កីឡា

បច្ចុប្បន្ន លន បញ្ញា អាចចាត់ទុកជាកីឡាករលំដាប់ លេខ១ទម្ងន់៦៧គីឡូក្រាម

បានផុស

២ សប្តាហ៍ មុន

នៅ

ថ្ងៃអង្គារ ២១ មករា ២០២៥

ដោយ

ក្រោយពេល ឡៅ ចិត្រា បានឡើងទម្ងន់ និងហាក់ដូចជាសមត្ថភាពថយចុះ កីឡាករគុនខ្មែរ លន បញ្ញា អាចត្រូវបានចាត់ទុកជាអ្នកប្រដាល់លំដាប់លេខ១ក្នុងប្រភេទទម្ងន់៦៧គីឡូក្រាមនាពេលបច្ចុប្បន្ន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រហូតដល់ពេលនេះ លន បញ្ញា បានប្រឡូកក្នុងអាជីពប្រដាល់រយៈពេលប្រមាណ៩ឆ្នាំ បន្ទាប់ពីរូបគេបានចាប់ផ្តើមហ្វឹកហាត់គុនខ្មែរដំបូងតាំងពីឆ្នាំ២០១៦។ ក្នុងរយៈពេលនេះ កីឡាករទទួលបានជោគជ័យយ៉ាងធំធេងទាំងជូនជាតិ និងផ្ទាល់ខ្លួន។

កីឡាករបានឈ្នះមេដាយមាសកីឡាស៊ីហ្គេម ឆ្នាំ២០២៣ និងឈ្នះមេដាយប្រាក់ស៊ីហ្គេម ឆ្នាំ២០២១ នៅប្រទេសវៀតណាមដែលនេះជាសមិទ្ធផលជូនជាតិ។ ក្រៅពីសមិទ្ធផលជូនជាតិ លន បញ្ញា បានឈ្នះខ្សែក្រវាត់ចំនួន៦ខ្សែ និងរង្វាន់រថយន្តថ្មីសន្លាង១គ្រឿង។

លន បញ្ញា បានឈ្នះខ្សែក្រវាត់គ្រុឌគុនខ្មែរ២ខ្សែគឺទី១នៅពេលរូបគេបានឈ្នះកីឡាករអាហ្វ្រិកខាងត្បូង Ncedo Gomba និងទី២ នៅពេលរូបគេបានឈ្នះកីឡាករថៃ Lamnamoonlek Tded99។ សម្រាប់ខ្សែក្រវាត់ទាំងពីរនេះ រូបគេបានឡើងការពារជោគជ័យរហូត។

ខ្សែក្រវាត់ទី៣គឺ Kun Khmer Super Strike ដែលរូបគេបានយកឈ្នះលើមិត្តរួមជាតិ ឡុង សំណាង និងបានឡើងការពារជោគជ័យជាច្រើនដែរ។ ខ្សែក្រវាត់៣ទៀតគឺខ្សែក្រវាត់ប្រាក់អធិរាជគុនខ្មែរ ខ្សែក្រវាត់ Wurkz និងខ្សែក្រវាត់ស្រាបៀរកម្ពុជា។

រង្វាន់ធំបំផុតមួយគឺរថយន្តថ្មីសន្លាង១គ្រឿងនៅពេលរូបគេបានឈ្នះលើមិត្តរួមជាតិ មឿន សុខហ៊ុច។

កីឡាករដែលកើតនៅឆ្នាំ១៩៩៩ និងកម្ពស់១.៧៩ម៉ែត្រ កំពុងរក្សាទម្ងន់បានល្អ និងសមត្ថភាពកាន់តែកើនឡើងគួរឲ្យសរសើរ។ រូបគេជាកីឡាករដែលមានក្បាច់សម្លាប់ដៃគូចម្រុះគឺកណ្តាប់ដៃ ទាត់ ជង្គង់ និងកែង។ អ្វីដែលគួរឲ្យកត់សំគាល់មួយរយៈពេលចុងក្រោយនេះ ការទាត់ផ្កាប់ចានរលាស់ចុងជើងពិតជាគ្រោះថ្នាក់មែនទែនសម្រាប់ដៃគូ។

ក្រៅតែក្បាច់ដ៏សំបូរបែប លន បញ្ញា ជាកីឡាករវ៉ៃបច្ចេកទេស និងមិនងាយសម្រុកចូលទាំងកម្រោល ឬថយក្រោយខ្លាំងនោះទេ។ បូករួមជាមួយស្មារតី និងសីលធម៌ល្អ រូបគេស័ក្តិសមជាកីឡាករលំដាប់ឈានមុខគេ។

ដៃគូក្នុងស្រុកដែលពិបាកខ្លាំងបំផុតសម្រាប់ លន បញ្ញា គឺ ឡៅ ចិត្រា។ កីឡាករទាំងពីរបានជួបគ្នាក្នុងព្រឹត្តិការណ៍សំខាន់២ដង ប៉ុន្តែ លន បញ្ញា មិនធ្លាប់ទទួលបានជ័យជម្នះឡើយ។ លើកទី១ ការប្រកួតដណ្តើមខ្សែក្រវាត់មាស អធិរាជគុនខ្មែរដែលមានប្រាក់រង្វាន់៤០លានរៀល លន បញ្ញា បានចាញ់សន្លប់ក្នុងទឹកទី២ និងជួបគ្នាធំលើកទី២ លន បញ្ញា បានចាញ់ពិន្ទុដោយទទួលបាន២០លានរៀល ខណៈ ឡៅ ចិត្រា ទទួលបាន៤០លានរៀល កាលពីខែមីនា ឆ្នាំ២០២៤។

ក្រោយមក ឡៅ ចិត្រា បានរបួស និងទម្ងន់បានឡើងបានធ្វើឲ្យសមត្ថភាពក៏ធ្លាក់ចុះ។ បច្ចុប្បន្ន រូបគេប្រកួតក្នុងទម្ងន់៦៨គីឡូក្រាម ហើយពិតជាពិបាកធ្វើទម្ងន់ឲ្យធ្លាក់ចុះណាស់។ ស្របពេលជាមួយគ្នានេះ លន បញ្ញា បានកើនឡើងសមត្ថភាព និងរក្សាទម្ងន់បានល្អ ដូច្នេះអាចចាត់ទុករូបគេកំពុងឈរលំដាប់លេខសម្រាប់ទម្ងន់៦៧គីឡូក្រា៕