កីឡា

នាគមាស ឃីម បូរ៉ា វិលមកកាន់សង្វៀនគ្រុឌគុនខ្មែរ នឹងមិនធ្វើឲ្យអ្នកគាំទ្រខកបំណង

បានផុស

២ ខែ មុន

នៅ

ថ្ងៃអង្គារ ១៤ មករា ២០២៥

ដោយ

បន្ទាប់ពីខកខានក្នុងការឡើងសង្វៀនអស់រយៈពេលជាច្រើនខែ នាគមាស ឃីម បូរ៉ា នឹងវិលត្រឡប់មកកាន់សងង្វៀនគ្រុឌគុនខ្មែរ ដែលនឹងមិនធ្វើឲ្យអ្នកគាំទ្ររបស់ខ្លួនខកបំណងឡើយ។

ឆ្នាំថ្មី បើកទំព័រសករាជថ្មី នាគមាស ឃីម បូរ៉ា នឹងបង្ហាញអ្វីដែលថ្មី បន្ទាប់ពីបាត់មុខពីសង្វៀនយូរដោយសារសម្រាកព្យាបាលរបួសដៃ។ ពេលនេះគឺដំណឹងដ៏រីករាយសម្រាប់អ្នកគាំទ្រ។ ប្អូនប្រុសបង្កើតរបស់ ឃីម ឌីម៉ា បានសម្រេចវិលមកកាន់សង្វៀន គ្រុឌ គុនខ្មែរ ដើម្បីទទួលស្វាគមន៍ ខ្លាកំណាចឆ្លងដែនមកពីប្រទេសចិន ហៅ ជីឡុង នាថ្ងៃទី១៨ ខែមករា ឆ្នាំ២០២៥ ខាងមុខនេះ នៅឧទ្យានសាន់សាញ បឹងកក់ រាជធានីភ្នំពេញ។ នេះជាអ្វីដែលអ្នកគ្រប់គ្នាទន្ទឹមរង់ចាំជាមកយូរមកហើយដើម្បីទទួលបានចំណីចក្ខុដ៏ពិសេសពីអ្នកលេងគុនខ្មែរដ៏ល្បីល្បាញរូបនេះ។

ការវិលត្រឡប់មកកាន់សង្វៀនគ្រុឌគុនខ្មែរ ឃីម បូរ៉ា ដែលជានាគកំណាចមួយរូបនឹងធ្វើឲ្យសង្វៀន គ្រុឌគុនខ្មែរ រង្គោះរង្គើ កក្រើក និងជក់ចិត្តដិតអារម្មណ៍ដែលនឹងមិនធ្វើឲ្យអ្នកគាំទ្រ ខកចិត្តឡើយ។ សម្រាប់ការប្រកួតនេះដែរ សង្វៀនគ្រុឌគុនខ្មែរ ក៏កាន់តែធ្វើឱ្យបងប្អូនជក់ចិត្តកាន់តែខ្លាំង ទស្សនាហើយដកភ្នែកមិនរួច។

ឃីម បូរ៉ា ក៏គ្មានការប្រកួតជាមួយកីឡាកររូបណានោះដែរ មិនដូចដែលគេបាននិយាយនោះទេ។ ជាក់ស្តែង នាគមាស មានតែសង្វៀនគ្រុឌគុនខ្មែរ តែមួយគត់ ដែលបានឧបត្ថម្ភធំផ្តាច់មុខសម្រាប់កូនប្រុសរបស់លោកគ្រូ ហេង ប៊ុនឃីម។ នេះមិនមែនជាការប្រកួតមិត្តភាពធម្មតានោះទេ ប៉ុន្តែជាការប្រកួតដណ្តើមខ្សែក្រវាត់គ្រុឌគុនខ្មែរ។ ថាតើម្ចាស់ផ្ទះ ឃីម បូរ៉ា ឬ ហៅ ជីឡុង ជាអ្នកស្ពាយខ្សែក្រវាត់វិលត្រឡប់ទៅផ្ទះវិញ?

ចម្លើយមាននៅឧទ្យានសាន់សាញ បឹងកក់ ភ្នំពេញ ដែលផ្សាយផ្ទាល់តាមកញ្ចក់ទូរទស្សន៍ជាតិ និងផេក TVK ព្រមទាំងផេកផ្លូវការ Krud Energy និង Krud Kun Khmer វេលាម៉ោង ៦:៣០នាទីយប់តទៅ ថ្ងៃសៅរ៍ ទី១៨ ខែមករា ឆ្នាំ២០២៥៕