កីឡា

ថ្ងៃនេះ កីឡាករឥណ្ឌា២រូប បង្ហាញខ្លួនឲ្យក្រុមខេត្តស្វាយរៀង ក្នុងតេជោលីគ

បានផុស

៣ សប្តាហ៍ មុន

នៅ

ថ្ងៃសៅរ៍ ១៨ មករា ២០២៥

ដោយ

ក្រុមបាល់ទះស្នងការដ្ឋាននគរបាលខេត្តស្វាយរៀង បាននាំចូលកីឡាករឥណ្ឌា២រូបដើម្បីពង្រឹងក្រុមប្រជែងពានរង្វាន់តេជោលីគ រដូវកាល២០២៥ បន្ទាប់ពីឆ្លងកាត់៣ប្រកួតកន្លងមក ពួកគេទំនងជាមិនសូវពេញចិត្តនឹងលទ្ធផលឡើយ។

មុនពេលការប្រកួតបាល់ទះតេជោលីគ រដូវកាលទី២ កាលពីថ្ងៃទី១០ ខែមករា ឆ្នាំ២០២៥ ក្រុមខេត្តស្វាយរៀងមានកីឡាករបរទេស៣នាក់ និងកីឡាករកម្ពុជា២រូបគួរឲ្យចាប់អារម្មណ៍ជាងគេក្នុងក្រុមចំណោមសមាជិកទាំងអស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករបរទេស៣នាក់នោះគឺ Sim Jian Qin ជាប្រធានក្រុមបាល់ទះជម្រើសជាតិម៉ាឡេស៊ី ដែលលេងក្នុងតួនាទីជាអ្នកវាយផ្តាច់។ កីឡាករម៉ាឡេស៊ី Shon Ngiap Shyang ជាអ្នកប៉ះសេ និងកីឡាករគុយបា Herrera Cabrera លេងជាអ្នកវាយផ្តាច់។ កីឡាករកម្ពុជា២រូបដែលគួរឲ្យចាប់អារម្មណ៍ជាងគេក្នុងចំណោមកីឡាករខ្មែរទាំងអស់គឺ ឌិន ស៊ីដែន ដែលជាអ្នកវាយផ្តាច់ និង សួន ចាន់ណារ៉ូ ជាអ្នកប៉ះសេ។

យ៉ាងណា លទ្ធផលនៃការប្រកួត៣លើកកន្លងមក ក្រុមខេត្តស្វាយរៀង ធ្វើមិនសូវបានល្អទេដោយសមត្ថភាពលេងមិនទាន់ស្មើគ្នាល្អ។ ការប្រកួតទី១ ពួកគេបាននាំមុខ វិសាខា ២-០ ទៅហើយ ប៉ុន្តែត្រូវបានវិសាខាវាយបកយកឈ្នះ ២-៣ ដែលធ្វើឲ្យពួកគេទទួលបាន១ពិន្ទុ។ ការប្រកួតទី២ ពួកគេ មិនទទួលបានពិន្ទុឡើយ បន្ទាប់ពីចាញ់ ក្រុមបញ្ជាការដ្ឋានអង្គរក្ស ០-៣ និងការប្រកួតលើកទី៣ ទើបរកបាន៣ពិន្ទុពេញ តាមរយៈជ័យជម្នះលើក្រុមខេត្តពោធិ៍សាត់ ដោយលទ្ធផល ៣-២។

ទម្រង់លេងនេះទំនងជាមិនអាចប្រជែងយកជើងឯកបានទេជាមួយក្រុមខ្លាំងដូចជា ក្រសួងមហាផ្ទៃ បញ្ជាការដ្ឋានអង្គរក្ស និងវិសាខា ដូច្នេះហើយបានជាពួកគេបាននាំយកកីឡាករឥណ្ឌា២រូបទៀត។ កីឡាករឥណ្ឌាទាំង២រូបនេះមិនទាន់ត្រូវបានគេដឹងពីសមត្ថភាពឡើយ ប៉ុន្តែមានកាយសម្បទាល្អ និងធ្លាប់កោះហៅចូលជម្រើសជាតិឥណ្ឌាថែមទៀត។

ប្រសិនបើ កីឡាករឥណ្ឌាទាំងពីរជាអ្នកវាយផ្តាច់ដ៏មានប្រសិទ្ធភាព ដោយចាប់ដៃគូជាមួយកីឡាករគុយបា Herrera និងអ្នកប៉ះសេឆ្នើម សួន ចាន់ណារ៉ូ ព្រមទាំងលីប៊ើរ៉ូដ៏ល្អ ខឹម សុវណ្ណដារ៉ា គឺច្បាស់ណាស់ថា ក្រុមខេត្តស្វាយរៀងនឹងជាបេក្ខភាពប្រជែងជើងឯកដល់វគ្គផ្តាច់ព្រ័ត្រ។

កាលពីសប្តាហ៍មុនសម្រាប់ការប្រកួតទី៣ គ្មានវត្តមានកីឡាករប្រធានក្រុមជម្រើសជាតិម៉ាឡេស៊ីទេ។ គេមិនទាន់ដឹងថាតើ រូបគេមានភារកិច្ចផ្ទាល់ខ្លួន ឬរបួសឡើយ ហើយមិនទាន់ច្បាស់ថា សប្តាហ៍នេះអាចមកជួយក្រុមវិញដែរ។

ថ្ងៃសៅរ៍ ទី១៨ ខែមករានេះ ក្រុមខេត្តស្វាយរៀង ត្រូវប្រកួតជាមួយ ក្រុមស្នងការដ្ឋាននគរបាលរាជធានីភ្នំពេញ វេលាម៉ោង៤រសៀល និងថ្ងៃអាទិត្យ ទី១៩ខែមករា ប៉ះក្រុមខេត្តតាកែវ វេលាម៉ោង១២ថ្ងៃត្រង់។

កីឡាករក្រុមខេត្តស្វាយរៀង