កីឡា

ក្រសួងមហាផ្ទៃឈរលេខ១ ក្នុងការប្រកួតប្រដាល់សកលជើងឯកជាតិឆ្នាំ២០២៤

បានផុស

១ ខែ មុន

នៅ

ថ្ងៃសុក្រ ២៧ ធ្នូ ២០២៤

ដោយ

ក្រុមកីឡាករ កីឡាការិនីប្រដាល់សកលមកពីក្រសួងមហាផ្ទៃ ឈរចំណាត់ថ្នាក់លេខ១ក្នុងការប្រកួតកីឡាប្រដាល់សកលជ្រើសរើសជើងឯកថ្នាក់ជាតិប្រចាំឆ្នាំ បន្ទាប់ពីចប់ការប្រកួតទាំងស្រុងកាលពីថ្ងៃទី២៦ ខែធ្នូ ឆ្នាំ២០២៤ នៅសាលដំបូលទូកក្នុងសាកលវិទ្យាល័យភូមិន្ទភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតប្រដាល់សកលជើងឯកថ្នាក់ជាតិ ឆ្នាំ២០២៤ មាន១២វិញ្ញាសាគឺក្រសួងមហាផ្ទៃទទួលបានមេដាយមាស៥គ្រឿង ឈរចំណាត់ថ្នាក់លេខ១ក្នុងតារាងមេដាយ ខណៈចំណាត់ថ្នាក់លេខ២បានទៅ ក្រសួងការពារជាតិ ដែលបានឈ្នះមេដាយមាស៣ និងប្រាក់៤ ហើយក្លិបបញ្ជាការដ្ឋានកាំភ្លើងធំឈ្នះមេដាយមាស២ ប្រាក់១ និងសំរិទ្ធ៤ ឈរនៅលេខ៣។

ជាមួយគ្នានេះក្លិបខេត្តកំពង់ឆ្នាំង ឈ្នះមេដាយមាស១ សំរិទ្ធ១ និងក្លិបអន្លង់កូមមានជ័យ ឈ្នះមេដាយមាស១ ហើយមានក្លិប១១ផ្សេងទៀតទទួលបានមេដាយប្រាក់ និងសំរិទ្ធ។

អ្វីដែលគួរឲ្យកត់សំគាល់ កីឡាករ កីឡាការិនីប្រដាល់សកលរបស់ក្រសួងមហាផ្ទៃចំនួន៥នាក់បានឡើងដល់វគ្គផ្តាច់ព្រ័ត្រគឺឈ្នះការប្រកួតទាំងអស់ដើម្បីទទួលបានមេដាយមាស។ ជាពិសេសគ្មានកីឡាករ កីឡាការិនីណាម្នាក់របស់ក្រសួងមហាផ្ទៃទទួលបានមេដាយប្រាក់ ឬសំរិទ្ធឡើយ។

ការប្រកួតប្រដាល់សកលជើងឯកថ្នាក់ជាតិប្រចាំឆ្នាំ២០២៤ មានក្លិប សមាគម និងអង្គភាពចំនួន៣០មកពីទូទាំងប្រទេសបានចូលរួមប្រកួតចាប់ពីថ្ងៃទី២៣ ដល់ទី២៦ ខែធ្នូ ឆ្នាំ២០២៤ នៅសាលដំបូលទូកក្នុងសាកលវិទ្យាល័យភូមិន្ទភ្នំពេញ។

ការប្រកួតនេះជាផ្នែកមួយដ៏សំខាន់ក្នុងការពង្រឹងសមត្ថភាពរបស់កីឡាករ កីឡាការិនីជម្រើសជាតិកម្ពុជាសម្រាប់ការត្រៀមចូលរួមប្រកួតកីឡាស៊ីហ្គេម លើកទី៣៣ ឆ្នាំ២០២៥ នៅប្រទេសថៃ។ ក្នុងឆ្នាំ២០២៤ សហព័ន្ធកីឡាប្រដាល់សកលកម្ពុជាបានបញ្ជូនកីឡាករជាច្រើនទៅប្រកួតនៅក្រៅប្រទេសដើម្បីពង្រឹងសមត្ថភាពរបស់ពួកគេ៕