កីឡា

សហព័ន្ធបាល់ទះនឹងស្វែងរកកូនកាត់នៅក្រៅប្រទេសដើម្បីពង្រឹងជម្រើសជាតិនារី

បានផុស

២ ខែ មុន

នៅ

ថ្ងៃចន្ទ ៦ មករា ២០២៥

ដោយ

សហព័ន្ធកីឡាបាល់ទះកម្ពុជាមានការភ្ញាក់ផ្អើលយ៉ាងខ្លាំងនាប៉ុន្មានថ្ងៃចុងក្រោយនេះដែលមហាជនចាប់អារម្មណ៍ពីកីឡាការិនីបាល់ទះក្នុងការប្រកួតបាល់ទះពានរង្វាន់ឯកឧត្តមសន្ដិបណ្ឌិត នេត សាវឿន ដើម្បីអបអរសាទរថ្ងៃទី៧មករា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយចប់ការប្រកួតដែលជើងឯកផ្នែកនារីបានទៅក្រុមកីឡាការិនីបាល់ទះខេត្តពោធិ៍សាត់ លោក អាំង សិរីពិសិដ្ឋ អនុប្រធាន និងជាអគ្គលេខាធិការសហព័ន្ធកីឡាបាល់ទះកម្ពុជាបានឲ្យដឹងថា សហព័ន្ធបានសម្លឹងឃើញកីឡាការិនីបាល់ទះកម្ពុជាមួយចំនួនហើយដែលមានកាយសម្បទា និងកម្ពស់ខ្ពស់អាចជ្រើសរើសពួកគាត់មកបង្វឹកបង្ហាត់ឲ្យកាន់តែខ្លាំងឡើង។ កាយសម្បទាពិតជាសំខាន់ណាស់នៅក្នុងវិស័យបាល់ទាត់កម្ពុជា ពីព្រោះបើកាយសម្បទាចាញ់ប្រៀបគេគឺពិតជាពិបាកប្រកួតប្រជែងណាស់។

លោករម្លឹកថា ជាក់ស្តែងកីឡាករ ពិន សារ៉ុន កាលពីមុនមិនមែនជាកីឡាករល្អកម្រិតអាជីពទេ ប៉ុន្តែដោយសាររូបគេមានកាយសម្បទាល្អគឺកម្ពស់ខ្ពស់ ដូច្នេះក្លិបបាល់ទះវិសាខាដែលកាលពីមុនឈ្មោះក្រុមបាល់ទះសហភាពសហព័ន្ធយុវជនកម្ពុជាខេត្តព្រៃវែង បានជ្រើសរើសយករូបគេមកបង្វឹកបង្ហាត់។ ទីបំផុត ពិន សារ៉ុន បានក្លាយជាកីឡាករបាល់ទះអាជីពកម្រិតខ្ពស់។

លោក អាំង សិរីពិសិដ្ឋ បានបន្តថា ៖«សហព័ន្ធកីឡាបាល់ទះកម្ពុជានឹងខិតខំប្រឹងប្រែង ស្វះស្វែងរកកីឡាការិនីជាកូនកាត់ក្តី កូនខ្មែរនៅក្រៅប្រទេសក្តី ឲ្យតែមានសញ្ជាតិកម្ពុជា មានកាយសម្បទាល្អ យើងនឹងជ្រើសរើសពួកគាត់មកបំពាក់បំប៉នបច្ចេកទេស សមត្ថភាព ដើម្បីក្លាយជាក្រុមជម្រើសជាតិនារីដែលអាចប្រកួតប្រជែងលើឆាកអន្តរជាតិបាន»។

តាមប្រការនេះមានន័យថា សហព័ន្ធបាល់ទះកម្ពុជាមិនមែនផ្តោតលើតែកីឡាការិនីអាជីពស្រាប់នោះទេ ប៉ុន្តែជាកីឡាការិនីដែលអាចចេះលេងបាល់ទះ និងមានកម្ពស់ចាប់ពី១.៧៥ម៉ែត្រឡើងដែលជាកម្ពស់ស្តង់ដាដើម្បីយកមកប្រមូលផ្តុំហ្វឹកហាត់ក្នុងនាមជាក្រុមបាល់ទះជម្រើសជាតិនារី។

ក្នុងព្រឹត្តិការណ៍ប្រកួតបាល់ទាត់ពានរង្វាន់ឯកឧត្តមសន្ដិបណ្ឌិត នេត សាវឿន ដើម្បីអបអរសាទរថ្ងៃទី៧មករា ដែលបានបញ្ចប់ទៅកាលពីល្ងាចថ្ងៃទី៥ ខែមករា ទទួលបានការចាប់អារម្មណ៍ពីមហាជនអំពីកីឡាការិនីបាល់ទះកម្ពុជា ក្នុងនោះទាំងផ្នែកបច្ចេកទេស និងរូបកាយដ៏ស្រស់ស្អាតរបស់ពួកគេ។

ជាលទ្ធផលក្រុមបាល់ទះនារីខេត្តពោធិ៍សាត់បានក្លាយជាជើងឯក បន្ទាប់ពីយកឈ្នះក្រុមចំណាត់ថ្នាក់លេខ២គឺក្រុមបាល់ទះខេត្តកណ្តាលដោយលទ្ធផល ៣-១ ខណៈលេខ៣បានទៅក្រុមបាល់ទះនារីស្នងការដ្ឋានរាជធានីភ្នំពេញ បន្ទាប់ពីឈ្នះក្រុមបាល់ទះនារីក្រសួងមហាផ្ទៃ៕