កីឡា

អតីតកីឡាករជម្រើសជាតិវៀតណាមត្រូវចាប់ខ្លួនក្រោយប្រើហិង្សាលើអាជ្ញាកណ្ដាល

បានផុស

១ ខែ មុន

នៅ

ថ្ងៃសុក្រ ៣ មករា ២០២៥

ដោយ

លោក Le Sy Manh អាយុ៤១ឆ្នាំ ជាអតីតកីឡាករជម្រើសជាតិវៀតណាម ត្រូវបានចាប់ខ្លួនក្រោយការប្រើហិង្សាលើអាជ្ញាកណ្តាល ក្នុងការប្រកួតកីឡាបាល់ទាត់ស្ម័គ្រចិត្តនៅទីក្រុងហូជីមិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប៉ូលីសខណ្ឌ Tan Binh ក្នុងទីក្រុង HCMC បានឃុំខ្លួនលោក Manh កាលពីថ្ងៃព្រហស្បតិ៍ ដើម្បីស៊ើបអង្កេតជុំវិញការចោទប្រកាន់ពីបទរំខានសណ្តាប់ធ្នាប់សាធារណៈ។ ការចាប់ខ្លួននេះបានធ្វើឡើង បន្ទាប់ពីមានការផ្ទុះកំហឹងជាសាធារណៈមួយសប្តាហ៍។ តាមរយៈវីដេអូបានបង្ហាញពីការវាយដំ អំឡុងពេលការប្រកួតកាលពីថ្ងៃទី២២ ខែធ្នូ ដែលត្រូវបានចែកចាយតាមបណ្តាញទំនាក់ទំនងសង្គម។

ឧបទ្ទវហេតុនេះបានទាក់ទាញមតិរាប់ពាន់នាក់ថ្កោលទោសចំពោះសកម្មភាពរបស់លោក Manh ។ អាជ្ញាធរបានបញ្ជាក់ថា ការចាប់ខ្លួននេះឆ្លុះបញ្ចាំងពីការប្ដេជ្ញាចិត្តរបស់នាយកដ្ឋាននគរបាលក្រុងហូជីមិញ ក្នុងការដោះស្រាយយ៉ាងម៉ឺងម៉ាត់នូវទង្វើដែលមិនគោរពច្បាប់។

ក្នុងអំឡុងពេលប្រកួត Manh ទទួលបានកាតលឿងដោយសារការប្រើកែងទៅលើគូប្រកួត។ បន្ទាប់មករូបគេបានប្រឈមមុខនឹងអាជ្ញាកណ្តាលលោក Pham Van Nguyen ហើយបានវាយមុខគាត់ ដែលនាំឲ្យគាត់ទទួលបានកាតលឿងទី២។ បន្ទាប់ពីបានកាតក្រហម Manh បានទាត់អាជ្ញាកណ្តាលពីក្រោយ និងដាល់ចំមុខ បើទោះបីជាមានការអន្តរាគមន៍ពីមិត្តរួមក្រុម និងសន្តិសុខក៏ដោយ។

Manh កើតក្នុងឆ្នាំ១៩៨៤ លេងបាន៧ប្រកួតឲ្យក្រុមជម្រើសជាតិវៀតណាមក្រោមការបង្វឹក Henrique Calisto ពីឆ្នាំ២០០៩ ដល់២០១០។ ក្នុងអាជីពបាល់ទាត់របស់របស់គាត់បានលេឲ្យក្លិបជាច្រើនរួមមាន Hanoi FC, Ninh Binh FC, Thanh Hoa FC, Quang Nam FC, Sai Gon Xuan Thanh និង Hai Phong FC ៕