពី​ចុង​ឆ្នាំ​២០២៣ អេ អាំម៉ារីន​ភូថង នៅ​តែ​បន្ត​ក្តោប​ក្តាប់​​សមិទ្ធផល​​​ធំ​បន្ថែម​ទៀត​ក្នុង​​ឆ្នាំ​២០២៤។ រូប​គេ​បាន​ឈ្នះ​​ខ្សែ​ក្រវាត់គុន​ខ្មែរ​អន្តរជាតិ​ បន្ទាប់​ពី​ឈ្នះ​កីឡាកររុស្ស៊ី Ovanes Nagabedyan ក្នុង​ទឹក​ទី​១ និង​​សង​សឹក​បាន​សម្រេច​លើ​មិត្ត​រួម​ជាតិ​ ឡុង សំណាង ដើម្បី​ទទួល​បាន​ខ្សែ​ក្រវាត់​សហព័ន្ធ​កីឡា​ប្រដាល់​គុន​ខ្មែរ ក្នុង​ខែ​ឧសភា ជា​មួយ​ប្រាក់​រង្វាន់​២០លាន​រៀល។ អេ អាំម៉ារីនភូថង បាន​ឈ្នះ​ខ្សែ​ក្រវាត់គុន​ខ្មែរ​មួយ​​​ទៀត​ កាល​ពី​ថ្ងៃ​ទី​១៤ ខែ​ធ្នូ និង​ក្លាយ​ជា​កីឡាករ​ប្រកួត​មិន​ចាញ់​នៅ​ក្រៅ​ប្រទេស​ក្នុង​ឆ្នាំ​២០២៤។

• ២. ហុងសុវណ្ណ ចាន់សុធី

ឆ្នាំ​២០២៤ អាច​ចាត់​ទុក​ជា​ពេល​វេលា​ឈាន​ដល់​កម្រិត​កំពូលរបស់​អ្នក​ប្រដាល់ ហុងសុវណ្ណ ចាន់សុធី។ កីឡាករ​រូប​នេះ​ទទួល​បាន​ឱកាស​ប្រកួត​ជា​ញឹក​ញាប់​​នា​ឆ្នាំ​កន្លង​មក​ ប៉ុន្តែ​អ្នក​គាំទ្រ​មិន​សូវ​ជា​ផ្ទុះ​ការ​ចាប់​អារម្មណ៍​ខ្លាំង​ទេ​ដោយសារ​ក្បាច់​​វ៉ៃ​តាម​បច្ចេកទេស​មួយ​ៗ។ ទោះ​បី​ជា​យ៉ាង​ណា ​អ្នក​គាំទ្រ​បាន​ភ្ញាក់​ផ្អើល​ក្នុង​ព្រឹត្តិការណ៍​ប្រកួត​ដណ្តើម​​រង្វាន់​រថយន្ត​ដែល​រូប​គេ​បាន​ផ្តួល​ជើង​ខ្លាំង​ជា​បន្ត​បន្ទាប់​រហូត​ក្លាយ​ជា​ម្ចាស់​រថយន្ត​ដ៏​​ថ្មី​សន្លាង​​។ ចាប់​តាំង​ពី​ពេល​នោះមក ចាន់សុធី ​​ទទួល​បាន​ឱកាស​ប្រកួត​​ជា​បន្ត​បន្ទាប់​ទាំង​ក្នុង​ស្រុក និង​ក្រៅ​ប្រទេស។

• ៣. ឈឿង ល្វៃ

ជាង​១០​ប្រកួត​ក្នុង​ឆ្នាំ​២០២៤ ឈឿង ល្វៃ ​បានចាញ់​​តែ​​២​ប៉ុណ្ណោះ​ ក្នុង​នោះ​រូប​គេ​បានក្លាយ​​​ជា​កីឡាករ​គុន​ខ្មែរ​តែ​ម្នាក់​គត់​ដែល​បាន​ឈ្នះ​ខ្សែ​ក្រវាត់​២​ខ្សែ​នៅ​ទី​ក្រុង​ហុងកុង ប្រទេស​ចិន។ រូប​គេ​បាន​ឈ្នះ​ខ្សែ​ក្រវាត់​ម៉ារ៉ាតុង World Super-4 ទម្ងន់​៧២​គីឡូក្រាម​លើក​ទី​១ ​នៅ​ខែ​មីនា និង​លើក​ទី​២​នៅ ​ខែ​មិថុនា ឆ្នាំ​២០២៤។ ​ក្រៅ​តែ​ពី​ឈ្នះ​ខ្សែ​ក្រវាត់ និង​ពាន​រង្វាន់​ផ្សេងៗ ឈឿង ក៏​បាន​ឈ្នះ​មេដាយ​មាស ក្នុង​​ព្រឹត្តិការណ៍​ប្រកួត​កីឡា​យុទ្ធ​គុន​ចម្រុះ​ខ្មែរ​បុរាណ​ ពាន​រង្វាន់​សម្តេច​ធិបតី​ឆ្នាំ​២០២៤។

• ៤. ម៉ឺន មេឃា

ម៉ឺន មេឃា ជា​កីឡាករ​ពហុជំនាញ​ដែល​ទទួល​បាន​សមិទ្ធផល​ទាំង​ផ្ទាល់​ខ្លួន និង​ជូន​ជាតិ។ ជា​ម្ចាស់​មេដាយ​មាស​ស៊ីហ្គេម​២​​រដូវ​កាល​ជាប់​គ្នា​លើ​ប្រភេទ​កីឡា​វ៉ូវីណាម រូប​គេ​​ចាប់​ប្រកួត​ឃីក​បុក​ស៊ីង​ដោយ​មិន​ទាន់​ស្គាល់​បរាជ័យ​សោះ ហើយ​ក៏​បន្ត​ជោគជ័យ​លើ​ការ​ប្រកួត​គុន​ចម្រុះ​​ថែម​ទៀត​ដែល​រូប​គេ​បាន​ឈ្នះ​មេដាយ​មាស​ក្នុង​ព្រឹត្តិការណ៍​ប្រកួត​យុទ្ធ​គុន​ចម្រុះ​ខ្មែរ​បុរាណ​ ពាន​រង្វាន់​សម្តេច​ធិបតី​ឆ្នាំ​២០២៤។

• ៥. បឺត​ សង្ឃឹម

រឿង​​​គួរ​ឲ្យ​សោក​ស្តាយ​សម្រាប់ បឺត សង្ឃឹម ក្នុង​ឆ្នាំ​២០២៤​ គឺ​ចាញ់​កីឡាករថៃ Yothin កាល​ពី​ខែ​កុម្ភៈ​ធ្វើ​ឲ្យ​រូប​គេ​មិន​ទទួល​បាន​ខ្សែ​ក្រវាត់ WBC ប៉ុន្តែ​ចាប់​តាំង​ពី​នោះ​មក កីឡាករ​រូប​នេះ​នៅ​​រក្សា​​បច្ចេកទេស​ដ៏​ពិសេស​ស្ទើរ​គ្មាន​នរណា​ដូច។ រូប​គេ​បាន​យក​ឈ្នះ​មិត្ត​រួម​ជាតិ ពេជ្រ ប៊ុនសិទ្ធ ​ដើម្បី​ក្លាយ​ជា​ម្ចាស់​ខ្សែ​ក្រវាត់ហនុមាន​អម​ដោយ​ប្រាក់​រង្វាន់២០​លានរៀល​កាល​ពី​ខែ​កញ្ញា ​នៅ​សង្វៀន​បាយ័ន។ នៅ​ខែសីហា រូប​គេ​បាន​យក​ឈ្នះ​មិត្ត​រួម​ជាតិ វ៉ាន់ វឿន ដើម្បី​ទទួល​បាន​រង្វាន់​រថយន្ត​១​គ្រឿង​នៅ​សង្វៀន​បាយ័ន ព្រម​ទាំង​ឈ្នះ​ខ្សែ​ក្រវាត់គុន​ខ្មែរ​ Extreme នៅ​សង្វៀន​ហង្សមាស។ រូប​គេ​បាន​​ប្រកួត​ជា​មួយ​កីឡាករ​បរទេស​ស្ទើរ​គ្មាន​ខែ​ណា​ដែល​មិន​ឡើង​សង្វៀន​​ឡើយ។ ​

• ៦. ឈុត សេរីវ៉ាន់ថង

ឈុត សេរីវ៉ាន់ថង មិន​សូវ​ជា​ទទួល​បាន​សមិទ្ធផល​ធំ​ទេ​នៅ​ក្នុង​ឆ្នាំ​២០២៤ ប៉ុន្តែ​រូប​គេ​នៅ​តែ​ទទួល​បាន​ឱកាស​ឡើង​សង្វៀន​ជា​បន្ត​បន្ទាប់។ រូប​គេ​បាន​ឈ្នះ​កីឡាករ​បារាំង Omar Driss និង​ឈ្នះ​មិត្ត​រួម​ជាតិ ឃីម បូរ៉ា ​ដើម្បី​ទទួល​បាន​ខ្សែ​ក្រវាត់​មួយ​នៅ​ប្រទេស​បារាំង។ ទោះ​បី​ជា​យ៉ាង​ណា ការប្រកួត​ជុំ​ចុង​ក្រោយ​ដែល​ជា​​ឱកាស​ដណ្តើម​រង្វាន់​រថយន្ត​នោះ រូប​គេ​បាន​ចាញ់​កីឡាករ​អេស្ប៉ាញ​​ក្នុង​ទឹក​ទី១​នៅ​ប្រទេស​បារាំង​​។ បន្ទាប់​មក ឈុត សេរីវ៉ាន់ថង ​បាន​ចាញ់​កីឡាករ​​ Hisai Taimu ក្នុង​ទឹក​ទី១​នៅ​ប្រទេសជប៉ុន។ យ៉ាង​ណា សម្រាប់​ការ​ប្រកួត​ក្នុង​ស្រុក រូប​គេ​មិន​​ធ្លាប់​ចាញ់​ឡើយ​ក្នុង​ឆ្នាំ​២០២៤។

• ៧. លន បញ្ញា

លន បញ្ញា​ ជា​កីឡាករ​ប្រដាល់​មួយ​រូប​ដែល​រក្សា​បាន​សមត្ថភាព​បាន​យ៉ាង​ល្អ​ក្នុង​រយៈ​ពេល​ប៉ុន្មាន​ឆ្នាំ​ចុង​ក្រោយ​។ រូប​គេបាន​ឡើង​សង្វៀន​ប្រហែល​​១៥​ដង​ក្នុង​ឆ្នាំ​២០២៤​ដែល​ចាញ់​តែ​២​ដង​គត់។ រូប​គេ​បាន​ផ្តួល​មិត្ត​រួម​ជាតិ​ ឡុង សំណាង​ ដើម្បី​ទទួល​បាន​ខ្សែ​ក្រវាត់។ រូប​គេ​បានឈ្នះ​ជើង​ខ្លាំង​ថៃ​ជា​ច្រើន​រូប ក្នុង​នោះ​គឺ​ស្មើ​ជា​មួយ​ជើង​ខ្លាំង​បារាំង Anthony Defretin ដែល​ធ្លាប់​ឈ្នះ ឡៅ ចិត្រា និង​ជា​ម្ចាស់​មេដាយ​មាស​កីឡា​ជាតិ ឆ្នាំ​២០២៤។

• ៨. ពេជ្រ សម្បត្តិ

ពេជ្រ សម្បត្តិ បាន​ប្រកួត​ប្រហែល​ជា​៣៥​​ដង​នៅ​ក្នុង​ឆ្នាំ​២០២៤ គិត​ទាំងគម្រោង​​ប្រកួត​ជា​មួយ​កីឡាករ តៃម៉ូ នៅ​ថ្ងៃ​ទី​៣០ ខែ​ធ្នូ នៅ​ប្រទេស​ជប៉ុន ទាំង​ការ​ប្រកួត​កីឡា​ជាតិ​លើក​ទី​៤​ និង​ការ​ប្រកួត​ជ្រើស​រើស​ជើង​ឯក​ថ្នាក់​ជាតិ។ តម្លៃ​ខ្លួន​សរុប​ពី​ការ​ប្រកួត​ជាង​៣០​ដង​គឺ​ប្រហែលជាង​៦​ម៉ឺន​ដុល្លារ​អាមេរិក។ រូប​គេ​បាន​ឈ្នះ​ខ្សែ​ក្រវាត់ជា​ច្រើន​ ឈ្នះ​​មេដាយ​មាស​​កីឡា​ជាតិ និង​ឈ្នះ​មេដាយ​មាស​ជើង​ឯក​ជាតិ។

• ៩. ព្រុំ សំណាង

ព្រុំ​ សំណាង នៅ​តែ​ឈរ​ជើង​ជា​កីឡាករ​ល្អ​​ក្នុង​​​ទម្ងន់​ធ្ងន់​​នៅ​​​ប្រទេស​កម្ពុជា​​ ទោះ​​ជា​វ័យ​កាន់​តែ​ច្រើន។ ឆ្នាំ​២០២៤ រូប​គេ​នៅ​តែ​ទទួល​បាន​ឱកាស​ប្រកួត​​ញឹក​ញាប់​​ទាំង​ក្នុង និង​ក្រៅ​ប្រទេស។ រូប​គេ​បាន​បរាជ័យ​តែ​២​ដង​គត់​គឺ​ចាញ់​កីឡាករប្រេស៊ីល Lucas Gabrel និង កីឡាករប្រដាល់​ប៉ូឡូញ Bartek Paszczyk នៅ​អង់គ្លេស​ ខណៈ​ទទួល​បាន​ជោគជ័យ​នៅ​ប្រទេស​បារាំង។ រាល់​ព្រឹត្តិការណ៍​ប្រកួត​ថ្នាក់​ជាតិ និង​អន្តរជាតិ​ រូប​គេ​កម្រ​ខក​ខាន​ណាស់ ក្នុង​នោះ​បាន​ឈ្នះ​​​មេដាយ​មាសកីឡា​ជាតិ លើក​ទី​៤​។

• ១០. ធឿន ធារ៉ា​

ជោគជ័យ​ក្នុង​ឆ្នាំ​២០២២ តាម​រយៈ​ការ​ឈ្នះ​ខ្សែ​ក្រវាត់​ Thai Fight និង​​ឆ្នាំ​២០២៣​ ​ឈ្នះ​ខ្សែ​ក្រវាត់ 8 Men Tournament ដែល​មាន​​រង្វាន់​​រថយន្ត​១​គ្រឿង ធឿន ធារ៉ា រឹត​តែ​ធ្វើ​​​ធ្វើ​បាន​ល្អ​​ក្នុង​ឆ្នាំ​២០២៤។ រូប​គេ​បាន​បង្កើត​កំណត់​ត្រា​មិន​ចាញ់​សោះ​ក្នុង​ឆ្នាំ​២០២៤ ជា​មួយ​ការ​ឈ្នះ​ខ្សែ​ក្រវាត់ 8 Men Tournament លើក​ទី២ ​ដោយ​មាន​រង្វាន់​ផ្ទះ​វីឡា និង​ជាប់​​ឈ្មោះ​ក្នុង​ទស្សនាវដ្តីអាមេរិកដ៏ល្បី «Forbes»៕

អត្ថបទ៖ វីរបុត្រ