សួន ចាន់ណារ៉ូ ថា យុវជនវិសាខាកាន់តែល្អ បើមាន​​​​​​​​​​​​​​​​​​ឱកាសបង្ហាញសមត្ថភាពច្រើន

អ្នកប៉ះសេឆ្នើម សួន ចាន់ណារ៉ូ ជាអតីតកីឡាករក្រុម​បាល់ទះ​ជម្រើសជាតិកម្ពុជា បានមើលឃើញ​ពីការអភិវឌ្ឍរបស់ក្លិប​បាល់ទះ​វិសាខា លើ​ថ្នាលយុវជន​ក្នុងរយៈពេលប៉ុន្មានឆ្នាំចុងក្រោយ​ពិត​ជា​ទទួល​បាន​ផល​ល្អ​ខ្លាំង​មែន​ទែន។

កីឡាករ សួន ចាន់ណារ៉ូ បានប្រាប់«កម្ពុជាថ្មី» ៖«ខ្ញុំឃើញមួយរយៈនេះថ្នាលយុវជនវិសាខា ពួកគាត់ប្លែកមែនទែនក្នុងការលោតម៉ាត់ផ្ដាច់ ការចាប់សេវា និងការធ្វើរនាំង ប៉ុន្តែនៅស្ទើរ​ឆន្ទៈ និងបទពិសោធ។ ពួកគាត់អត់​ធ្លាប់​ប្រកួត​ក្រៅប្រទេស ឬការបង្ហាញខ្លួន​ក្នុង​ពាន​រង្វាន់​ធំ​ៗ​ច្រើន​ទេ។ ប្រសិនបើមានការប្រកួតច្រើនសម្រាប់ថ្នាលយុវជនវិសាខា ខ្ញុំគិតថា ពួកគាត់នឹង​កាន់​តែ​អស្ចារ្យ»។

កាលពី​ពេល​ថ្មីៗ​នេះ ការប្រកួតពានរង្វាន់ឯកឧត្ដម សន្តិបណ្ឌិត នេត សាវឿន ដើម្បីអបអរសារទរទិវាជ័យជម្នះ ៧មករា ក្លិប​វិសាខាបានឈ្នះ​ជើងឯក។ ការប្រកួតនោះ ពួក​គេ​បាន​ផ្ដល់​ឱកាស​ដល់យុវជនឲ្យចូលរួមជាមួយរៀងច្បង ហើយ​ពួក​គេ​ពិត​ជា​បង្ហាញ​សមត្ថភាព​បាន​ល្អ។ ជាក់​ស្តែង កីឡាករ ណែក ផានិត ជាអ្នកប៉ះសេ និងកីឡាករ លឹម ចិត្រ្តា ពិត​ជា​ធ្វើ​បាន​ល្អ​មែន​ទែន។

វិស័យបាល់ទះនៅ​កម្ពុជា កាន់បោះជំហានទៅយ៉ាងឆាប់រហ័ស ក្នុងរយៈពេលប៉ុន្មានឆ្នាំចុងក្រោយ។ ជាពិសេសបានផលិត​ធនធានកីឡាករល្អៗជាច្រើន។ ក្នុងព្រឹត្តិការណ៍សុីហ្គេមឆ្នាំ២០២៥ អតីតកីឡាករ​បាល់ទះ​ក្រុមជម្រើសជាតិកម្ពុជា សួន ចាន់ណារ៉ូ បានមើលឃើញ​ថា កម្ពុជានឹងបន្ដធ្វើល្អ ដោយសារពេលនេះកម្ពុជាមានកីឡាករវ័យក្មេង​ច្រើន​ដែលមានសមត្ថភាព​ដូច​ជា កីឡាករ ធី ម៉េងហួង, មឿន ម៉េងឡាយ និង កែវ ស្រេងលីហួរ បូក​ផ្សំ​នឹង​រៀម​ច្បង​ដែល​មាន​បទ​ពិសោធ​ច្រើន។

បន្ទាប់ពីចូលនិវត្ដន៍ពីក្រុមជម្រើសជាតិ សួន ចាន់ណារ៉ូ បានសម្លឹងឃើញកីឡាករវ័យ កែវ ស្រេងលីហួរ ស័ក្តិសមជាងគេក្នងការស្នងតំណែងរបស់ខ្លួន៕

អត្ថបទ៖ ផា រតនា