កីឡា

ខ្សែប្រយុទ្ធចូលសញ្ជាតិវៀតណាមថ្មី Rafaelson លេង២ប្រកួត ស៊ុតបាន៣គ្រាប់

បានផុស

៣ ខែ មុន

នៅ

ថ្ងៃសុក្រ ២៧ ធ្នូ ២០២៤

ដោយ

កីឡាករដើមកំណើតប្រេស៊ីល Rafaelson Bezerra Fernandes ដែលទើបទទួលបានសញ្ជាតិវៀតណាមថ្មី ស៊ុតបាន៣គ្រាប់ ក្នុងការបង្ហាញខ្លួន២លើកឲ្យក្រុមបាល់ទាត់ជម្រើសជាតិ វៀតណាម ក្នុងពានរង្វាន់ ASEAN Championship ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបង្ហាញខ្លួនឲ្យជម្រើសជាតិវៀតណាម លើកដំបូង Rafaelson ស៊ុតបាន២គ្រាប់នៅពេលយកឈ្នះ មីយ៉ាន់ម៉ា ដោយលទ្ធផល ៥-០ នៅវគ្គសន្សំពិន្ទុក្នុងពូលចុងក្រោយកាលពីថ្ងៃទី២១ ខែធ្នូ ឆ្នាំ២០២៤ និងការបង្ហាញខ្លួនលើកទី២ រូបគេស៊ុតបាន១គ្រាប់ទៀតនៅពេលវៀតណាម ឈ្នះ សិង្ហបុរី ដោយលទ្ធផល ២-០ ក្នុងជើងទី១ វគ្គពាក់កណ្តាលផ្តាច់ព្រ័ត្រ កាលពីថ្ងៃទី២៦ ខែធ្នូ ឆ្នាំ២០២៤។

រូបគេបានក្លាយជាផ្នែកដ៏សំខាន់នៅតំបន់ប្រយុទ្ធរបស់ វៀតណាម ទាំងការបង្កើតឱកាសគ្រាប់បាល់ និងបានក្លាយជាកីឡាករល្អប្រចាំការប្រកួតជាមួយ មីយ៉ាន់ម៉ា។ សម្រាប់ការប្រកួតជាមួយសិង្ហបុរី រូបគេក៏រួមចំណែកដ៏សំខាន់។

កីឡាករ Rafaelson ដែលមានឈ្មោះវៀតណាម Nguyễn Xuân Son ទទួលបានសញ្ជាតិវៀតណាម នៅថ្ងៃទី២០ ខែកញ្ញា ឆ្នាំ២០២៤ បន្ទាប់ពីលេងឲ្យ៤ក្លិបផ្សេងគ្នានៅលីគប្រទេសនេះ។ រូបគេលេងឲ្យក្លិបវៀតណាម Nam Dinh នៅឆ្នាំ២០២០ និងក្លិប Da Nang ឆ្នាំ២០២១-២០២១, ក្លិប Binh Dinh ឆ្នាំ២០២១-២០២៣ និងត្រឡប់មកក្លិប Nam Dinh វិញពីឆ្នាំ២០២៣រហូតដល់បច្ចុប្បន្ន។

កីឡាករ Rafaelson បានឈ្នះស្បែកជើងមាស២រដូវកាលជាប់គ្នានៅលីគវៀតណាម។ រូបគេបានឈ្នះស្បែកជើងមាស លើកទី១ ពីការស៊ុតបាន១៦គ្រាប់ឲ្យក្លិប Binh Dinh រដូវកាល២០២២-២៣ និងឈ្នះស្បែកជើងមាសលើកទី២ពេករកបាន៣១គ្រាប់ឲ្យក្លិប Nam Dinh រដូវកាល២០២៣-២៤ ជាពេលដែលក្លិបឈ្នះជើងឯកលីគកំពូលវៀតណាម។ រូបគេបានឈ្នះពានកីឡាករល្អបំផុតប្រចាំរដូវកាល។ រូបគេក៏បានជួយក្លិប ឈ្នះជើងឯក Vietnamese Super Cup ឆ្នាំ២០២៤៕