អត្តពលិក​រុស្ស៊ី​ ៥​នាក់​ត្រូវ​បាន​អនុញ្ញាត​ឱ្យ​ប្រកួតជាផ្លូវ​ការ​​លើឆាកអន្តរជាតិវិញ

សហព័ន្ធកីឡាស្គីភ្នំអន្តរជាតិ បានអនុញ្ញាតឱ្យអត្តពលិកជិះស្គីលើភ្នំរុស្ស៊ីចំនួន ៥នាក់នៅដើមខែធ្នូ ចូលរួមប្រកួតប្រជែងជាអន្តរជាតិ រួមទាំងក្នុងដំណាក់កាលជម្រុះដែលគ្រោងនឹងរៀបចំសម្រាប់ការប្រកួតរដូវរងា ធ្វើឡើងនៅទីក្រុង Milan និង Cortina d’Ampezzo ក្នុងខែកុម្ភៈ ឆ្នាំ២០២៦។

យោងតាមសេចក្តីថ្លែងការណ៍ដែលផ្តល់ដោយស្ថាប័នកីឡានេះ អាជ្ញាប័ណ្ណដែលអនុញ្ញាតឱ្យមានការចូលរួមជាអន្តរជាតិ ក្រោមស្ថានភាពអព្យាក្រឹតត្រូវបានចេញឱ្យជនជាតិរុស្ស៊ី ៥នាក់រួចរាល់ហើយ។

«អត្តពលិកចំនួន ៥នាក់ បុរស ៣នាក់ និងនារី ២នាក់ត្រូវបានចេញអាជ្ញាប័ណ្ណសម្រាប់រដូវកាល ២០២៤/២០២៥ ដើម្បីចូលរួមក្នុងការប្រកួតពិភពលោក និងជើងឯកពិភពលោក ដែលជាការប្រកួតជម្រុះសម្រាប់អូឡាំពិកឆ្នាំ២០២៦»។

ទន្ទឹមនឹងនោះ ប្រធានគណៈកម្មាធិការអូឡាំពិករុស្ស៊ី លោក Mikhail Degtyarev ជឿជាក់ថា រដូវកាលខាងមុខនឹងនាំមកនូវព័ត៌មានកាន់តែប្រសើរឡើង។ លោក​បាននិយាយថា ៖«ខ្ញុំចង់បញ្ជាក់ដោយទំនុកចិត្ត​នៅ​ ឆ្នាំ២០២៥ នឹងក្លាយជាឆ្នាំជោគជ័យ និងវិជ្ជមានសម្រាប់កីឡារុស្ស៊ី។ ក្នុងនាមជារដ្ឋមន្ត្រីក្រសួងកីឡា និងជាប្រធានគណៈកម្មាធិការ ខ្ញុំនឹងធ្វើគ្រប់យ៉ាងតាមអំណាចរបស់ខ្ញុំដើម្បីសម្រេចបាននូវគោលដៅដែលបានកំណត់»។

កីឡាជិះស្គីលើភ្នំ រួមមានការឡើងលើភ្នំដោយពាក់ស្បែកជើងស្គី ការជិះស្គីចុះភ្នំ និងការឡើងភ្នំឧបសគ្គ។ កីឡានេះនឹងក្លាយជាវិញ្ញាសារអូឡាំពិក នៅកីឡាអូឡាំពិករដូវរងា Milano-Cortina ទោះបីជាវាបានបង្ហាញខ្លួនរួចហើយនៅក្នុងព្រឹត្តិការណ៍កីឡាអូឡាំពិកយុវជន រដូវរងា នៅទីក្រុង Lausanne ឆ្នាំ២០២០។

គួររម្លឹក​ថា បន្ទាប់ពីរុស្ស៊ីបានបើកការលុកលុយលើអ៊ុយក្រែន ក្នុងឆ្នាំ២០២២ និងចាប់ផ្តើមជម្លោះដ៏ធំបំផុតនៅអឺរ៉ុបចាប់តាំងពីសង្គ្រាមលោកលើកទី២ សហព័ន្ធបាល់ទាត់ពិភពលោក បានចាប់ផ្តើមហាមឃាត់ក្រុម និងកីឡាកររុស្ស៊ី​ពី​ការ​ចូលរួមក្នុងការប្រកួតនានា ដែលរួមបញ្ចូលទាំងសហព័ន្ធបាល់ទាត់ពិភពលោក (FIFA) ដែលបានឆ្លើយតបទៅនឹង “ប្រតិបត្តិការយោធាពិសេស” ដែលប្រកាសដោយលោកពូទីនកាលពីថ្ងៃទី២៤ ខែកុម្ភៈ ឆ្នាំ២០២២ ដោយរារាំងក្រុមជម្រើស​ជាតិ​រុស្ស៊ី និងក្លិបរុស្ស៊ីទាំងអស់ពីការចូលរួមក្នុងព្រឹត្តិការណ៍ និងការប្រកួតដែលដំណើរការដោយ FIFA ។ សហព័ន្ធបាល់ទាត់ទ្វីបអឺរ៉ុប ក៏បានធ្វើតាមការហាមឃាត់ដូចគ្នា ដោយលើកឡើងពីការវាយលុកដោយសកម្មប្រយុទ្ធរបស់វិមានក្រឹមឡាំងថាជាហេតុផលនៅពីក្រោយការដាក់ទណ្ឌកម្ម៕

ប្រែសម្រួល៖ មន្នីរ័ត្ន
ប្រភព៖ Inside The Games